ଜଳେଶ୍ୱର,୫ା୬(ଡି.ଏନ୍.ଏ.): ଉତ୍ତର ବାଲେଶ୍ୱରରେ ସୁବର୍ଣ୍ଣରେଖା ବାଲିର ଚାହିଦ ରହିଥାଏ। କିନ୍ତୁ ସରକାରଙ୍କ ନୂତନ ନୀତି ଅନୁଯାୟୀ ୨୩ଟି ଯାକ ସଇରାତକୁ ନିଲାମ ଦିଆଯାଇ ନ ଥିବାରୁ ବାଲି ଉତ୍ତୋଳନ ବନ୍ଦ ରହିଛି। ଫଳରେ ଉତ୍ତର ବାଲେଶ୍ୱରର ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟ ବନ୍ଦ ରହିଛି। ହେଲେ ବିଳମ୍ବିତ ରାତିରେ ବାଲି ଚୋରାଚାଲାଣୀକାରୀମାନେ ବାଲି ଉତ୍ତୋଳନ କରି ୩ ଗୁଣା ଅଧିକ ମୂଲ୍ୟରେ ବିକ୍ରି କରି ମାଲେମାଲ ହେଉଛନ୍ତି।
ଉତ୍ତର ବାଲେଶ୍ୱରର ଜଳେଶ୍ୱର, ଭୋଗରାଇ, ବାଲିଆପାଳ, ବସ୍ତା, ରାସଗୋବିନ୍ଦପୁର, ରାଇବଣିଆ, ସହିତ ପଶ୍ଚିମ ଓ ପୂର୍ବ ମେଦିନୀପୁର ଜିଲାର ବିଭିନ୍ନ ନିର୍ମାଣ କାଯର୍ୟରେ ସୁବର୍ଣ୍ଣରେଖା ବାଲି ବ୍ୟବହାର ହୋଇଥାଏ। ଏହିସବୁ ଅଞ୍ଚଳରେ ବାଲି ସଇରାତଗୁଡିକ ପ୍ରାୟ ବନ୍ଦ ରହିଛି। ଚାହିଦାକୁ ଲକ୍ଷ୍ୟ କରି ବାଲି ଚୋରାଚାଲାଣକାରୀମାନେ ବାଲି ଚୋରିରେ ବ୍ୟସ୍ତ ରହିଛନ୍ତି। ପ୍ରତି ଦିନ ରାତିରେ ନଦୀରେ ବିଭିନ୍ନ ଅଞ୍ଚଳରୁ ଚୋରାରେ ବାଲି ଉତ୍ତୋଳନ କରି ଚାଲାଣ କରୁଛନ୍ତି। ସନ୍ଧ୍ୟା ୭ଟାରୁ ସକାଳ ୬ଟା ଯାଏ ଡମ୍ପର ଓ ଟ୍ରାକ୍ଟରରେ ବାଲି ପରିବହନ ହେଉଛି। କାଁ, ଭାଁ ସ୍ଥାନରେ ତହସିଲଦାର ଓ ଟାକ୍ସଫୋର୍ସ ଚଡାଉ ଜାରି ରଖିଥିବା ବେଳେ ଚୋରାଚାଲାଣକାରୀମାନେ ଭୟଭୀତ ନ ହୋଇ ଏପରି ଚୋରା ଚାଲାଣରେ ବ୍ୟସ୍ତ ରହୁଛନ୍ତି। ୩ଗୁଣା ଅଧିକ ମୂଲ୍ୟରେ ବାଲି ବିକ୍ରି ହେଉଥିବାରୁ ସରକାରୀ ନିର୍ମାଣ କାଯର୍ୟ ଠପ୍ ହୋଇଛି। ଅତିଶୀଘ୍ର ବାଲି ସଇରାତଗୁଡିକର ନିଲାମ ହୋଇପାରିଲେ ଚାହିଦା ମେଣ୍ଟାଇବା ସହିତ ପୂର୍ବଭଳି ବ୍ୟାପକ ରାଜସ୍ବ ସରକାରୀ ତହବିଲକୁ ଆସିପାରିବ। ଏଥିପ୍ରତି ଜିଲାପାଳ ଓ ରାଜସ୍ୟ ବିଭାଗ ଗୁରୁତ୍ୱ ଦେବାକୁ ଦାବି ହେଉଛି।
