ଯାଜପୁର ଅଫିସ/କଳିଙ୍ଗନଗର (ଡି.ଏନ.ଏ.), ୧।୯: ଯାଜପୁରର ପର୍ବତାରୋହୀ ସତ୍ୟବ୍ରତ ଦାସ ମଙ୍ଗଳବାର ଉତ୍ତରାଖଣ୍ଡର ସାତୋପନ୍ଥ ପର୍ବତ ଶିଖରରେ ପହଞ୍ଚି ଏକ ବିରଳ ସଫଳତା ହାସଲ କରିଛନ୍ତି। ଇଣ୍ଡିଆନ୍ ମାଉଣ୍ଟେନିୟରିଂ ଫାଉଣ୍ଡେଶନ୍ ପକ୍ଷରୁ ଏକ ୮ ଜଣିଆ ପର୍ବତାରୋହୀ ଦଳ ଗତ ୧୦ ତାରିଖରୁ ଅଭିଯାନ ଆରମ୍ଭ କରିଥିଲେ। ଏଥିରେ ୫ ଜଣ ସଫଳତା ପାଇଥିବାବେଳେ ସେଥିମଧ୍ୟରୁ ଯାଜପୁର ଜିଲା ଦାନଗଦି ବ୍ଲକ କୁମ୍ଭୀରଗାଡ଼ିଆ ଗ୍ରାମର ସତ୍ୟବ୍ରତ ଦାସ ଅନ୍ୟତମ। ତାଙ୍କ କହିବା ଅନୁସାରେ ସମୁଦ୍ର ପତ୍ତନଠାରୁ ୭୦୭୫ ମିଟର୍ ଉଚ୍ଚରେ ଥିବା ସାତୋପନ୍ଥ ପର୍ବତାରୋହଣ ଅଭିଯାନ ବହୁତ କଷ୍ଟକର। ବେଳେ ବେଳେ ତାପମାତ୍ରା ମାଇନସ(-)୩୦ ଡିଗ୍ରୀ ସେଲ୍ସିୟସ୍ରେ ପହଞ୍ଚି ଯାଉଥିଲା। ଯାହାକି ଅସହ୍ୟ ହେଉଥିଲା। ଆଗକୁ ବଢ଼ିବା ଲାଗି ଅନେକ ସମୟରେ ଜଟିଳ ପଦ୍ଧତି ବ୍ୟବହାର କରିବାକୁ ପଡୁଥିଲା। କିନ୍ତୁ ଦୃଢ ମନୋବଳ ସଫଳତା ଦେଇଛି। ମୋର ବିଶ୍ୱାସ ରହିଛି ଆହୁରି ଉଚ୍ଚ ପର୍ବତ ଆରୋହଣ ପାରି ପାରିବି। ପର୍ବତ ଶୀର୍ଷରେ ପହଞ୍ଚି ଜାତୀୟ ପତାକା ଉଡ଼ାଇବା ଅତ୍ୟନ୍ତ ଆମୋଦଦାୟକ ଥିଲା।
ଟାଟା ଷ୍ଟିଲ୍ ଫାଉଣ୍ଡେଶନ୍ ସହଯୋଗରେ ସତ୍ୟବ୍ରତ ଟାଟା ଷ୍ଟିଲ୍ ଆଡ୍ଭେନ୍ଚର ଫାଉଣ୍ଡେଶନ୍ (ଟିଏସ୍ଏଏଫ୍)ଠାରେ ଉଭୟ ମୌଳିକ ଓ ଉନ୍ନତ ପର୍ବତାରୋହଣ ପାଠ୍ୟକ୍ରମ ସମାପ୍ତ କରିଛନ୍ତିି। ଏହାସହିତ ସେ ଫାଉଣ୍ଡେଶନ୍ ସହାୟତାରେ ପୂର୍ବରୁ ବହୁ ସଂଖ୍ୟକ ପର୍ବତାରୋହଣ ଅଭିଯାନରେ ଅଂଶଗ୍ରହଣ କରିଛନ୍ତି। ଟାଟା ଷ୍ଟିଲ୍ ଫାଉଣ୍ଡେଶନ୍ର ଉଦ୍ୟମରେ କଳିଙ୍ଗନଗର ପାର୍ଶ୍ୱବର୍ତ୍ତୀଅଞ୍ଚଳର ବହୁ ଯୁବବର୍ଗ ପର୍ବତାରୋହଣକୁ ଗୁରୁତ୍ୱ ସହ ଗ୍ରହଣ କରିଛନ୍ତି। ୨୦୦୯ ପ୍ରାରମ୍ଭରେ ଫାଉଣ୍ଡେଶନ୍ ପକ୍ଷରୁ ଯାଜପୁରର ଯୁବବର୍ଗଙ୍କୁ ପର୍ବତାରୋହଣ ସମ୍ପର୍କିତ କାର୍ଯ୍ୟକ୍ରମରେ ସାମିଲ ହେବା ଲାଗି କୁହାଯାଇଥିଲା। ସେବେଠାରୁ ଟିଏସ୍ଏଏଫ୍ ଜରିଆରେ ଏହି ଅଞ୍ଚଳର ୧୦୦୦ରୁ ଊର୍ଦ୍ଧ୍ୱ ଯୁବବର୍ଗଙ୍କୁ ବିଭିନ୍ନ ପ୍ରକାର ପର୍ବତାରୋହଣ ପାଠ୍ୟକ୍ରମ ଉପରେ ପ୍ରଶିକ୍ଷଣ ଦିଆଯାଇଛି। ସମଭାବାପନ୍ନ ଯୁବବର୍ଗଙ୍କ ସହ ସତ୍ୟବ୍ରତ ଓ ତାଙ୍କର କେତେଜଣ ବନ୍ଧୁ ମିଳିତ ଭାବେ କଳିଙ୍ଗନଗର ମାଉଣ୍ଟେରିଂ ଗ୍ରୁପ୍ ଗଠନ କରିଛନ୍ତି। ଯାହା ନିୟମିତ ଭାବେ ଜିଲାର ନିକଟତମ ପାହାଡ଼ଗୁଡ଼ିକରେ ପର୍ବତାରୋହଣ ଅଭିଯାନ ଆୟୋଜନ କରୁଛି । ସ୍ଥାନୀୟ ଯୁବବର୍ଗଙ୍କ ମଧ୍ୟରେ ପର୍ବତାରୋହଣକୁ ନେଇ ସଚେତନତା ସୃଷ୍ଟି କରାଯାଉଛି ।
