ଯାଜପୁର ଅଫିସ,୧ା୫: ଯାଜପୁର ଜିଲା ବଡ଼ଚଣା ବ୍ଲକ ଓଲରାସ୍ଥିତ ସାବିତ୍ରୀ ଇଣ୍ଡଷ୍ଟ୍ରିଜ ପ୍ରାଇଭେଟ ଲିଃ ଓ ମୟୂରଭଞ୍ଜ ଜିଲା କରଞ୍ଜିଆସ୍ଥିତ ସାବିତ୍ରୀ ରାଇସ୍ ଇଣ୍ଡଷ୍ଟ୍ରିଜ ପ୍ରାଇଭେଟ ଲିଃ ଉପରେ ସାର୍ଟିଫିକେଟ ମାମଲା ଚୂଡ଼ାନ୍ତ ହୋଇ ପାରିନାହିଁ। ଯାଜପୁର ଜିଲା ଯୋଗାଣ ଅଧିକାରୀ(ସିଏସ୍ଓ) ସଲାଉଦ୍ଦିନ ଖାନଙ୍କ ରିପୋର୍ଟ ଆଧାରରେ ହଡ଼ପ ୩ କୋଟି ୧୨ ଲକ୍ଷ ୪୦ ହଜାର ୭୪୪ ଟଙ୍କା ମଧ୍ୟରୁ ଏଯାଏ ୮୬ ଲକ୍ଷ ୯୦ ହଜାର ୭୩୫ ଟଙ୍କା ଦାଖଲ କରାଯାଇନାହିଁ। ତେବେ ଏଥିରେ ସମ୍ପୃକ୍ତ କେତେଜଣ ଅଧିକାରୀଙ୍କୁ ୭ ବର୍ଷ ହେଲା ବିଭାଗୀୟ ସୁରକ୍ଷା ଦିଆଯାଇ କେବଳ ଡିପାର୍ଟମେଣ୍ଟାଲ ପ୍ରୋସିଡିଂରେ କାର୍ଯ୍ୟାନୁଷ୍ଠାନ ସୀମିତ ରଖାଯାଇଛି।
ସିଏସ୍ଓଙ୍କ ରିପୋର୍ଟ ଅନୁସାରେ ୨୦୧୫-୧୬ ବର୍ଷରେ ଯାଜପୁର ଏବଂ କେନ୍ଦୁଝର ଜିଲାରେ ଥିବା ସାବିତ୍ରୀ ରାଇସ୍ ମିଲରେ ସମୁଦାୟ ୪ କୋଟି ୪ ଲକ୍ଷ ୨୪ ହଜାର ୩୯୩ ଟଙ୍କାର ଚାଉଳ ହରିଲୁଟ ହୋଇଥିବା ଅଡିଟରେ ଧରାପଡିଥିଲା। ତେବେ ସିକ୍ୟୁରିଟି ଡିପୋଜିଟ, ଅସୁଲି ଅର୍ଥ ଆଦିକୁ ମିଶାଇବା ପରେ ୩ କୋଟି ୮ ଲକ୍ଷ ୯୪୨ ଟଙ୍କା ସାବିତ୍ରୀ ରାଇସ ମିଲକୁ ଦାଖଲ କରିବାକୁ ଥିଲା। କେତେଜଣ ବିଭାଗୀୟ ଅଧିକାରୀଙ୍କ ସହ ମିଶି ଉପରୋକ୍ତ ସରକାରୀ ଅର୍ଥକୁ ଆତ୍ମସାତ୍ କରିବାକୁ ମିଳିମିଶି ଉଦ୍ୟମ କରାଯାଇଥିଲା। କିନ୍ତୁ ଅଡିଟ ରିପୋର୍ଟରେ ଧରାପଡିବା ପରେ ସାବିତ୍ରୀ ରାଇସ ମିଲର ମାଲିକଙ୍କ ନାମରେ ସାର୍ଟିଫିକେଟ କେଶ ସହ ସିଆଇଡି, କ୍ରାଇମବ୍ରାଞ୍ଚରେ ୪୦୯ପିସି/୧୭ା୮ା୨୦୧୭ରେ ଏକ ମାମଲା ରୁଜୁ ହୋଇଥିଲା। ତେବେ ସରକାରୀ ଅର୍ଥ ବାଟମାରଣା ଏବଂ ଦୁର୍ନୀତି ପ୍ରମାଣ ହେବା ପରେ ମାଲିକଙ୍କୁ ଜେଲଦଣ୍ଡ ସହ ଆତ୍ମସାତ୍ ଟଙ୍କା କିସ୍ତି ଅନୁସାରେ ଚଣ୍ଡିଖୋଲ ଜେଏମ୍ଏଫ୍ସି କୋର୍ଟରେ ଦାଖଲ କରିବାକୁ ନିର୍ଦ୍ଦେଶ ହୋଇଥିଲା। ତେବେ ଏହି ମହାଦୁର୍ନୀତିରେ ସମ୍ପୃକ୍ତ ଏସିଏସ୍ଓ ପ୍ରହ୍ଲାଦ ସେଠୀ ଓ ମାର୍କେଟିଂ ଇନ୍ସପେକ୍ଟର(ଏମ୍ଆଇ) ବିଶ୍ୱଜିତ ମିଶ୍ରଙ୍କୁ ୭ ବର୍ଷ ହେଲା ବିଭାଗୀୟ ସୁରକ୍ଷା ଯୋଗାଇ ଦିଆଯାଇ ମାତ୍ର ଡିପାର୍ଟମେଣ୍ଟାଲ ପ୍ରୋସିଡିଂରେ କାର୍ଯ୍ୟାନୁଷ୍ଠାନ ସୀମିତ ରହିଛି। ନିଗମର ଉପରୋକ୍ତ କ୍ଷତି ଟଙ୍କା ପାଇଁ ସାବିତ୍ରୀ ଇଣ୍ଡଷ୍ଟ୍ରିଜ ଏବଂ ଯାଜପୁରଠାରୁ ମୟୁରଭଞ୍ଜ ପର୍ଯ୍ୟନ୍ତ ବେଆଇନ ଧାନ ପରିବହନରେ ଦାୟୀ ଅଧିକାରୀଙ୍କ ବିରୋଧରେ କ’ଣ କାର୍ଯ୍ୟାନୁଷ୍ଠାନ ନିଆଯାଇଅଛି ସେ ସଂକ୍ରାନ୍ତରେ ବିଭାଗୀୟ ଜବାବ୍ ତଲବ ହେଉଥିଲେ ହେଁ କିଛି ସୁଫଳ ମିଳି ପାରିନାହିଁ। କୌଣସି ଏକ ଅଦୃଶ୍ୟ ଶକ୍ତି ବଳରେ ଏହି ଦୁର୍ନୀତିକୁ ପରୋକ୍ଷରେ ସହଯୋଗ କରିଥିବା ଅଧିକାରୀଙ୍କୁ ଏକ ପ୍ରକାର ପୁରସ୍କୃତ କରାଯାଇଥିବା ମତପ୍ରକାଶ ପାଇଛି।
ସିଏସ୍ଓଙ୍କ ରିପୋର୍ଟ ଅନୁଯାୟୀ, ୨୦୧୫-୧୬ ଧାନ ସଂଗ୍ରହ ବର୍ଷରେ ସାବିତ୍ରୀ ଇଣ୍ଡଷ୍ଟ୍ରିଜକୁ ୬୨୨୩୯.୫୧ କୁଇଣ୍ଟାଲ ଧାନ ଚାଉଳ ମିଲିଂ ପାଇଁ ଦିଆଯାଇଥିଲା ା ଜିଲାର ପିଡିଏସ, ଅନ୍ତ୍ୟୋଦୟ, ଏମଡିଏମ୍ ଆଦି ହିତାଧିକାରୀଙ୍କୁ ବଣ୍ଟନ କରିବାକୁ ନିର୍ଦ୍ଧାରିତ ସମୟରେ ୪୨୩୨.୨୮୬ ମେଟ୍ରିକ ଟନ୍ ଚାଉଳ ଦାଖଲ କରିବା କଥା ା କିନ୍ତୁ ମାତ୍ର ୧୪,୮୨୪.୦୮ କୁଇଣ୍ଟାଲ ଚାଉଳ ଦାଖଲ କରିଥିଲା। ଏହାବାଦ୍ ମୟୁରଭଞ୍ଜ ଜିଲା କରଞ୍ଜିଆ ସାବିତ୍ରୀ ରାଇସ ମିଲକୁ ୪୦,୨୩୯.୫୧ କୁଇଣ୍ଟାଲ ଧାନ ପରିବହନ ହୋଇଥିଲା ା ତଦନୁସାରେ କରଞ୍ଜିଆ ମିଲରୁ ୨୭୩୬୨.୮୭ କୁଇଣ୍ଟାଲ ଚାଉଳ ଦାଖଲ ପ୍ରଶାସନ ନିକଟରେ ଦାଖଲ ହେବାର ନିୟମ ରହିଛି। କିନ୍ତୁ ମାତ୍ର ୯,୫୭୮.୦୪ କୁଇଣ୍ଟାଲ ଚାଉଳ କରଞ୍ଜିଆ ମିଲରୁ ଦାଖଲ ହୋଇଥିଲା। ବାକି ୧୭,୭୮୪.୮୩ କୁଇଣ୍ଟାଲ ଚାଉଳ ଦାଖଲରେ ଅନିୟମିତତା ହୋଇଥିଲା। ଇତିମଧ୍ୟରେ ମିଲ ମାଲିକ ଦିଲ୍ଲୀପ କୁମାର ଅଗ୍ରୱାଲ ୨ କୋଟି ୨୫ ଲକ୍ଷ ୫୦ ହଜାର ୯ ଟଙ୍କା କିସ୍ତି ଅନୁସାରେ ଦାଖଲ କରି ସାରିଛନ୍ତି। ହେଲେ ଏହି ଦୁର୍ନୀତିରେ ସମ୍ପୃକ୍ତ ଅଧିକାରୀମାନେ ଆରାମରେ ବିଭାଗୀୟ ପଦପଦବୀରେ ଅଧିଷ୍ଠିତ ରହି ଏବେ ବି ଚାଉଳ ଯୋଗାଣରେ ମିଲ୍ ମାଲିକମାନଙ୍କ ସହ ମିଶି ଅନିୟମିତତା କରୁଥିବା ଅଭିଯୋଗ ହେଉଛି।
ଏ ସଂକ୍ରାନ୍ତରେ ଯାଜପୁର ସିଏସ୍ଓ ସଲାଉଦ୍ଦିନ ଖାନଙ୍କ ମତାମତ ନେବାକୁ ତାଙ୍କ ମୋବାଇଲ ଫୋନ୍କୁ ରବିବାର ରାତି ପ୍ରାୟ ୭ ଟା ୫୮ ମିନିଟରେ ଯୋଗାଯୋଗ କରିଥିଲେ ହେଁ ସେ ଫୋନ କଲ ଗ୍ରହଣ କରି ନ ଥିଲେ।
