ବାଲୁଗାଁ,୧୩।୧୦(ଡି.ଏନ୍.ଏ.): ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ ୧୧ନଂ. ୱାର୍ଡ଼ ସରଳାପଦର ଗ୍ରାମ ସଂଲଗ୍ନ ତଥା ୫ନଂ ଜାତୀୟ ରାଜପଥ ପାର୍ଶ୍ୱ ରହିଥିବା ବହୁ ପୁରାତନ ପୁଷ୍କରିଣୀଟି ପରିତ୍ୟକ୍ତ ଅବସ୍ଥାରେ ପଡ଼ିରହିଛି। ପୁଷ୍କରିଣୀର ଚତୁଃପାର୍ଶ୍ୱରେ ବିଭିନ୍ନ ଅନାବନା ଗଛ ଉଠିଯାଇଥିବା ବେଳେ ଦଳରେ ପରିପୂର୍ଣ୍ଣ ହୋଇ ବ୍ୟବହାର ଅନୁପଯୋଗୀ ହୋଇପଡ଼ିଛି। ଏହି ପୁଷ୍କରିଣୀଟି ଗ୍ରାମବାସୀଙ୍କ ଆବଶ୍ୟକରେ ଆସୁଥିବାରୁ ଏହାକୁ ପୁନରୁଦ୍ଧାର କରାଯାଉ ବୋଲି ସାଧାରଣରେ ଦାବି ହୋଇଛି।
ପ୍ରକାଶ ଯେ, ସରଳାପଦର ଗ୍ରାମକୁ ପ୍ରବେଶ ରାସ୍ତା ପାର୍ଶ୍ୱରେ କେଉଁ ଆବାହନ କାଳରୁ ଏହି ପୋଖରୀଟି ରହିଅଛି। ଉକ୍ତ ଗ୍ରାମ ଏବଂ ସ୍ଥାନୀୟ ଅଧିବାସୀ ସମେତ ଏଠାକୁ ଆସୁଥିବା ପର୍ଯ୍ୟଟକମାନେ ମଧ୍ୟ ଉକ୍ତ ପୋଖରୀରେ ସ୍ନାନାଦି କାର୍ଯ୍ୟ କରିଥାନ୍ତି। ଏଥି ସହିତ ଶୁଦ୍ଧକ୍ରିୟା ଆଦି କାର୍ଯ୍ୟ ପାଇଁ ଉକ୍ତ ପୋଖରୀ ଉପରେ ଲୋକେ ନିର୍ଭର କରନ୍ତି। କିନ୍ତୁ କିଛି ମାସ ହେଲା ପୋଖରୀ ଚତୁଃପାର୍ଶ୍ୱରେ ଅନାବନା ବୃକ୍ଷ ମାଡ଼ି ଯିବା ସହ ଦଳରେ ସମ୍ପୂର୍ଣ୍ଣ ଆଚ୍ଛାଦିତ ହୋଇପଡ଼ିଛି। ଯାହାକି ପୋଖରୀରେ ସ୍ନାନ କରିବା ତ ଦୂରର କଥା ପ୍ରବେଶ କରିବା ସମ୍ଭବପର ନୁହେଁ। ଦଳ ପଚିସଢ଼ି ପୁତ୍ତିଗନ୍ଧମୟ ପରିବେଶ ସୃଷ୍ଟି ହେବାସହ ଗ୍ରାମବାସୀଙ୍କୁ ଡେଙ୍ଗୁ, ମ୍ୟାଲେରିଆ ଆଦି ମାରତ୍ମାକ ରୋଗର ସଂକ୍ରମଣ ହେବାର ଆଶଙ୍କା ରହିଛି। ବର୍ଷ ବର୍ଷ ଧରି ଏହି ସମସ୍ୟା ଲାଗି ରହିଛି। ଗ୍ରାମବାସୀ ଏଦିଗରେ ସ୍ଥାନୀୟ ପ୍ରଶାସନିକ ଅଧିକାରୀଙ୍କ ନିକଟରେ ବାରମ୍ବାର ଦାବି କରୁଥିଲେ ମଧ୍ୟ ଉକ୍ତ ପୁଷ୍କରିଣୀର ପୁନରୁଦ୍ଧାର ତଥା ସ୍ଥାୟୀ ନିରାକରଣ ଦିଗରେ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଅତିଶୀଘ୍ର ଏଥିପ୍ରତି ଗୁରୁତ୍ୱ ଦେଇ ଏହି ପୁଷ୍କରିଣୀର ପୁନରୁଦ୍ଧାର ସହ ଉନ୍ନତିକରଣ କରା ନ ଗଲେ ଆଗାମୀ ଦିନରେ ସରଳାପଦର ଗ୍ରାମବାସୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଶୁଣାଇଛନ୍ତି।
