ମୁମ୍ବାଇ,୨୪।୧: ବଲିଉଡର ପ୍ରଖ୍ୟାତ ନିର୍ଦ୍ଦେଶକ ସଞ୍ଜୟ ଲୀଳା ଭଁଶାଳୀଙ୍କ ଆଗାମୀ ଫିଲ୍ମ ‘ଲଭ୍ ଆଣ୍ଡ ୱାର’ ରେ ଏକାଠି ନଜର ଆସିବେ ରଣବୀର କପୁର, ଆଲିଆ ଭଟ୍ଟ ଏବଂ ଭିକି କୌଶାଲ। ଆଗରୁ ଏନେଇ ଆଲୋଚନା ହେଉଥିଲା ବେଳେ ଏବେ ଏହି ଖବର ନିଶ୍ଚିତ ହୋଇଛି। ବଡ଼ ଖବର ହେଉଛି ଏହି ଫିଲ୍ମର ଘୋଷଣା ସହ ଏହାର ରିଲିଜ ତାରିଖ ମଧ୍ୟ ଘୋଷଣା କରାଯାଇଛି।
ନୂଆ ପିଢ଼ିର ରୋମାଣ୍ଟିକ କାହାଣୀ ‘ଲଭ୍ ଆଣ୍ଡ ୱାର’ ସଞ୍ଜୟ ଲୀଲା ଭଁଶାଲୀ ନିର୍ଦ୍ଦେଶନା ଦେବେ। ଭଁଶାଲୀ ହେଉଛନ୍ତି ବଲିଉଡ ଇଣ୍ଡଷ୍ଟ୍ରିର ସେହି ନିର୍ଦ୍ଦେଶକ ଯିଏ କାହାର କ୍ୟାରିଅରକୁ ନୂଆ ଉଚ୍ଚତାରେ ପହଞ୍ଚାଇ ପାରିବେ। ଜଣେ ଅଭିନେତାଙ୍କଠାରୁ ସର୍ବୋତ୍ତମ ଅଭିନୟ କିପରି ପାଇବେ ସେଥିପାଇଁ ତାଙ୍କର ଉଦାହରଣ ଦିଆଯାଏ।
‘ଲଭ୍ ଆଣ୍ଡ ୱାର’ ୨୦୨୫ କ୍ରିସମାସ୍ ଅବସରରେ ଡିସେମ୍ବର ୨୫ରେ ସିନେମାଘରକୁ ଆସିବ। ବୁଧବାର ଭିକି କୌଶାଲ ଇନଷ୍ଟାଗ୍ରାମରେ ଏହି ଫିଲ୍ମର ପୋଷ୍ଟର ଶେୟାର କରିଥିଲା ବେଳେ କମେଣ୍ଟ ବକ୍ସରେ ପ୍ରଶଂସକମାନେ ସେମାନଙ୍କର ଖୁସି ବ୍ୟକ୍ତ କରିଛନ୍ତି। ଅନେକ କାଟ୍ରିନାଙ୍କୁ ମଧ୍ୟ ଏହି ଫିଲ୍ମରେ ସାମିଲ କରିବା ନେଇ ଆଶା ପ୍ରକାଶ କରିଛନ୍ତି।
ସଞ୍ଜୟ ଲୀଲା ଭଁଶାଲୀଙ୍କ ସହ ରଣବୀର କପୁର ଏବଂ ସହ ଆଲିଆ ଭଟ୍ଟଙ୍କ ଦ୍ୱିତୀୟ ଫିଲ୍ମ ହେବ। ଏଥି ସହିତ ବିକି କୌଶଲ ପ୍ରଥମ ଥର ପାଇଁ ଭଁଶାଲୀଙ୍କ ସହ ହାତ ମିଳାଉଛନ୍ତି। ରଣବୀର ଭଁଶାଲୀଙ୍କ ଫିଲ୍ମ ‘ସାୱାରିଆ’ରୁ କ୍ୟାରିୟର ଆରମ୍ଭ କରିଥିଲେ। ଗାଙ୍ଗୁବାଇ ଚଳଚ୍ଚିତ୍ରରେ ଆଲିଆ ତାଙ୍କର ଅଭିନୟ ଶକ୍ତି ପ୍ରମାଣ କରିଥିଲେ। ନିକଟରେ ବିକି କୌଶଲ ମଧ୍ୟ ନିର୍ଦ୍ଦେଶକଙ୍କ ସହ କାମ କରିବାକୁ ଇଚ୍ଛା ପ୍ରକାଶ କରିଥିଲେ, ଯାହା ବର୍ତ୍ତମାନ ପୂରଣ ହେବାକୁ ଲାଗୁଛି। ବିକିଙ୍କର ଶେଷ ଫିଲ୍ମ ଥିଲା ‘ସାମ ବାହାଦୂର’, ଯାହା ପ୍ରଶଂସକଙ୍କୁ ଖୁବ ପସନ୍ଦ ଆସିଥିଲା।
