ସମ୍ବଲପୁର,୧୩ା୬(ବ୍ୟୁରୋ): ୨୦ବର୍ଷର ରେକର୍ଡ ଭାଙ୍ଗି ରାଜ୍ୟରେ ଉତ୍ତପ୍ତ ସହର ଭାବେ ପରିଗଣିତ ହୋଇଛି ସମ୍ବଲପୁର। ସୋମବାର ଏଠାରେ ତାପମାତ୍ରା ୪୬.୧ ଡିଗ୍ରୀ ସେଲସିୟସ ରେକର୍ଡ କରାଯାଇଛି। ୨୦୦୩ରେ ୪୬ ଡିଗ୍ରୀ ରେକର୍ଡ କରାଯାଇଥିଲା। ୧୯୯୮ରେ ତାପମାତ୍ରା ୪୬ ଡିଗ୍ରୀରୁ ଅଧିକ ରହିଥିବାବେଳେ ଅନେକ ଧନଜୀବନ ନଷ୍ଟ ହୋଇଥିଲା ା ପ୍ରାୟ ୧୫ଦିନ ହେଲା ସମ୍ବଲପୁର ଜିଲାରେ ୪୩ ଡିଗ୍ରୀରୁ ଅଧିକ ତାପମାତ୍ରା ରହୁଛି। ପ୍ରଚଣ୍ଡ ଗ୍ରୀଷ୍ମତାତି ଜନଜୀବନକୁ ଅସ୍ତବ୍ୟସ୍ତ କରିଦେଉଛି। କେବଳ ମଣିଷ ନୁହେଁ, ଗୃହପାଳିତ ପ୍ରାଣୀ, ବନ୍ୟପ୍ରାଣୀ ମଧ୍ୟ ସନ୍ତୁଳି ହେଉଛନ୍ତି। ଘରେ କୁଲର, ଏସି ଥିଲେ ମଧ୍ୟ ତାହା କାମରେ ଆସୁ ନାହିଁ। ଘରେ ଘରେ ଝାଡାବାନ୍ତି ଆକ୍ରାନ୍ତ ହେଉଛନ୍ତି ା ଆହୁରି ଏକସପ୍ତାହ ପର୍ଯ୍ୟନ୍ତ ଏଭଳି ତାତି ଲାଗିରହିବ ବୋଲି ପାଣିପାଗ ବିଭାଗ ସୂଚନା ଦେଉଥିବାରୁ ଲୋକମାନଙ୍କ ମନରେ ଭୟ ସୃଷ୍ଟି ହେଉଛି। ସକାଳ ହେଲା ମାତ୍ରେ ଅତି ଜରୁରୀ କାମ ସାରି ଲୋକମାନେ ଘର ଭିତରକୁ ଚାଲିଯାଉଛନ୍ତି। ପୂର୍ବାହ୍ନରୁ ସନ୍ଧ୍ୟା ହେବା ପର୍ଯ୍ୟନ୍ତ ରାସ୍ତାଘାଟ ଶୂନଶାନ ହୋଇଯାଇଛି। ଚଳିତ ଗ୍ରୀଷ୍ମ ସମୟରେ କାଳବୈଶାଖୀର ବିଶେଷ ପ୍ରଭାବ ଦେଖିବାକୁ ମିଳି ନ ଥିବାରୁ ଏଭଳି ଅବସ୍ଥା ଜାରି ରହିଛି। କଂକ୍ରିଟ୍ ଜଙ୍ଗଲ ସୃଷ୍ଟି ସାଙ୍ଗକୁ ପ୍ରାକୃତିକ ସମ୍ପଦର କ୍ଷୟ ଯୋଗୁ ଗ୍ରୀଷ୍ମର ପ୍ରକୋପ ଦେଖିବାକୁ ମିଳୁଛି। ସହରକୁ ଶୀତଳତା ପ୍ରଦାନ କରୁଥିବା ପ୍ରାୟ ୧୦୦ଟି ପୋଖରୀ ମଧ୍ୟରୁ ଅନେକ ରକ୍ଷଣାବେକ୍ଷଣ ଅଭାବରୁ ସମ୍ବଲପୁରର ତାପମାତ୍ରା ବଢ଼ି ଚାଲିଥିବା ବିଶେଷଜ୍ଞ ମତ ଦେଉଛନ୍ତି। ଜଳ ସଂରକ୍ଷଣ, ଭୂତଳ ଜଳର ସୁରକ୍ଷା ଓ ବ୍ୟାପକ ବୃକ୍ଷରୋପଣ ଦ୍ୱାରା ହିଁ ସହର ପରିବେଶ ଶୀତଳ ରଖାଯାଇପାରିବ। ସମ୍ବଲପୁର ସହର ଗତ କିଛିବର୍ଷ ହେଲା ବ୍ୟାପକ ଭାବରେ ସମ୍ପ୍ରସାରିତ ହୋଇଛି। ଏହି ସମୟରେ ସହରର ପୂର୍ବସ୍ଥିତି ବଜାୟ ରଖିବାକୁ ସାମୂହିକ ଉଦ୍ୟମ ଆବଶ୍ୟକ ବୋଲି ମତପ୍ରକାଶ ପାଉଛି।
