ଥିରୁଭାନନ୍ତପୁରମ୍,୧।୧୧ : ମୂର୍ତ୍ତିକାର କନୟି କୁହ୍ନିରମଣ କେରଳ ସରକାରଙ୍କ ସର୍ବୋଚ୍ଚ ସମ୍ମାନକୁ ପ୍ରତ୍ୟାଖ୍ୟାନ କରିଛନ୍ତି। ପଦ୍ମ ପୁରସ୍କାରରେ ସମ୍ମାନୀତ କୁହ୍ନିରମଣଙ୍କୁ ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ସରକାରଙ୍କ ଦ୍ୱାରା ରାଜ୍ୟର ସର୍ବୋଚ୍ଚ ସମ୍ମାନ ଘୋଷଣା କରାଯାଇଥିଲା। କିନ୍ତୁ କୁହ୍ନିରମଣ ସମ୍ମାନକୁ ପ୍ରତ୍ୟାଖ୍ୟାନ କରିବା ସହିତ ଏକ ବିବାଦ ସୃଷ୍ଟି କରିଛନ୍ତି। ସେ କହିଛନ୍ତି ଯେ ପୁରସ୍କାର ଭଲ କିନ୍ତୁ ମୋର ମୂର୍ତ୍ତି ଗୁଡ଼ିକ ସମ୍ମୁଖୀନ ହେଉଥିବା ସମସ୍ୟାର ସମାଧାନ ନୁହେଁ ।
ସେ ଅଭିଯୋଗ କରିଛନ୍ତି ଯେ କର୍ତ୍ତୃପକ୍ଷ ତାଙ୍କର ପ୍ରତିଷ୍ଠିତ ମୂର୍ତ୍ତିଗୁଡ଼ିକର ଠିକ ଭାବରେ ରକ୍ଷାଣବେକ୍ଷଣ କରୁ ନାହାନ୍ତି। ଫଳରେ ସେଗୁଡ଼gିକର ସୌନ୍ଦର୍ଯ୍ୟକୁ ନଷ୍ଟ ହେଉଛି। ସରକାରଙ୍କ ଅବହେଳା ହେତୁ ତାଙ୍କ ମୂର୍ତ୍ତି ଗୁଡ଼ିକୁ ଅଣଦେଖା କରାଯାଉଛି। ମୁଁ ଜଣେ ମା ପରି ଅନୁଭବ କରୁଛି ମୋ ପିଲାମାନେ ହଇରାଣ ହେଉଛନ୍ତି। ଏହିପରି ମାନସିକ ଯନ୍ତ୍ରଣା ଦେଇ ଗତି କଲାବେଳେ ମୁଁ ସମ୍ମାନ ଗ୍ରହଣ କରିପାରିବି ନାହିଁ ।
କେରଳ ଶ୍ରୀ ସମ୍ମାନ ପାଇଁ ତାଙ୍କୁ ମନୋନୀତ କରାଯାଇଥିଲା। ତାଙ୍କ ଦ୍ୱାରା ନିର୍ମିତ ସାଗର କନ୍ୟା (ଜଳପରୀ) ଚମତ୍କାର ମୂର୍ତ୍ତି ସମଗ୍ର ବିଶ୍ୱରେ ପ୍ରସିଦ୍ଧ। ଶଙ୍ଖମୁଖମରେ ଅବସ୍ଥିତ ସାଗର କନ୍ୟା ମୂର୍ତ୍ତିକୁ ଅବହେଳା କରାଯାଉଥିବା ନେଇ ସେ କହିଛନ୍ତି ଯେ ପ୍ରତିମା ନିକଟରେ ଏକ ହେଲିକପ୍ଟର ସଂରଚନା ସ୍ଥାପନ କରାଯାଇଛି । ଫଳରେ ମୋର ମୂର୍ତ୍ତିର ଗୌରବ ନଷ୍ଟ ହୋଇଯାଇଛି।
ଏଭଳି ପରିସ୍ଥିତିରେ ମୁଁ ସମ୍ମାନକୁ କିପରି ଗ୍ରହଣ କରିପାରିବି? ଏହି ସବୁ ଦେଖିବା ପରେ ମୁଁ କାହିଁକି ଏହା ଗ୍ରହଣ କରିବି? ସମ୍ମାନ ମାଧ୍ୟମରେ ମୋର ସମସ୍ୟା ସମାଧାନ ହେବ ନାହିଁ। ମୁଁ ଏପରି ସମ୍ମାନ ଚାହେଁ ନାହିଁ । ମୋର ମୂର୍ତ୍ତିଗୁଡିକର ଭଲ ଭାବରେ ରକ୍ଷଣାବେକ୍ଷଣ କରାଯିବା ଉଚିତ, ଏହା ମୁଁ ଚାହେଁ ।
ସେ ଏହା ମଧ୍ୟ କହିଛନ୍ତି ଯେ ମୁଖ୍ୟମନ୍ତ୍ରୀ ପିନାରାଇ ବିଜୟନ ଏହି ସମସ୍ୟାର ସମାଧାନ କରିବେ ବୋଲି ନିଶ୍ଚିତ ହୋଇଥିଲି। ତେବେ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ। ଏଥି ସହ ସେ ପୂର୍ବତନ ପର୍ଯ୍ୟଟନ ମନ୍ତ୍ରୀ କଡକମ୍ପଲି ସୁରେନ୍ଦ୍ରନଙ୍କୁ ସମାଲୋଚନା କରଛନ୍ତି। ମୂର୍ତ୍ତି ଚାରିପାଖରେ ସ୍ଥାପିତ ଅନ୍ୟ ମୂର୍ତ୍ତିଗୁଡ଼ିକ ପାଇଁ ସେ କଡକମ୍ପଲିଙ୍କୁ ଦାୟୀ କରିଛନ୍ତି।
