ଦାରିଙ୍ଗବାଡ଼ି,୨୦ା୧୨: କନ୍ଧମାଳ ଜିଲା ଦାରିଙ୍ଗବାଡ଼ି ଓଡ଼ିଶା ଆଦର୍ଶ ବିଦ୍ୟାଳୟର ବାର୍ଷିକ ଉତ୍ସବ ତଥା ପ୍ରାରମ୍ଭ -୨୦୨୪ ଅନୁଷ୍ଠିତ ହୋଇଯାଇଛି। ବିଦ୍ୟାଳୟର ଅଧ୍ୟକ୍ଷ ଜଗନ୍ନାଥ ମହାରଣାଙ୍କ ସଭାପତିତ୍ୱରେ ମୁଖ୍ୟ ଅତିଥି ଭାବେ ବାଲିଗୁଡ଼ା ଆଇଟିଡିଏର ପ୍ରକଳ୍ପ ପ୍ରଶାସକ କୃପାସିନ୍ଧୁ ବେହେରା ଯୋଗ ଦେଇଥିବାବେଳେ ଅନ୍ୟତମ ଅତିଥିଙ୍କ ମଧ୍ୟରେ ଆଇଆଇସି ଅଶୋକ କୁମାର ହାଁସଦା, ଏବିଇଓ ଗୋକୁଳାନନ୍ଦ ନାୟକ,ସରକାରୀ ବାଳିକା ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ ଅଜୟ କୁମାର ଜେନା ମଞ୍ଚାସୀନ ଥିଲେ।
କାର୍ଯ୍ୟକ୍ରମକୁ ସହକାରୀ ଶିକ୍ଷୟିତ୍ରୀ ସୋମ୍ୟା ସୁଚରିତା ଏବଂ ରଜତ ବିକ୍ରମ ପ୍ରଧାନ ପରିଚାଳନା କରିଥିଲେ। ଏହି ଅବସରରେ ଅଧ୍ୟକ୍ଷ ମହାରଣା ବିଦ୍ୟାଳୟ ସମ୍ପର୍କିତ ସୂଚନା ତଥା ଛାତ୍ରୀଛାତ୍ରଙ୍କ ଦଶମ ଓ ଦ୍ୱାଦଶ ପରୀକ୍ଷାରେ ଭଲ ପ୍ରଦର୍ଶନ କରୁଥିବା ସହ ଖେଳକୁଦ, ବିଜ୍ଞାନ ସମେତ ବିଭିନ୍ନ ପ୍ରତିଯୋଗିତାରେ ଅଂଶ ଗ୍ରହଣ କରି କୃତିତ୍ୱ ଅର୍ଜନ କରିଥିବାବେଳେ ରାଜ୍ୟସ୍ତରରେ ପ୍ରତିଯୋଗିତାରେ ଯୋଗଦାନ କରି କୃତିତ୍ୱ ଅର୍ଜନ କରିଥିବା ସୂଚନା ପ୍ରଦାନ କରିଥିଲେ।
ସେହିପରି ଅତିଥି ଭାବେ ଯୋଗଦେଇ ଆଇଆଇସି ହାଁସଦା ଉପସ୍ଥିତ ଛାତ୍ରୀଛାତ୍ରଙ୍କୁ କହିଥିଲେ, ଯାହା ପାଠରେ ସନ୍ଦେହ କରୁଛନ୍ତି ତାହା ତୁରନ୍ତ ବିଦ୍ୟାଳୟର ଶିକ୍ଷକଙ୍କୁ ପ୍ରଶ୍ନ ପଚାରନ୍ତୁ ଯଦି ଭୟ କିମ୍ବା ଲାଜରେ ପଚାରିବେନି ତେବେ ଜୀବନସାରା ଆପଣଙ୍କ ସନ୍ଦେହରେ ରହିଯିବ। ସେହିପରି ଛାତ୍ର ଆଉ ଶିକ୍ଷକଙ୍କ ମଧ୍ୟରେ ଦୂରତା ରହିଲେ ଛାତ୍ରୀଛାତ୍ରଙ୍କ ଶିକ୍ଷାର ବିକାଶ ହୋଇପାରିବନି। ତେଣୁ ସମସ୍ତେ ମିଶି ପିଲାଙ୍କ ପାଠ ଓ ଲୁକ୍କାୟିତ ପ୍ରତିଭାକୁ ଲୋକଲୋଚନ ଆଣିବାକୁ ଗୁରୁତ୍ୱ ଦେବାକୁ ଅନ୍ୟତମ ଅତିଥି ଅଜୟ ଜେନା ମତ ପ୍ରକାଶ କରିଥିଲେ।
ସେହିପରି ଅନ୍ୟତମ ଅତିଥି ଏବିଇଓ କହିଛନ୍ତି, ବାର୍ଷିକ ଉତ୍ସବକୁ ଛାତ୍ରୀଛାତ୍ର ଅପେକ୍ଷା କରିରହିଥାନ୍ତି ଏହି ଅବସରରେ ସେମାନଙ୍କ ପ୍ରତିଯୋଗିତା ହୁଏ ଓ କୃତି ଛାତ୍ରୀଛାତ୍ର ପୁରସ୍କାର ପାଇ ନିଜର ଦକ୍ଷତା ବୃଦ୍ଧି କରିଥାଏ ବୋଲି କହିଥିଲେ।
ଏହି ପରିପ୍ରେକ୍ଷୀରେ ବିଦ୍ୟାଳୟରେ ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। କୃତୀ ଛାତ୍ରୀଛାତ୍ରଙ୍କୁ ଅତିଥିମାନଙ୍କ ଦ୍ୱାରା ପୁରସ୍କାର, ମାନପତ୍ର ପ୍ରଦାନ କରାଯାଇଥିଲା। କାର୍ଯ୍ୟକ୍ରମ ଶେଷରେ ଛାତ୍ରୀଛାତ୍ରଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
