ଜଗତ୍ସିଂହପୁର, ୨୨ା୪(ପ୍ରମୋଦ କୁମାର ନାୟକ):ଜଗତ୍ସିଂହପୁର ଥାନା ଅନ୍ତର୍ଗତ କାଠିଆପଡ଼ା ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଏହି ଗାଁର ପ୍ରମୋଦ ଦାସ ଓ ଲକ୍ଷ୍ମୀପ୍ରିୟା ଦାସଙ୍କ ଝିଅ ସସ୍ମିତା ଓରଫ ଡଲି ଦାସ (୨୪)ଙ୍କୁ ଜଗତ୍ସିଂହପୁର-ବାଲିକୁଦା ରାସ୍ତାର ପାକନପୁର ୱେର ହାଉସ ନିକଟ ରାସ୍ତା ପାର୍ଶ୍ୱ ଏକ ବିଲ୍ଡିଂ ପଛ ବିଲରେ କୌଣସି ବ୍ୟକ୍ତି ନିର୍ମମ ଭାବେ ହତ୍ୟା କରି ଫିଙ୍ଗି ଦେଇଥିବା ସୂଚନା ମିଳିଛି। ଯୁବତୀଙ୍କ ବାପାଙ୍କ ଅଭିଯୋଗ ଆଧାରରେ ଜଗତ୍ସିଂହପୁର ଥାନାରେ ମାମଲା (ନଂ. ୩୩୯/୨୬) ରୁଜୁ କରାଯାଇ ପୋଲିସ ତଦନ୍ତ ଆରମ୍ଭ କରିଛି। ପ୍ରେମଜନିତ କାରଣରୁ ଏହି ହତ୍ୟାକାଣ୍ଡ ଘଟିଥିବା ନେଇ ପ୍ରାଥମିକ ତଦନ୍ତରୁ ଜଣାପଡ଼ିଛି ବୋଲି ଆଇଆଇସି ସୁଶାନ୍ତ ସାହୁ କହିଛନ୍ତି।
ଯୁବତୀଜଣକ ଏକ ଗୋଲାପୀ ରଙ୍ଗର ବାନିଅନ ଓ ଆକାଶ ରଙ୍ଗର ଫୁଲ ପ୍ୟାଣ୍ଟ ପିନ୍ଧିଥିବା ବେଳ ପାଦରେ ଅଳତା ଚିହ୍ନ ରହିଛି। ସେ ପିନ୍ଧିଥିବା ସ୍ପଞ୍ଜ ଚପଲ ନିକଟରେ ପଡିଛି। ତାଙ୍କ ଗୋଡ଼ ପାଖରୁ ଏକ ଗାମୁଛା ମିଳିଛି। ଏଥିସହ ଦୁଇହାତରେ ମୁଦିଥିବା ଦେଖିବାକୁ ମିଳିଛି। ରବିବାର ତାଙ୍କର ନିର୍ବନ୍ଧ ହୋଇଥିଲା। ସୋମବାର ରାତିରୁ ସେ ନିଖୋଜ ଥିଲେ। ପରିବାର ଲୋକେ ବହୁ ଖୋଜାଖୋଜି କଲାପରେ ବି ପାଇ ନ ଥିଲେ। ମଙ୍ଗଳବାର ତାଙ୍କର ମୃତଦେହ ଠାବ କରାଯାଇଛି। ମୁହଁରେ କଳା ଦାଗ ସାଙ୍ଗକୁ ବାମ ହାତକୁ କୌଣସି ଜନ୍ତୁ ଖାଇ ଦେଇଥିବା ଅନୁମାନ କରାଯାଉଛି। କୌଣସି ବ୍ୟକ୍ତି ମାରଣାସ୍ତ୍ରରେ ଆକ୍ରମଣ କରି ହତ୍ୟା କରିଥିବାରୁ ଶରୀରର ବିଭିନ୍ନ ସ୍ଥାନରେ କ୍ଷତ ଓ ରକ୍ତ ଛିଟା ପଡିଛି। ଅଧିକ ତଦନ୍ତ ପରେ ହତ୍ୟା କାଣ୍ଡର କାରଣ ସ୍ପଷ୍ଟ ହେବ ବୋଲି ଆଇଆଇସି ସାହୁ କହିଛନ୍ତି।