ତିହିଡ଼ି,୩ା୩(ସଞ୍ଜିତ ବଳ): ଭଦ୍ରକ ଜିଲା ତିହିଡ଼ି ବ୍ଲକ ଅଧୀନ ସିନ୍ଦୋଳ ପଞ୍ଚାୟତର ସରପଞ୍ଚ ସୁପ୍ରଭା ପାଣି କେତେଜଣ ବରିଷ୍ଠ ନେତାଙ୍କ ଅସହଯୋଗ ଓ ଅସମ୍ମାନ ଯୋଗୁ ମାନସିକ ଅଶାନ୍ତି ଭୋଗି ଚାଲିଛନ୍ତି। ସେ ସରପଞ୍ଚ ଭାବେ ନିର୍ବାଚିତ ହେବା ପରଠାରୁ ବିରୋଧକୁ ସାମ୍ନା କରି ଆସୁଛନ୍ତି। ଦଳରେ ତାଙ୍କୁ ଉଚିତ ସମ୍ମାନ ନ ମିଳିଲେ ବିଜେଡିରୁ ଇସ୍ତଫା ଦେବେ ବୋଲି ଶନିବାର ଅପରାହ୍ନରେ ଖବରଦାତା ସମ୍ମିଳନୀ ମାଧ୍ୟମରେ ଚେତାବନୀ ଦେଇଛନ୍ତି।
ସେ କହିଛନ୍ତି, ମୁଖ୍ୟମନ୍ତ୍ରୀ ମହିଳାମାନଙ୍କୁ ସବୁ କ୍ଷେତ୍ରରେ ଅଗ୍ରାଧିକାର ଦେଉଛନ୍ତି। ସେ ଜଣେ ମହିଳା ପ୍ରତିନିଧି ଭାବେ ନିଜେ ପଞ୍ଚାୟତର ସମସ୍ତ କାର୍ଯ୍ୟ ତୁଲାଇ ଆସୁଛନ୍ତି। ଏହାକୁ ପଞ୍ଚାୟତର କେତେଜଣ ନେତା ବରଦାସ୍ତ କରି ନ ପାରି ବିରୋଧ କରୁଛନ୍ତି। ବିଭିନ୍ନ ଉନ୍ନୟନମୂଳକ କାର୍ଯ୍ୟ ତାଙ୍କ ଅଗୋଚରରେ ପଞ୍ଚାୟତରେ କରାଯାଉଛି। କିଛିଦିନ ପୂର୍ବେ ଏକ ଅଙ୍ଗନୱାଡି ଗୃହ ନିର୍ମାଣ କାର୍ଯ୍ୟ ତାଙ୍କ ଅଗୋଚରରେ ହେଉଥିଲା। ସେ ଏ ସମ୍ପର୍କରେ ପଚାରିବାରୁ ଜଣେ ୱାର୍ଡ ସଦସ୍ୟ ତାଙ୍କୁ ଅପମାନିତ କରିଥିଲେ। ଠିକାଦାରୀ କରି ଅର୍ଥ ଉପାର୍ଜନ କରିବାକୁ ସେ ସରପଞ୍ଚ ହୋଇନାହାନ୍ତି। ଲୋକଙ୍କ ସେବା କରିବା ତାଙ୍କର ଲକ୍ଷ୍ୟ। ମାତ୍ର କେତେଜଣ ବରିଷ୍ଠ ନେତା ତାଙ୍କୁ ବିରୋଧ କରୁଥିବାରୁ ସେ ତାଙ୍କ ଲକ୍ଷ୍ୟ ପୂରଣ କରିପାରୁ ନ ଥିବା ଦର୍ଶାଇଛନ୍ତି। ଏନେଇ ସେ ବାସୁଦେବପୁର ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ ଓ ବିଧାୟକଙ୍କ ହସ୍ତକ୍ଷେପ ପରେ ସମସ୍ୟାର ସମାଧାନ ହୋଇଥିଲେ ମଧ୍ୟ ପରେ ପୁଣି ସେହି ସମସ୍ୟା ଉପୁଜିଥିବା କହିଛନ୍ତି। ଶ୍ରୀଧର ବାରିକ, ଜଗବନ୍ଧୁ ରାଉଳ, ନିଶାକର ସ୍ବାଇଁ, ଭାଗବତ ଶତପଥୀ, ଶରତ ଲେଙ୍କା, ସନାତନ ଦାସ, ଦଇତାରୀ ନାୟକ, ଲକ୍ଷ୍ମୀଧର ଦାସ, ଜଗବନ୍ଧୁ ଦାସ ପ୍ରମୁଖ ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।
