ନୂଆଦିଲ୍ଲୀ,୧୭।୧: କେନ୍ଦ୍ର ସରକାର ଓ ଚାଷୀଙ୍କ ମଧ୍ୟରେ ଜାରି ରହିଥିବା ଅଚଳାବସ୍ଥା ଦୂର କରିବା ଲାଗି ସୁପ୍ରିମକୋର୍ଟଙ୍କ ଦ୍ୱାରା ଗଠିତ କମିଟିର ପ୍ରଥମ ବୈଠକ ପୁସା କ୍ୟାମ୍ପସଠାରେ ଆସନ୍ତା ୧୯ ତାରିଖରେ ଅନୁଷ୍ଠିତ ହେବ। ଏ ନେଇ କମିଟିର ଜଣେ ସଦସ୍ୟ ଅନୀଲ ଘନଓ୍ବାତ୍ ରବିବାର ସୂଚନା ଦେଇଛନ୍ତି।
ପ୍ରାୟ ଦୁଇ ମାସ ହେଲା ଚାଷୀମାନେ ବିରୋଧ କରୁଥିବା ୩ ନୂଆ କୃଷି ଆଇନର କାର୍ଯ୍ୟକାରୀତା ଉପରେ ଗତ ୧୧ ତାରିଖରେ ସୁପ୍ରିମକୋର୍ଟ ସ୍ଥଗିତଦେଶ ଜାରି କରିଥିଲେ। ଏହାର ସମାଧାନ ପାଇଁ ମାନ୍ୟବର କୋର୍ଟ ଗଠନ କରିଥିଲେ ୪ ଜଣିଆ କମିଟି। ଗତ ସପ୍ତାହରେ କମିଟିରୁ ଓହରି ଯାଇଥିଲେ ଅନ୍ୟତମ ସଦସ୍ୟ ତଥା ଭାରତୀୟ କିଷାନ ୟୁନିୟନ ସଭାପତି ଭୁପିନ୍ଦର ସିଂ ମନ୍ନ। ଏବେ ଘନଓ୍ବାତ୍ଙ୍କ ବ୍ୟତୀତ ଏଗ୍ରିକଲଚର ଇକୋନୋମିଷ୍ଟ ଅଶୋକ ଗୁଲହାଟି ଓ ପ୍ରମୋଦ କୁମାର ଜୋଶୀ କମିଟିର ଅନ୍ୟ ଦୁଇ ସଦସ୍ୟ।
ଆମେ ୧୯ ତାରିଖରେ ପୁସା କ୍ୟାମ୍ପସଠାରେ ସାକ୍ଷାତ୍ କରିବୁ। କେବଳ ସଦସ୍ୟମାନେ ହିଁ କମିଟିର ଭବିଷ୍ୟତ କାର୍ଯ୍ୟକାରିତା ନିର୍ଦ୍ଧାରିତ କରିବେ। ଜଣେ ସଦସ୍ୟ କମିଟିରୁ ଓହରି ଯାଇଛନ୍ତି। ଯଦି ସୁପ୍ରିମକୋର୍ଟ ନୂଆ ସଦସ୍ୟ ନିଯୁକ୍ତ ନ କରନ୍ତି, ତେବେ କମିଟିର ଅନ୍ୟ ସଦସ୍ୟମାନେ କାର୍ଯ୍ୟ ଜାରି ରଖିବେ ବୋଲି ଶେତ୍କାରୀ ସଂଗଠନ (ମହାରାଷ୍ଟ୍ର) ମୁଖ୍ୟ ଘନଓ୍ବାତ୍ କହିଛନ୍ତି।
