ନୂଆଦିଲ୍ଲୀ,୧୫।୨: ଇଂଲଣ୍ଡ ବିପକ୍ଷ ତୃତୀୟ ଟେଷ୍ଟରେ ସରଫରାଜ ଖାନ ଅର୍ଦ୍ଧ ଶତକ କରି ଡେବ୍ୟୁକୁ ସ୍ମରଣୀୟ କରିପାରିଛନ୍ତି। ରନ୍ ଆଉଟ ହେବା ପୂର୍ବରୁ ସରଫରାଜ ଖାନ ୬୬ ବଲରେ ୬୨ ରନ ସଂଗ୍ରହ କରିଛନ୍ତି। ସରଫରାଜଙ୍କ ଏହି ଇନିଂସରେ ୯ ଚୌକା ଓ ଗୋଟିଏ ଛକା ଅନ୍ତର୍ଭୁକ୍ତ ହୋଇଥିଲା। ଏହି ଇନିଂସ ପାଇଁ ସରଫରାଜ ତାଙ୍କ ପିତାଙ୍କୁ ଶ୍ରେୟ ଦେଇଛନ୍ତି। ସରଫରାଜ କହିଛନ୍ତି ଯେ ତାଙ୍କ ପିତାଙ୍କ କାରଣରୁ ସେ କ୍ରିକେଟ ଖେଳିବାରେ ସକ୍ଷମ ହୋଇଛନ୍ତି। ଏଥିପାଇଁ ପିତାଙ୍କ ଧନ୍ୟବାଦ ଜଣାଇଛନ୍ତି।
ସରଫରାଜ ଖାନ ୬ ବର୍ଷ ବୟସରେ କ୍ରିକେଟ ଖେଳିବା ଆରମ୍ଭ କରିଥିଲେ। ପ୍ରଥମ ଦିନର ଖେଳ ଶେଷ ହେବା ପରେ ସରଫରାଜ କହିଛନ୍ତି ଯେ ଡେବ୍ୟୁ କରିବା ଭଲ ଲାଗେ। ପଡ଼ିଆକୁ ଆସିବା ଏକ ବଡ଼ ଅନୁଭୂତି ଥିଲା। ମୁଁ ୬ ବର୍ଷ ବୟସରୁ କ୍ରିକେଟ ଖେଳୁଛି। ମୋ ବାପାଙ୍କ ସ୍ବପ୍ନ ଥିଲା ଯେ ମୁଁ ଭାରତ ପାଇଁ କ୍ରିକେଟ ଖେଳେ, ଆଉ ଆଜି ଏହି ସ୍ବପ୍ନ ଆଜି ପୂରଣ ହୋଇଛି।
ସରଫରାଜ ଦୀର୍ଘ ସମୟ ପରେ ଡେବ୍ୟୁ କରିବାର ସୁଯୋଗ ପାଇଛନ୍ତି। ତୃତୀୟ ଟେଷ୍ଟରେ କ୍ୟାପ୍ ପାଇବା ମାତ୍ରେ ତାଙ୍କ ପିତାଙ୍କ ନିକଟକୁ ଯାଇଥିଲେ। ପୁଅ ଭାରତ ପାଇଁ ଖେଳୁଥିବା ଦେଖିବା ପରେ ସରଫରାଜଙ୍କ ପିତା ଆଖିରେ ଲୁହ ଆସିଯାଇଥିଲା। କେବଳ ଏତିକି ନୁହେଁ, ସରଫରାଜଙ୍କ ପିତା ମଧ୍ୟ ତାଙ୍କ ପୁଅର କ୍ୟାପ୍କୁ ଚୁମ୍ବନ ଦେଇଥିଲେ।
