ଭୁବନେଶ୍ୱର,୧୯।୩: ଆଗମୀ ଦିନରେ ରାଜ୍ୟରେ ଗ୍ରୀଷ୍ମ ପ୍ରବାହ ବଢ଼ିବ। ଏ ନେଇ ପାଣିପାଗ ବିଭାଗ ପକ୍ଷରୁ ସତର୍କ କରାଯାଇଛି । ଏବେଠୁ ପ୍ରସ୍ତୁତ ହୁଅ । ସ୍କୁଲ ସମୟ ସାରଣୀରେ ପରିବର୍ତ୍ତନ କର । ଏପରି ନିର୍ଦ୍ଦେଶ ଦେଇଛନ୍ତି ସ୍ବତନ୍ତ୍ର ରିଲିଫ କମିଶନର । ସାଧାରଣ ନିର୍ବାଚନକୁ ଆଖିରେ ରଖି ଗ୍ରୀଷ୍ମ ପ୍ରବାହ ପଦକ୍ଷେପ ନେବାକୁ ସମସ୍ତ ଜିଲାପାଳଙ୍କୁ ସ୍ବତନ୍ତ୍ର ରିଲିଫ କମିଶନର ନିର୍ଦ୍ଦେଶ ଦେଇଛନ୍ତି ।
ଏଥିରେ ଗ୍ରୀଷ୍ମ ପ୍ରବାହ ପାଇଁ ଆବଶ୍ୟକ ପଦକ୍ଷେପ ସହ ପାନୀୟ ଜଳ ବ୍ୟବସ୍ଥାକୁ ଅଧିକ ଗୁରୁତ୍ୱ ଦିଆଯାଇଛି । ଅସ୍ଥାୟୀ ଆଶ୍ରୟସ୍ଥଳୀ, ସ୍କୁଲ ଓ ପବ୍ଲିକ ଶିକ୍ଷାନୁଷ୍ଠାନର ସମୟର ସାରଣୀରେ ପରିବର୍ତ୍ତନ କରାଯାଇଛି। ଉନ୍ନତମାନର ମେଡିକାଲ ଜରୁରୀକାଳୀନ ସେବା ଏବଂ ଜନତାଙ୍କ ସ୍ବାସ୍ଥ୍ୟକୁ ଅଧିକ ଗୁରୁତ୍ୱ ଦେବାକୁ କୁହାଯାଇଛି ।
ପ୍ରତିବର୍ଷ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ସକାଳୁଆ ସ୍କୁଲ କରାଯାଇଥାଏ । ସକାଳ ୭ଟାରୁ ୧୧ ମଧ୍ୟରେ ସ୍କୁଲ ହୁଏ । ଏପରିକି ଗତବର୍ଷ ଖରା ଲାଗି ରାଜ୍ୟ ସରକାର ବାଧ୍ୟ ହୋଇ ସ୍କୁଲ ଛୁଟି ଘୋଷଣା କରିଥିଲେ । ଚଳିତବର୍ଷ ମାର୍ଚ୍ଚ ପହିଲାରୁ ଟାଣ ଖରା ହେଲାଣି । ମାତ୍ର ଏଯାଏ ସକାଳୁଆ ସ୍କୁଲ ହୋଇନାହିଁ ।
ମାର୍ଚ୍ଚ ୧୫ରୁ ୨୦ ଯାଏ ସରକାରୀ ସ୍କୁଲରେ ପରୀକ୍ଷା ଚାଲିଥିବାରୁ ସକାଳ ୭ଟାରୁ ୧୧ଟା ଯାଏ ସ୍କୁଲ ଖୋଲାରହୁଛି । ମାତ୍ର ଅନ୍ୟ ବେସରକାରୀ ଓ ଘରୋଇ ସ୍କୁଲ ଏବେ ବି ଦିନ ସାରା ଖୋଲାଯାଉଛି, ୧୦ଟା ପରେ ପରୀକ୍ଷା ହେଉଛିି । ୨୦ ତାରିଖରେ ପରୀକ୍ଷା ଶେଷ ହେଲେ ପୁଣି ୧୦ଟାରୁ ସ୍କୁଲ ଆରମ୍ଭ ହେବ ବୋଲି ଶିକ୍ଷକମାନେ କହୁଛନ୍ତି । ଗରମରେ ପିଲାମାନେ କିପରି ପିବେ ତାହାକୁ ନେଇ ଅଭିଭାବକମାନେ ପ୍ରଶ୍ନ କରୁଛନ୍ତି।
