ପୁରୁଷୋତ୍ତମପୁର,୨୨ା୫(ଡି.ଏନ.ଏ.):ପୁରୁଷୋତ୍ତମପୁର ଥାନା ଭାଟକୁମରଡା ପଞ୍ଚାୟତ ସାର୍ଗୁଣାପଲ୍ଲୀ ଗ୍ରାମରେ ବିଦ୍ୟୁତ ପୋଲରେ ଷ୍ଟ୍ରିଟ୍ ଲାଇଟ୍ ଲଗାଇବାର ସାମାନ୍ୟ ଘଟଣାକୁ ନେଇ ଗତ ଅକ୍ଟୋବର ମାସଠାରୁ ବର୍ତ୍ତମାନ ଯାଏ ଗ୍ରାମରେ ଅଶାନ୍ତି ଲାଗି ରହିଛି। ଯୁଦ୍ଧିଷ୍ଟିର ନାହାକଙ୍କ ପରିବାର ଉପରେ ନିର୍ଯାତନା ବଢିଚାଲିଛି। ଏପରିକି ଗତ ୨ ତାରିଖରେ ସେହି ଗ୍ରାମର ତଥା ଭାଟକୁମରଡା ପଞ୍ଚାୟତ ନାୟବ ସରପଞ୍ଚଙ୍କ ସ୍ବାମୀ ଇନ୍ଦ୍ର ନାହାକଙ୍କ ସମେତ ୧୦ ଜଣ ବ୍ୟକ୍ତି ଖଣ୍ଡା କାତି ଆଦି ମାରଣାସ୍ତ୍ର ଧରି ଯୁଦ୍ଧିଷ୍ଟିରଙ୍କ ଘରେପଶି ତାଙ୍କ ବାପା ପ୍ରଫୁଲ ନାହାକଙ୍କୁ ଗାଁ ଦାଣ୍ଡକୁ ଘୋଷାଡି ଆଣି ହତ୍ୟା ଉଦ୍ୟମ କରିଥିଲେ। ଏହି ସମୟରେ ତାଙ୍କ ମା’ ପ୍ରମିଳା ଓ ଭାଇ ଚରଣ ପ୍ରତିବାଦ କରିବାରୁ ସେମାନଙ୍କୁ ମଧ୍ୟ ମାଡମାରି ଫୋନଟିକୁ ଛଡାଇ ନେଇ ଯାଇଥିଲେ। ଏ ନେଇ ଗତ ୪ରେ ଯୁଦ୍ଧିଷ୍ଟିର ପୁରୁଷୋତ୍ତମପୁର ପୋଲିସରେ ଅଭିଯୋଗ କରିଥିଲେ। ପୋଲିସ ଥାନା ନଂ. ୩୦୬/୨୩ପ୍ରକାରେ ମାମଲା ରୁଜୁ କରି ଘଟଣାର ତଦନ୍ତ ଚଲାଇଥିବା ବେଳେ ସୋମବାର ନାୟବ ସରପଞ୍ଚଙ୍କ ସ୍ବାମୀ ଇନ୍ଦ୍ର ନାହାକଙ୍କୁ ଗିରଫ କରିଛି। ଏହି ଘଟଣାକୁ ନେଇ ଗ୍ରାମବାସୀ ପୁରୁଷୋତ୍ତମପୁର ଥାନା ଘେରାଉ କରି ଇନ୍ଦ୍ରଙ୍କୁ ତୁରନ୍ତ ଛାଡିବା ଲାଗି ଦାବି କରିଥିଲେ। ମାତ୍ର ପୋଲିସ କଡା ସୁରକ୍ଷା ବଳୟ ମଧ୍ୟରେ ଇନ୍ଦ୍ର ନାହାକଙ୍କୁ ପୁରୁଷୋତ୍ତମପୁର କୋର୍ଟକୁ ଚାଲାଣ କରି ଥାନାକୁ ଜଗି ରହିଥିଲେ। ଏହାକୁ ନେଇ ଏସ୍ଡିପିଓ ରଜନୀକାନ୍ତ ସାମଲ ଘଟଣା ସ୍ଥଳକୁ ଆସି ଏଥିରେ ହସ୍ତକ୍ଷେପ କରି ଲୋକଙ୍କୁ ବୁଝାଶୁଝା କରି ଯେପରି ଗ୍ରାମରେ ଶାନ୍ତି ବଜାୟରହିବ ସେଥିନେଇ ପରାମର୍ଶ ମାନ ଦେଇଥିଲେ। ଫଳରେ ଥାନା ଘେରାଉ ହଟିଥିଲା।
ସୂଚନାଯୋଗ୍ୟ, ପୂର୍ବରୁ ଗ୍ରାମରେ ପ୍ରଜାକୋର୍ଟ କରି ଯୁଦ୍ଧିଷ୍ଟିରଙ୍କ ପରିବାରକୁ ସାମାଜିକ ବାସନ୍ଦ କରିବା ସହ ୩୦ ହଜାର ଟଙ୍କା ଦଣ୍ଡରେ ଦଣ୍ଡିତ କରିଥିଲେ। ଏହାକୁ ନେଇ ଯୁଦ୍ଧିଷ୍ଟିର ପୋଲିସରେ ଗତ ଫେବୃଆରୀରେ ଅଭିଯୋଗ କରିଥିଲେ। ପୋଲିସ କେସ୍ ନଂ ୧୦୬/୨୩ ପ୍ରକାରେ ମାମଲା ରୁଜୁ କରିବା ସହ ଯେପରି ଏଭଳି ସାମାଜିକ ବାସନ୍ଦ ଓ ଆର୍ଥିକ ଦଣ୍ଡ ଭଳିକୁ ସଂସ୍କାର ଘଟଣା ବନ୍ଦ ହେବ ଗ୍ରାମରେ ଶାନ୍ତି ବଜାୟ ରହିବ ସେଥିନେଇ ପରାମର୍ଶ ଦେଇଥିଲେ। ଏଥିରେ ଉଭୟ ପକ୍ଷ ମିଳାମିଶା ହୋଇ ବିଶୃଙ୍ଖଳା ନକରିବା ଲାଗି ପୋଲିସକୁ ଚୁକ୍ତିନାମା ଲେଖିଦେଇଥିବାବେଳେ ପୁଣି ତାହାର ପୁନରାବୃତ୍ତି ଘଟିଛି।
