ଯାଜପୁର ଅଫିସ,୨୫ା୪: ଯାଜପୁର ଜିଲାରେ ଗ୍ରାନାଇଟ ପଥର, ବାଲି, ମୋରମ, ମାଟି, ମାଙ୍କଡାପଥର ଲୁଟ ଉପରେ ସ୍ବର ଉତ୍ତୋଳନ କରୁଥିବା ସାମାଜିକ କର୍ମୀ କିମ୍ବା ଗଣମାଧ୍ୟମ ପ୍ରତିନିଧି ସୁରକ୍ଷିତ ମଣୁ ନାହାନ୍ତି। ବାଲି ଖାଦାନକୁ ନେଇ ବିଞ୍ଝାରପୁରରେ ବୋମା ପକାଇ ହତ୍ୟା ଘଟଣା ହେଉ ଅବା ଗ୍ରାନାଇଟ ପଥର ଲୁଟ ଅଭିଯୋଗ ଉପରେ ସାମାଜିକ କର୍ମୀ ସର୍ବେଶ୍ୱର ବେହୁରାଙ୍କୁ ହତ୍ୟା ଉଦ୍ୟମ ଭଳି ଘଟଣା ନିୟମିତ ବ୍ୟବଧାନରେ ଲାଗି ରହିଛି। ଶନିବାର ବଡ଼ଚଣା ବ୍ଲକ ବନ୍ଦାଳୋ ଗ୍ରାମର ବଡ଼ପୋଖରୀରୁ ଖୋଲାଖୋଲି ଭାବେ ବାହାରକୁ ମାଟି ଚାଲାଣ ହେଉଥିବା ସମ୍ପର୍କରେ ଖବର ସଂଗ୍ରହ କରିବାକୁ ଯାଇଥିବା ବୈଦ୍ୟୁତିକ ଗଣମାଧ୍ୟମ ‘ଅର୍ଗସ୍’ର ପ୍ରତିନିଧି ପବିତ୍ର କୁମାର ସାମଲ ଏବଂ ଓ୍ବେବ୍ ନ୍ୟୁଜ୍ ଚ୍ୟାନେଲ ‘ନ୍ୟୁଜ୍-୬’ର ପ୍ରତିନିଧି ବିମଳ ବେହେରାଙ୍କୁ ସଂଘବଦ୍ଧ ଆକ୍ରମଣ ଘଟଣାକୁ ଜିଲାସାରା ନିନ୍ଦା କରାଯାଇଛି। ସୂଚନାଯୋଗ୍ୟ ଯେ, ଜେସିବି ମେଶିନରେ ଦିନ ଦ୍ୱିପ୍ରହରରେ ସେହି ପୋଖରୀରୁ ମାଟି ଖନନ କରି ଏକାଧିକ ଟ୍ରାକ୍ଟର ଯୋଗେ ବିଭିନ୍ନ ଅଞ୍ଚଳକୁ ଚାଲାଣ କରି ଟ୍ରିପ ପିଛା ୫ଶହ ଟଙ୍କା ରୋଜଗାର କରାଯାଉଛି। ଇତିମଧ୍ୟରେ ପ୍ରାୟ ୨୦୦ ଟ୍ରିପ ମାଟି ଉଠାଣ କରାଇ ନେଇ ସାରିଲେଣି। ସ୍ଥାନୀୟ ଲୋକେ ପଚାରିଲେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ କାର୍ଯ୍ୟାଦେଶ ଆଣି ପୋଖରୀ ପୁନରୁଦ୍ଧାର କରୁଛୁ ବୋଲି ସଫେଇ ଦିଆଯାଉଛି। କିନ୍ତୁ ସେଠାରେ ସେମାନେ ଉନ୍ନୟନ କାର୍ଯ୍ୟ ସମ୍ପର୍କିତ କୌଣସି ସୂଚନା ଫଳକ ମାରି ନାହାନ୍ତି। ଅନ୍ୟପକ୍ଷରେ ଏମ୍ଜିଏନ୍ଆର୍ଇଜିଏସ୍ ବାହାନା ଦେଖାଯାଉଥିବା ବେଳେ ଶ୍ରମିକ ବଦଳରେ ମେଶିନ କାମ କରୁଛି। ସେଠାରେ ଉତ୍ତୋଳନ ହେଉଥିବା ମାଟିକୁ ପୋଖରୀ ବନ୍ଧରେ ନ ପକାଇ ବାହାରକୁ ଚାଲାଣ କରାଯାଉଛି। ଏହାକୁ ସନ୍ଦେହ କରି ସ୍ଥାନୀୟ ବାସିନ୍ଦା ଗତ ଗୁରୁବାର ଦର୍ପଣ ତହସିଲଦାର ଏବଂ ବଡ଼ଚଣା ବିଡିଓଙ୍କୁ ଲିଖିତ ଭାବେ ଜଣାଇ କାର୍ଯ୍ୟାନୁଷ୍ଠାନ ଦାବି କରିଥିଲେ। କିନ୍ତୁ ତାହା ସମ୍ପୃକ୍ତ ମାଫିଆଙ୍କ ଉପରେ ପ୍ରଭାବ ପକାଇ ନ ଥିଲା। ଫଳରେ ସ୍ଥାନୀୟ ବାସିନ୍ଦା ଏହା ଉପରେ ଖବର ପ୍ରକାଶ କରିବାକୁ କେତେଜଣ ଗଣମାଧ୍ୟମ ପ୍ରତିନିଧିଙ୍କୁ ଜଣାଇଥିଲେ। ଗ୍ରାମବାସୀଙ୍କ ଅଭିଯୋଗ ଆଧାରରେ ଉପରୋକ୍ତ ଦୁଇ ଗଣମାଧ୍ୟମ ପ୍ରତିନିଧି ସେଠାକୁ ଯାଇ ଫଟୋ ଓ ଭିଡିଓ ଉତ୍ତୋଳନ କରିଥିଲେ। ତାହା ଦେଖି ସେହି ମାଫିଆ ଗୋଷ୍ଠୀ ଗଣମାଧ୍ୟମ ପ୍ରତିନିଧିଙ୍କ ଉପରେ ଅତର୍କିତ ଆକ୍ରମଣ କରିଥିଲେ। ସେମାନଙ୍କୁ ଠେଲାପେଲା ଓ ଗାଳିଗୁଲଜ କରିବା ସହିତ ମୋବାଇଲ ଫୋନ ଓ ଟଙ୍କା ଛଡ଼ାଇ ନେଇଥିବା ନେଇ ବଡଚଣା ଥାନାରେ ଲିଖିତ ଅଭିଯୋଗ ହୋଇଛି। କେବଳ ଏହି ଗୋଟିଏ ସ୍ଥାନ ନୁହେଁ, ଦର୍ପଣ ତହସିଲ ଅନ୍ତର୍ଗତ ଚଣ୍ଡିତଳ, ବନ୍ତଳା, ଖଏରା, ବଡ଼ଚଣା, ପାରିଆ ଓ ବୈରୀ ଆଦି ପଞ୍ଚାୟତର ବିଭିନ୍ନ ସ୍ଥାନରୁ ଇତିମଧ୍ୟରେ ବହୁ ହଜାର ଟ୍ରିପ ମାଟି ଓ ବାଲି ମେଶିନ ଲଗାଇ ଖୋଳି ରେଳ ଓ ରାସ୍ତା ସମ୍ପ୍ରସାରଣ କାମ ସହ ଅନ୍ୟାନ୍ୟ ଅଞ୍ଚଳକୁ ଚାଲାଣ କରାଯାଉଛି। ରାଜସ୍ବ ପ୍ରଶାସନର କୋହଳ ମନୋଭାବ ସେମାନଙ୍କୁ ଏଥିପାଇଁ ପ୍ରୋତ୍ସାହନ ଯୋଗାଉଛି ବୋଲି କୁହାଯାଉଛି।
