ମୁମ୍ବାଇ: ବଲିଉଡ ଅଭିନେତା ତଥା ନିର୍ଦ୍ଦେଶକ ସତିଶ କୌଶିକଙ୍କ ପରଲୋକ ହୋଇଛି । ଅନୁପମ ଖେର ଟୁଇଟ କରି ଏହି ସୂଚନା ଦେଇଛନ୍ତି । ମାତ୍ର ୬୬ ବର୍ଷ ବୟସରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ହୃଦଘାତ ଯୋଗୁ ତାଙ୍କର ମୃତ୍ୟୁ ହୋଇଛି । ସତିଶଙ୍କ ନିକଟତମ ବନ୍ଧୁ ଅନୁପମ ଖେର ସୋସିଆଲ ମିଡିଆରେ ପୋଷ୍ଟ ଶେୟାର କରି ଏହି ସୂଚନା ଦେଇଛନ୍ତି । ତାଙ୍କ ସହ ଏକ ଫଟୋ ଶେୟାର କରି ଅନୁପମ ଲେଖିଛନ୍ତି, ଜାଣିଛି ‘ମୃତ୍ୟୁ ହିଁ ବିଶ୍ୱର ଶେଷ ସତ୍ୟ’ ।
ଅନୁପମ ଖେର ଟୁଇଟ କରି ଲେଖିଛନ୍ତି, ସେ ତାଙ୍କର ସବୁଠାରୁ ପ୍ରିୟ ବନ୍ଧୁଙ୍କୁ ହରାଇଲେ । ଏହାସହ ସେ ଲେଖିଛନ୍ତି, ମୁଁ ଜାଣିଛି ମୃତ୍ୟୁ ହିଁ ବିଶ୍ୱର ଶେଷ ସତ୍ୟ, ହେଲେ ଏକଥା ମୁଁ ବଞ୍ଚିଥିବା ଅବସ୍ଥାରେ ମୋର ପ୍ରିୟ ବନ୍ଧୁ ସତିଶ କୌଶିକଙ୍କ ପାଇଁ ଲେଖିବି ତାହା କେବେ ଭାବି ନ ଥିଲି । ୪୫ ବର୍ଷର ବନ୍ଧୁତାରେ ହଠାତ୍ ବିରାମ!! Life will NEVER be the same without you SATISH ! ଓମ ଶାନ୍ତି!
ଅନୁପମ ଖେରଙ୍କ ସୂଚନା ଅନୁଯାୟୀ, ସତିଶ କୌଶିକଙ୍କ ମର ଶରୀର ଏବେ ଗୁଡଗାଓଁର ଫୋର୍ଟିଜ ହସ୍ପିଟାଲରେ ରଖାଯାଇଛି । ପୋଷ୍ଟମର୍ଟମ ପରେ ଗୁରୁବାର ଦ୍ୱିପ୍ରହରରେ ମୁମ୍ବାଇ ସ୍ଥିତ ତାଙ୍କ ଘରକୁ ଅଣାଯିବ । ଏହାପରେ ସେହିଠାରେ ତାଙ୍କର ଅନ୍ତିମ ସଂସ୍କାର କରାଯିବ । ସୂଚନା ଅନୁଯାୟୀ, ସତିଶ କୌଶିକ କାହାସହ ସାକ୍ଷାତ୍ କରିବାକୁ ଗୁଡଗାଓଁ ଯାଇଥିବା ବେଳେ କାରରେ ତାଙ୍କୁ ହାର୍ଟ ଆଟାକ ଆସିଥିଲା । ପରେ ତାଙ୍କୁ ଫୋର୍ଟିଜ ହସ୍ପିଟାଲରେ ଭର୍ତ୍ତି କରାଯାଇଥିଲା ।
