ସମ୍ବଲପୁର,୧୮ା୪(ପ୍ରମୋଦ ବହିଦାର): ଭାରତର ସର୍ବବୃହତ ସାମରିକ ବାହିନୀ, କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସର ଜନ୍ମଭୂମି ମଧ୍ୟପ୍ରଦେଶର ନିମଚରେ ଗୁରୁବାର ଆୟୋଜିତ ୮୬ତମ ସ୍ଥାପନା ଦିବସ ପରେଡରେ ମୁଖ୍ୟ ଅତିଥିଭାବେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଯୋଗଦେଇ ଡେପୁଟି ଇନ୍ସପେକ୍ଟର ଜେନେରାଲ ସଞ୍ଜୟ କୁମାର ସିଂଙ୍କ ଉପସ୍ଥିତିରେ ସମ୍ବଲପୁର ସିଆର୍ପିଏଫ୍ ଗୋଷ୍ଠୀ କେନ୍ଦ୍ରକୁ ସର୍ବଶ୍ରେଷ୍ଠ ଗୋଷ୍ଠୀକେନ୍ଦ୍ର ଭାବେ ପୁରସ୍କାର ସ୍ବରୂପ ଟ୍ରଫି ପ୍ରଦାନ କରିଥିଲେ।
ଉତ୍ସବରେ ମୁଖ୍ୟ ଅତିଥି ଶାହା ଦେଶମାତୃକା ପାଇଁ ବଳିଦାନ ଦେଇଥିବା ସିଆରପିଏଫ୍ ଯବାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଏହି ଅବସରରେ ସେ ଉଦ୍ବୋଧନ ଦେଇ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସକୁ ବିଶ୍ୱର ସର୍ବବୃହତ୍ତ ସାମରିକ ବାହିନୀ ବୋଲି କହିଥିଲେ। ୨୦୨୬ ମାର୍ଚ୍ଚ ଶେଷସୁଦ୍ଧା ଦେଶରୁ ନକ୍ସଲବାଦକୁ ସମାପ୍ତ କରିବାକୁ ସରକାର ସଙ୍କଳ୍ପ ବଦ୍ଧ ବୋଲି ଅମିତ ଶାହା କହିଥିଲେ।
ଉଲ୍ଲେଖଯୋଗ୍ୟ ଯେ, ୨୦୧୫ ଜୁନ୍ ୨୪ ତାରିଖରେ ସମ୍ବଲପୁରର ବସନ୍ତପୁର ଗୋଶାଳାରେ ନୂତନ ସିଆର୍ପିଏଫ୍ର ଗୋଷ୍ଠୀ କେନ୍ଦ୍ର ସ୍ଥାପିତ ହୋଇଥିଲା। ସିଆର୍ପିଏଫ୍ର ମୋଟ ୪୩ ଗୋଷ୍ଠୀ କେନ୍ଦ୍ର ମଧ୍ୟରୁ ସର୍ବଶ୍ରେଷ୍ଠ ଗୋଷ୍ଠୀକେନ୍ଦ୍ର ଚୟନ ପାଇଁ ଗୋଷ୍ଠୀକେନ୍ଦ୍ର ଗୁଡିକ ସେକ୍ଟର, ଜୋନାଲ ଓ ନିର୍ଦ୍ଦେଶାଳୟ ସାଧାରଣସ୍ତରରେ ଗଠିତ ବୋର୍ଡ ଦ୍ୱାରା ସମସ୍ତ ମାନଦଣ୍ଡର ସମୀକ୍ଷା କରାଯାଇ ସମ୍ବଲପୁର ଗୋଷ୍ଠୀକେନ୍ଦ୍ରକୁ ସର୍ବଶ୍ରେଷ୍ଠ ବିବେଚିତ କରାଯାଇଛି।
ସମ୍ବଲପୁର ଗୋଷ୍ଠୀକେନ୍ଦ୍ର ବିଭିନ୍ନ ସମୟରେ ସ୍ବାସ୍ଥ୍ୟ ଶିବିର, ସଚେତନତା କାର୍ଯ୍ୟକ୍ରମ ଆଦି ବିଭିନ୍ନ ଜନ କଲ୍ୟାଣ କାର୍ଯ୍ୟ ସହିତ ଅନ୍ତର୍ଜାତୀୟ ଯୋଗ ଦିବସ, ସାମୂହିକ ବୃକ୍ଷ ରୋପଣ ଭଳି କାର୍ଯ୍ୟକ୍ରମ ମାଧ୍ୟମରେ ସ୍ଥାନୀୟ ବାସୀନ୍ଦାଙ୍କ ସହିତ ଦୃଢ଼ ଓ ସୁସମ୍ପର୍କ ସ୍ଥାପନ କରିବାରେ ସକ୍ଷମ ହୋଇଛି। ଆଜାଦି କା ଅମୃତ ମହୋତ୍ସବ କାର୍ଯ୍ୟକ୍ରମରେ ଗୋଷ୍ଠୀକେନ୍ଦ୍ର ଦ୍ୱାରା ସାଇକେଲ ଓ ବାଇକ୍ ରାଲି, ମିଲେଟ୍ ମେଳା, ପଥପ୍ରାନ୍ତ ନାଟକ ତଥା ସାଂସ୍କୃତିକ କାର୍ଯ୍ୟକ୍ରମ ଆଦି ଆୟୋଜନ ସହ ସ୍ବଚ୍ଛତାପକ୍ଷ ପାଳନ ଉପଲକ୍ଷେ ଆଖପାଖ ଗ୍ରାମାଞ୍ଚଳ, ସଡ଼କ, ସର୍ବସାଧାରଣ ସ୍ଥାନ, ସମସ୍ତ ଧର୍ମର ପୂଜାପାଠ, ଚେକପଏଣ୍ଟ ଆଦିର ସଫେଇ କାର୍ଯ୍ୟକ୍ରମ ମଧ୍ୟ ହାତକୁ ନେଇ ଉଚ୍ଚ ପ୍ରଶଂସିତ ହୋଇଛି।
