ଜମନକିରା, ୨୨।୮ (ରବିନ୍ଦ୍ର ପ୍ରସାଦ ଦାନୀ): ରାଜ୍ୟ ସରକାର ଶିକ୍ଷା ବ୍ୟବସ୍ଥାର ଉନ୍ନତିକରଣ ତଥା ବିଦ୍ୟାଳୟ ରୂପାନ୍ତରଣ ପାଇଁ କୋଟି କୋଟି ଟଙ୍କା ବ୍ୟୟ କରୁଥିବା ବେଳେ ଗ୍ରାମାଞ୍ଚଳରେ ଏହାର ବାସ୍ତବ ଚିତ୍ର ଅତ୍ୟନ୍ତ ନୈରାଶ୍ୟଜନକ ହୋଇପଡ଼ିଛି।
ସମ୍ବଲପୁର ଜିଲା ଜମନକିରା ବ୍ଲକ ଅନ୍ତର୍ଗତ କସଡ଼ା ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ ଏବେ ଶ୍ରେଣୀକୋଠରିର ଘୋର ଅଭାବ ସାଙ୍ଗକୁ ବିଦ୍ୟୁତ ସମସ୍ୟା ଯୋଗୁ ଛାତ୍ରୀଛାତ୍ରଙ୍କ ପାଠପଢ଼ା ଗୁରୁତର ଭାବେ ପ୍ରଭାବିତ ହେଉଛି। ଏହି ବିଦ୍ୟାଳୟରେ ପ୍ରଥମ ଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ପ୍ରାୟ ୧୮୩ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ମାତ୍ର ଛାତ୍ରୀଛାତ୍ରଙ୍କ ସଂଖ୍ୟା ଅନୁପାତରେ ପର୍ଯ୍ୟାପ୍ତ ଶ୍ରେଣୀ କୋଠରୀ ନଥିବାରୁ ସେମାନେ ବସି ପାଠ ପଢ଼ିବା ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଯେଉଁ କେତୋଟି କୋଠରୀ ରହିଛି, ସେଗୁଡ଼ିକର ଅବସ୍ଥା ମଧ୍ୟ ଅତ୍ୟନ୍ତ ଜରାଜୀର୍ଣ୍ଣ। ରକ୍ଷଣାବେକ୍ଷଣ ଅଭାବରୁ କାନ୍ଥରୁ ଚୂନ ଓ ପଲସ୍ତର ଖସି ନଷ୍ଟ ହେବାକୁ ବସିଛି। ଆହୁରି ଚିନ୍ତାଜନକ ବିଷୟ ହେଉଛି, ଉପଲବ୍ଧ କୋଠରି ମଧ୍ୟରୁ କେତେକ ଏବେ ପାଠପଢ଼ା ପରିବର୍ତ୍ତେ ‘ଗୋଦାମ ଘର’ରେ ପରିଣତ ହୋଇଛି। କେଉଁଠି ମଧ୍ୟାହ୍ନ ଭୋଜନର ଚାଉଳ ବସ୍ତା ଜମା ହୋଇ ରହିଛି, ତ ଆଉ କେଉଁଠି ପୁରୁଣା ଭଙ୍ଗା ଟେବୁଲ, ଚେୟାର, ବେଞ୍ଚ ଓ ଅନ୍ୟାନ୍ୟ ଅଦରକାରୀ ସାମଗ୍ରୀ ଗଦା ହୋଇ ପଡ଼ିରହିଛି। ଫଳରେ ଶିକ୍ଷାଦାନ ପରିବେଶ ବାଧାପ୍ରାପ୍ତ ହେଉଛି।
ଅନ୍ୟପକ୍ଷରେ, ବିଦ୍ୟାଳୟରେ ନିୟମିତ ବିଦ୍ୟୁତ ସରବରାହ ନଥିବା ଯୋଗୁ ପ୍ରବଳ ଗରମ ଓ ଗୁଳୁଗୁଳିରେ ଛାତ୍ରୀଛାତ୍ର କଲବଲ ହେଉଛନ୍ତି। ଏହି ସମସ୍ୟାରୁ ପିଲାମାନଙ୍କୁ ଆଶ୍ୱସ୍ତି ଦେବା ସହ ପଙ୍ଖା, ଲାଇଟ୍ ଓ ମୋଟର ଯୋଗେ ପିଇବା ପାଣିର ବ୍ୟବସ୍ଥା କରିବା ପାଇଁ ଶିକ୍ଷକ-ଶିକ୍ଷୟିତ୍ରୀମାନେ ନିଜ ପକେଟରୁ ତେଲ ଖର୍ଚ୍ଚ ବହନ କରି ପ୍ରତିଦିନ ଜେନେରେଟର ଚଳାଉଛନ୍ତି। ଶିକ୍ଷକମାନଙ୍କର ଏହି ନିସ୍ୱାର୍ଥପର କର୍ତ୍ତବ୍ୟନିଷ୍ଠା ପ୍ରଶଂସନୀୟ ହୋଇଥିଲେ ହେଁ, ଏହା ପ୍ରଶାସନର ଉଦାସୀନତାକୁ ମଧ୍ୟ ସ୍ପଷ୍ଟ କରୁଛି।
ଏହି ସମସ୍ତ ସମସ୍ୟା ସମ୍ପର୍କରେ ବିଦ୍ୟାଳୟ ପରିଚାଳନା କମିଟି ତଥା ସ୍କୁଲ କର୍ତ୍ତୃପକ୍ଷ ବାରମ୍ବାର ଜିଲା ଶିକ୍ଷା ଅଧିକାରୀ ଏବଂ ସ୍ଥାନୀୟ ବ୍ଲକ ପ୍ରଶାସନକୁ ଲିଖିତ ଓ ମୌଖିକ ଭାବେ ଅବଗତ କରାଇ ଆସୁଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଫଳପ୍ରଦ ପ୍ରତିକାର ବ୍ୟବସ୍ଥା ଗ୍ରହଣ କରାଯାଇ ନ ଥିବାରୁ ଅଭିଭାବକ ଓ ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ତେବେ ଏ ସଂକ୍ରାନ୍ତରେ ସମ୍ବଲପୁର ଜିଲା ଶିକ୍ଷା ଅଧିକାରୀ ଲକ୍ଷ୍ମଣ ଭୋଇଙ୍କ ସହ ଯୋଗାଯୋଗ କରି ପଚାରିବାରୁ ସେ ବିଦ୍ୟାଳୟର ସମସ୍ୟା ଉପରେ ଗୁରୁତ୍ୱ ଦେଇ ଖୁବ୍ଶୀଘ୍ର ଏହାର ସମାଧାନ ତଥା ଉପଯୁକ୍ତ ପ୍ରତିକାର ବ୍ୟବସ୍ଥା ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି।
ଛାତ୍ରଛାତ୍ରୀଙ୍କ ସୁରକ୍ଷା, ସୁବିଧା ଓ ଶିକ୍ଷାର ମାନ ବୃଦ୍ଧି ପାଇଁ ପ୍ରଶାସନ କେତେ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରୁଛି, ତାହା ଏବେ ଦେଖିବାକୁ ବାକି ରହିଲା।
