ହାଟଡିହୀ,୭ା୯(ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡିହୀ ବ୍ଲକ ପନ୍ଦାଡୋ ପଞ୍ଚାୟତ ସରପଞ୍ଚ ସସ୍ମିତା ଓଝା ଏବଂ କାର୍ଯ୍ୟନିର୍ବାହୀ ଅଧିକାରୀ(ପିଇଓ)ଭାବେ ଉର୍ମିଳା ମୁର୍ମୁ ଦାୟିତ୍ୱ ତୁଲାଉଛନ୍ତି। ତେବେ ପିଇଓ ମୁର୍ମୁଙ୍କ ଅଭିଯୋଗ ଅନୁସାରେ ସରପଞ୍ଚ ଭାବେ ସସ୍ମିତା ଓଝା ନିର୍ବାଚିତ ହେବା ପରଠାରୁ ପଞ୍ଚାୟତ କାର୍ଯ୍ୟାଳୟକୁ ଆସନ୍ତି ନାହିଁ। ତେଣୁ ଅଫିସ କାର୍ଯ୍ୟ ସବୁ ସରପଞ୍ଚଙ୍କ ଘରେ ହୁଏ। ତେଣୁ ଗତ ୪.୯.୨୦୨୪ରେ ସେ ସରପଞ୍ଚଙ୍କ ଘରକୁ ଅଫିସ କାର୍ଯ୍ୟରେ ଯାଇଥିଲେ। ଫେରିବା ବାଟରେ ନିକଟସ୍ଥ କେନାଲ ବନ୍ଧ ନିକଟରେ ସରପଞ୍ଚଙ୍କ ଦେଢଶୁର ନିକୁଞ୍ଜ ବିହାରୀ ଓଝା ତାଙ୍କୁ ଗାଳି ଗୁଲଜ କରିବା ସହ ଜାତିଆଣ ଆକ୍ଷେପ କରିଥିଲେ। ଖାଲି ଏତିକି ନୁହେଁ ନିକୁଞ୍ଜ ତାଙ୍କ ସରକାରୀ ଫାଇଲ ଛଡ଼ାଇ ନେଇଥିଲେ। ପିଇଓ ମୁର୍ମୁ ନିଜ ବସା ଘରକୁ ପଳାଇ ଆସିଥିଲେ। କିଛି ସମୟ ପରେ ନିକୁଞ୍ଜ ଏବଂ ସୁରେନ୍ଦ୍ର ରାଉତ ନାମକ ଜଣେ ବ୍ୟକ୍ତି ପିଇଓ ମୁର୍ମୁଙ୍କ ବସା ଘର ଭିତରକୁ ପ୍ରବେଶ କରି ପୁଣି ଗାଳିଗୁଲଜ କରିବା ସହ ଜୀବନରେ ମାରି ଦେବାକୁ ଧମକ ଦେଇଥିଲେ। ପିଇଓ ମୁର୍ମୁ ଏବଂ ହାଟଡିହୀ ପିଇଓ ସଂଘ କାର୍ଯ୍ୟକର୍ତ୍ତା ଏନେଇ ବିଡିଓ ସୌମ୍ୟଶ୍ରୀ ପାଣିଗ୍ରାହୀଙ୍କୁ ଲିଖିତ ଭାବେ ଅଭିଯୋଗ କରିଛନ୍ତି। ଅଭିଯୁକ୍ତଙ୍କୁ ଗିରଫ କରା ନ ଗଲେ କଲମଛାଡ଼ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି।
ଅଭିଯୋଗ ଆଧାରରେ ବିଡିଓ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଚଳିତ ମାସ ଗତ ୬ ତାରିଖ ନନ୍ଦିପଦା ଥାନାକୁ ନିର୍ଦେଶ ଦେଇଛନ୍ତି। ବିଡିସ ପାଣିଗ୍ରାହୀ କହିଛନ୍ତି, ଏମିତି ଘଟଣା ଯଦି ଘଟିଥାଏ ତେବେ ତାହା ଅତି ଦୁଃଖ ଏବଂ ଲଜ୍ଜାର ବିଷୟ ଅଟେ। ଆଦିବାସୀ ମହିଳାଙ୍କ ପ୍ରତି ଏପରି ଘଟଣା ଦିଗରେ ମୁଖ୍ୟମନ୍ତ୍ରୀ ମୋହନ ଚରଣ ମାଝିଙ୍କ ଦୃଷ୍ଟି ଆକର୍ଷଣ କରି ଦୃଢ଼ କାର୍ଯ୍ୟାନୁଷ୍ଠାନ ନେବା ଜରୁରୀ ବୋଲି ସାମାଜିକ କର୍ମୀ ଆଦିକନ୍ଦ ଜେନା କହିଛନ୍ତି। ନନ୍ଦିପଦା ଥାନା ଅଧିକାରୀ ରବୀନ୍ଦ୍ର ପାତ୍ର କହିଛନ୍ତି, ଘଟଣା ସମ୍ପର୍କରେ କେସ୍ ନଂ ୨୫୫/୨୦୨୪ ରେ ଏକ ମାମଲା ରୁଜୁ ହୋଇଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ହେବ।
ଅନ୍ୟପକ୍ଷରେ ସରପଞ୍ଚଙ୍କ ଦେଢଶୁର ନିକୁଞ୍ଜ ଓଝା କହିଛନ୍ତି, ଘଟଣା ସମ୍ପର୍କରେ ମୁଁ ଜାଣିନି କି ପୋଲିସ ମତେ ଖବର ଦେଇନି। ଜଣେ ବ୍ୟକ୍ତିଙ୍କ ପାଖରୁ ଶନିବାର ମୋ ନାମରେ ଏଫ୍ଆଇଆର ଦିଆଯାଇଥିବା କେବଳ ଶୁଣିଛି।
