ଛତ୍ରପୁର,୨୪ା୯ (ଡି.ଏନ.ଏ.): ଛତ୍ରପୁର ଏନ୍ଏସିର ସାଧାରଣ ପରିଷଦ ବୈଠକ ଅଧ୍ୟକ୍ଷା ଶର୍ମିଷ୍ଠା ପ୍ରଧାନଙ୍କ ପୌରୋହିତ୍ୟରେ ଗୁରୁବାର ଅନୁଷ୍ଠିତ ହୋଇଥିଲା। ବୈଠକରେ ସ୍ଥାନୀୟ ବିଧାୟକ ସୁବାସ ଚନ୍ଦ୍ର ବେହେରା,ଉପାଧ୍ୟକ୍ଷ ଜି.ପାପା ରାଓ, ନିର୍ବାହୀ ଅଧିକାରୀ ଉମାଶଙ୍କର ନାୟକ ମଞ୍ଚାସୀନ ଥିଲେ। ବୈଠକରେ ପରିମଳ, ରିକାପଲ୍ଲୀସ୍ଥିତ କଲ୍ୟାମଣ୍ଡପ,ପ୍ରତ୍ୟେକ ୱାର୍ଡରେ ଆବଶ୍ୟକ ପଡୁଥିବା ଉନ୍ନତୀକରଣ ଉପରେ ଆଲୋଚନା ହୋଇଥିଲା । ବିଶେଷକରି ଛତ୍ରପୁରରେ ପରିମଳ ଦିନକୁ ଦିନ ବିପର୍ଯ୍ୟସ୍ତ ହୋଇପଡିଥିବା ସମସ୍ତ କାଉନସିଲରମାନେ କହିଥିଲେ। ଏପରିକି ଗତ ବୈଠକରେ ପରିମଳ ସୁଧାର ଆସିବା ପାଇଁ ଯେଉଁ ସବୁ କାର୍ଯ୍ୟପନ୍ଥା ସ୍ଥିର ହୋଇଥିଲା ତାହା ଏବେ ବି କାର୍ଯ୍ୟକାରୀ ହୋଇନଥିବା ନେଇ କାଉନସିଲରମାନେ ଅସନ୍ତୋଷ ପ୍ରକାଶ କରିଥିଲେ। ଗତ ବୈଠକରେ ପ୍ରତି ଓାର୍ଡରେ ୩ରୁ ୪ ଜଣ ସଫେଇ କର୍ମଚାରୀ ନିୟୋଜିତ ହୋଇ ଡ୍ରେନ୍ଠାରୁ ଆରମ୍ଭ କରି ଅନ୍ୟାନ୍ୟ ସଫେଇ ଉପରେ କାର୍ଯ୍ୟକାରୀ କରାଯିବା ଉପରେ କୁହାଯାଇଥିଲା, କିନ୍ତୁ ତାହା ହେଉନାହିଁ। ସଫେଇ କର୍ମଚାରୀମାନେ ପ୍ରତ୍ୟେକ ଦିନ ଆସି ନିଜ ନିଜର କାଉନସିଲରଙ୍କୁ ଦସ୍ତଖତ କରିବା ସହ କେଉଁଠି କାମ କରାଯିବ ତାହା କୁହାଯାଇଥିଲେ ବି ତାହା ନ ହୋଇ ନିଜ ମନମୁତାବକ ଠିକା ନେଇ ସଫେଇ ସଂସ୍ଥା କାମ କରୁଛି। ଫଳରେ ପରିମଳ ଦିନକୁ ଦିନ ବିଗିଡି ଯାଉଛି। ପରିମଳ ନୂଆ ଟେଣ୍ଡର ପ୍ରକାଶ କରିବାକୁ ବୈଠକରେ ନିଷ୍ପତ୍ତି ହୋଇଛି ା ତାହା ଖୁବ ଶୀଘ୍ର କାର୍ଯ୍ୟକାରୀ କରାଯିବ ବୋଲି ନିର୍ବାହୀ ଅଧିକାରୀ କହିଥିଲେ। ଛତ୍ରପୁର ରିକାପଲ୍ଲି କଲ୍ୟାଣୀ ମଣ୍ଡପ କାର୍ଯ୍ୟକାରୀ କରାଯିବାକୁ ଯେଉଁ ବ୍ୟକ୍ତି ନେଇଛି ଆଗାମୀ ଦିନରେ ତାଙ୍କ ସହ ଆଲୋଚନା କରାଯାଇ କିପରି କାର୍ଯ୍ୟକ୍ଷମ ହେବ ତାହା ଉପରେ ଗୁରୁତ୍ୱ ଦିଆଯାଇଛି । ଛତ୍ରପୁର ସହରର ବହୁ ସ୍ଥାନରେ ଏନ୍ଏସି ପକ୍ଷରୁ ବିନା ପ୍ଲାନିଂ କରି ଡ୍ରେନ କାମ କରାଯାଉଛି। ଫଳରେ ତାର କୌଣସି ସୁଫଳ ମିଳୁନାହିଁ। ଏପରିକି ୧ ନଂ. ୱାର୍ଡରେ ଏହି ସମସ୍ୟା ରହିଥିବା କାଉନ୍ସିଲର କହିଥିଲେ।
ହରିଶ୍ଚନ୍ଦ୍ର ଯୋଜନାରେ ଠିକ୍ ଲୋକଙ୍କୁ ସହାୟତା ରାଶି ମିଳୁ ନ ଥିବା ନେଇ ୯ନଂ. କାଉନସିଲର ଇଓଙ୍କ ଦୃଷ୍ଟି ଆକର୍ଷଣ କରିଥିଲେ। ଏପରି କି ବଜରଙ୍ଗି ସାହିର ସମସ୍ତ ଲୋକ ୯ନଂ. ଭୋଟର ଉକ୍ତ ଅଞ୍ଚଳରେ ଏନ୍ଏସି କୌଣସି ଦୃଷ୍ଟି ଦେଉନାହିଁ। ପୂର୍ବରୁ ଉକ୍ତ ଅଞ୍ଚଳରେ ଏନ୍ଏସି ଲାଇଟ, ରାସ୍ତା ଓ ଡ୍ରେନ କରିଥିବା ବେଳେ ଏବେ କାହିଁକି ମନାକରୁଛି । ସେମାନଙ୍କୁ ଏନଏସି ପକ୍ଷରୁ ରାଶନ କାର୍ଡ ସମେତ ସ୍ବାସ୍ଥ୍ୟ କାର୍ଡ ଏପରିକି ଉକ୍ତ ଅଞ୍ଚଳର ମହିଳାମାନେ ଏନ୍ଏସିର ସଂଘରେ ସାମିଲ ହୋଇଛନ୍ତି। କିନ୍ତୁ କାହିଁକି ଲୋକଙ୍କୁ ମୌଳିକ ସୁବିଧାରୁ ବାଦ ଦେଉଛି। ଫଳରେ ସ୍ଥାନୀୟ ଲୋକଙ୍କ ଦ୍ୱାରା ମୋତେ ଆକ୍ରୋଶର ଶିକାର ହେବାକୁ ପଡୁଛି ବୋଲି ସେ କହିଥିଲେ। ଛତ୍ରପୁରରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ସ୍ଥାପନ ନିମନ୍ତେ ଆଲୋଚନା ସହ ପ୍ରସ୍ତାବ ଦିଆଯାଇଛି। ଖୁବ ଶୀଘ୍ର ଏକ ପ୍ରତିମୂର୍ତ୍ତି ସ୍ଥାପନ ହେବ ବୋଲି ବୈଠକରେ ନିଷ୍ପତ୍ତି ହୋଇଛି। ଆସନ୍ତା ୨୬ରେ ସହରକୁ ଅହିଂସା ରଥ ଆସିବ ା ଏଥିରେ ସମସ୍ତେ ସାମିଲ ହେବାକୁ କୁହାଯାଇଛି। ଛତ୍ରପୁରର ଯେଉଁ ଓ୍ବାର୍ଡରେ କୌଣସି କାମ ହେଲେ ତାହା କାଉନସିଲରମାନେ ଯେପରି ଜାଣିବେ ସେମାନଙ୍କ ମତାମତ ନିଆଯିବା ଉପରେ ବିଧାୟକ କହିଥିଲେ।
