ନୂଆଦିଲ୍ଲୀ,୨୬।୭:ନିର୍ବାଚନରେ ହାରିବା ଏବଂ ମୁଖ୍ୟମନ୍ତ୍ରୀ ପଦ ହରାଇବା ପରେ ଜଗନମୋହନ ରେଡ୍ଡୀଙ୍କ ଅଡୁଆ ବଢିବାରେ ଲାଗିଛି। ଚନ୍ଦ୍ରବାବୁ ନାଇଡୁ ଆନ୍ଧ୍ରପ୍ରଦେଶର ସିଏମ ହୋଇଛନ୍ତି ଏବଂ ଦାୟିତ୍ୱ ଗ୍ରହଣ କରିବା ମାତ୍ରେ ରେଡ୍ଡୀ ଲଗାତାର ତାଙ୍କୁ ବିରୋଧ କରିବାରେ ଲାଗିଛନ୍ତି। ଚନ୍ଦ୍ରବାବୁ ନାଇଡୁ ସିଏମ ହେବା ମାତ୍ରେ, YSRCP ର ଜଗନ ମୋହନ ରେଡ୍ଡୀଙ୍କ ବିରୋଧରେ ଦୁର୍ନୀତି ଅଭିଯୋଗ ଆଣିବା ସହ ହତ୍ୟା ଉଦ୍ୟମ ଅଭିଯୋଗ ଆଣିଛନ୍ତି।
ସୂଚନା ଅନୁଯାୟୀ, ଚନ୍ଦ୍ରବାବୁ ନାଇଡୁଙ୍କୁ ବିରୋଧ କରି ଜଗନ ମୋହନ ରେଡ୍ଡୀ ଦିଲ୍ଲୀର ଜନ୍ତରମନ୍ତରରେ ବସିଥିଲେ। କଂଗ୍ରେସ ସହିତ କୌଣସି ସମ୍ପର୍କ ନ ଥିଲେ ମଧ୍ୟ ତାଙ୍କୁ ସେମାନଙ୍କ ସମର୍ଥନ ମାଗିବାକୁ ପଡ଼ିଥିଲା। ଏଥିପାଇଁ ଇଣ୍ଡିଆ ମେଣ୍ଟର ସଦସ୍ୟ ଅଖିଳେଶ ଯାଦବ ସମର୍ଥନ କରିବାକୁ ଯାଇ ପ୍ରଦର୍ଶନସ୍ଥଳୀରେ ପହଞ୍ଚିଥିଲେ।
ଜଗନ ମୋହନ ରେଡ୍ଡୀଙ୍କ ସହ ଇଣ୍ଡିଆ ଆଲାଇନ୍ସର ସଦସ୍ୟଙ୍କ ବୈଠକ ଦର୍ଶାଉଛି ଯେ ସେ ନିଜର ମେଣ୍ଟକୁ ବିସ୍ତାର କରୁଛନ୍ତି। ଯଦିଓ ଜଗନ ମୋହନ ରେଡ୍ଡୀ ଜନ୍ତର ମନ୍ତରରେ ତାଙ୍କୁ ସମର୍ଥନ କରିବାକୁ କଂଗ୍ରେସକୁ ନିମନ୍ତ୍ରଣ କରିଥିଲେ, କିନ୍ତୁ ଦଳ ଦୂରତା ବଜାୟ ରଖିଥିଲା।
ତେବେ ଏକ ସାକ୍ଷାତକାର ଦେଇ ଜଗନ ମୋହନ ରେଡ୍ଡୀ କହିଛନ୍ତି, କଂଗ୍ରେସ ପାଖରେ ସୁଯୋଗ ରହିଛି। ଯଦି ମୁଁ ଚାହଁିଥାନ୍ତି, ତେବେ କଂଗ୍ରେକୁ ସମର୍ଥନ ଦେଇ ପାରିଥା’ନ୍ତି। କିନ୍ତୁ ମୁଁ ଏପରି କରି ନ ଥିଲି। ଏଥିସହ ରେଡ୍ଡୀ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି, ଚନ୍ଦ୍ରବାବୁ ନାଇଡୁଙ୍କ ସହ କଂଗ୍ରେସର ଲୁଚଛପା ମେଣ୍ଟ ରହିଛି। କେବଳ ଏତିକି ନୁହେଁ, ଚନ୍ଦ୍ରବାବୁ ନାଇଡୁ ଉଭୟ ପାର୍ଶ୍ୱରେ ଖେଳ ଖେଳୁଛନ୍ତି ଏବଂ ତାଙ୍କୁ ଅନ୍ଧ ଭାବେ ବିଶ୍ୱାସ କରାଯାଉଛି ବୋଲି ସେ କହିଛନ୍ତି।
ରେଡ୍ଡୀଙ୍କ ଭଉଣୀ ଶର୍ମିଲା କଂଗ୍ରେସରେ ଯୋଗଦେବା ପରଠାରୁ ରେଡ୍ଡୀ ତାଙ୍କୁ ବିରୋଧ କରିଆସୁଛନ୍ତି। କିନ୍ତୁ ନାଇଡୁଙ୍କ ଠାରୁ ନିଜକୁ ସୁରକ୍ଷା ଦେବା ପାଇଁ ତାଙ୍କୁ କଂଗ୍ରେସର ସାହାଯ୍ୟ ନେବାକୁ ପଡୁଛି। ତେବେ ଚର୍ଚ୍ଚା ହେଉଛି କି, ରେଡ୍ଡୀ ଇଣ୍ଡିଆ ମେଣ୍ଟକୁ ଆସି ପାରନ୍ତି।
