ଭୋପାଳ/ଅହମଦାବାଦ,୨୬।୭: କରୋନାର ଦ୍ୱିତୀୟ ଲହର ଦୁର୍ବଳ ହେବା ପରେ ରାଜ୍ୟଗୁଡ଼ିକରେ ପ୍ରାୟ ଦେଢ଼ବର୍ଷ ପରେ ସ୍କୁଲ ଖୋଲିଛି। ହିମାଚଳ ପ୍ରଦେଶ, ଗୁଜରାଟ, ମଧ୍ୟପ୍ରଦେଶ, ପଞ୍ଜାବ ଆଦି ରାଜ୍ୟଗୁଡ଼ିକରେ ଏକାଦଶ ଓ ଦ୍ୱାଦଶ ଶ୍ରେଣୀର ଛାତ୍ରୀଛାତ୍ରମାନଙ୍କ ପାଇଁ ସ୍କୁଲ ଖୋଲାଯାଇଛି। ସୋମବାର କରୋନା ଗାଇଡଲାଇନ୍ ଅନୁସାରେ ସ୍କୁଲ ଖୋଲାଯାଇଥିବା ବେଳେ ପିଲାଙ୍କ ତାପମାତ୍ରା ମାପି ଗେଟ୍ ଭିତରକୁ ପ୍ରବେଶ କରାଯାଇଥିଲା। କରୋନା କାଳରେ ସୋମବାର ମଧ୍ୟପ୍ରଦେଶ ସ୍ଥିତ ମଡେଲ ସ୍କୁଲକୁ ଦ୍ୱାଦଶ ଶ୍ରେଣୀର ପିଲାଙ୍କ ପାଇଁ ଖୋଲାଯାଇଛି। ସ୍କୁଲରେ ସମସ୍ତ ଛାତ୍ରୀଛାତ୍ରଙ୍କୁ ନିଆରା ଭାବେ ସ୍ବାଗତ କରାଯାଇଥିଲା। ପ୍ରଥମେ ପ୍ରତ୍ୟେକ ପିଲାଙ୍କ ତାପମାତ୍ରା ମପାଯାଇ ପାରମ୍ପରିକ ଭାବେ ମନ୍ତ୍ରୋଚ୍ଚାରଣ ସହ ସେମାନଙ୍କୁ ସ୍ବାଗତ କରାଯାଇଥିଲା। ଏଥିସହ ଶିକ୍ଷକମାନେ ସେମାନଙ୍କୁ ଉପହାରରେ ମାସ୍କ ଓ ସାନିଟାଇଜର ବଣ୍ଟନ କରିବା ସହ ତାଙ୍କ ଉପରେ ଫୁଲ ପକାଇ ସ୍କୁଲ ଭିତରକୁ ସ୍ବାଗତ କରିଥିବା ଦେଖିବାକୁ ମିଳିଛି।
ଏହାପରେ ପିଲମାନେ ସିଧାସଳଖ ଶ୍ରେଣୀ କକ୍ଷକୁ ଯାଇଥିଲେ, ଏବଂ ସେଠାରେ ସାମାଜିକ ଦୂରତ୍ୱ ରକ୍ଷା କରି ବସିଥିଲେ। ତେବେ କରୋନା ଗାଇଡ୍ଲାଇନ୍ ଅନୁସାରେ ବର୍ତ୍ତମାନ ସ୍କୁଲରେ ପ୍ରାର୍ଥନା ସଭା କି ଖେଳ ଛୁଟି ହେବ ନାହିଁ। ଫଳରେ ପିଲାମାନେ ନିଜ ଘରୁ ଟିଫିନ ଓ ପାଣି ବୋତଲ ଆଣିବେ। କିନ୍ତୁ ଏକାଠି ବସି କେହି କାହାର ଖାଦ୍ୟ ଖାଇପାରିବେ ନାହିଁ ବୋଲି ସ୍କୁଲ କର୍ତ୍ତୃପକ୍ଷ କହିଛନ୍ତି। ଅନ୍ୟପଟେ ମଧ୍ୟପ୍ରଦେଶରେ ଏକାଦଶ ଶ୍ରେଣୀର ପିଲାମାନେ ମଙ୍ଗଳବାର ଓ ଶୁକ୍ରବାର ସ୍କୁଲ ଆସିବେ ଏବଂ ଦ୍ୱାଦଶ ଶ୍ରେଣୀର ପିଲାମାନେ ସୋମାବର ଓ ଗୁରୁବାର ସ୍କୁଲ ଆସିବେ। ୫୦ ପ୍ରତିଶତ କ୍ଷମତାରେ ଉକ୍ତ ସ୍କୁଲ ଚାଲିବ ବୋଲି ସ୍କୁଲ କର୍ତ୍ତୃପକ୍ଷ କହିଛନ୍ତି। କୁହାଯାଉଛି, ଯଦି ସବୁ ଠିକ୍ଠାକ୍ ରୁହେ ତେବେ ଅଗଷ୍ଟ ୫ରୁ ନବମ ଓ ଦଶମ ଶ୍ରେଶୀର ପିଲାମାନେ ମଧ୍ୟ ସ୍କୁଲ ଆସିପାରିବେ। ସେହିପରି ୫୦ପ୍ରତିଶତ କ୍ଷମତାରେ ଗୁଜରାଟରେ ନବମରୁ ଏକାଦଶ ଶ୍ରେଣୀର ସ୍କୁଲ ଖୋଲାଯାଇଛି। ସ୍କୁଲକୁ ଆସୁଥିବା ପ୍ରତ୍ୟେକ ପିଲାମାନେ ନିଜ ଅଭିଭାବକଙ୍କ ସହମତିର ଏକ ଲିଖିତ ପତ୍ର ଆଣିବା ବାଧ୍ୟତାମୂଳକ। ଏଥିସହ ସ୍କୁଲରେ ସାମାଜିକ ଦୂରତ୍ୱ ରକ୍ଷା ପାଳନ କରିବା ଜରୁରୀ। ସ୍କୁଲ ଖୋଲିବା ପରେ ପିଲାଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି। ଅନ୍ୟପଟେ ସ୍କୁଲ ଖୋଲିବା ପରେ ବି ଯେଉଁ ଛାତ୍ରୀଛାତ୍ରମାନେ ଆସିବାକୁ ଚାହଁୁନାହାନ୍ତି ସେମାନଙ୍କ ପାଇଁ ଅନ୍ଲାଇନ୍ କ୍ଲାସର ମଧ୍ୟ ବ୍ୟବସ୍ଥା କରାଯାଇଛି।
