ମୁମ୍ବାଇ,୨୨।୨ : ବିହାରରୁ ସମତା ପାର୍ଟିର ଏକ ପ୍ରତିନିଧୀ ଦଳ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କୁ ଭେଟି ଉଦ୍ଧବ ଠାକରେଙ୍କ ନେତୃତ୍ୱରେ ଶିବସେନା ଦଳକୁ ଦିଆଯାଇଥିବା ମଶାଲ ଚିହ୍ନକୁ ଫେରାଇ ଆଣିବାରେ ସାହାଯ୍ୟ ଲୋଡିଛନ୍ତି। ଦଳର ସଭାପତି ଉଦୟ ମଣ୍ଡଳଙ୍କ ନେତୃତ୍ୱରେ ଏହି ପ୍ରତିନିଧି ଦଳ ଥାଣେର କାର୍ଯ୍ୟାଳୟରେ ଶିନ୍ଦେଙ୍କୁ ସାକ୍ଷାତ କରିଥିଲେ। ଶିନ୍ଦେଙ୍କ କାର୍ଯ୍ୟାଳୟ ଏକ ପ୍ରକାଶନ ମାଧ୍ୟମରେ ଏହି ସୂଚନା ପ୍ରଧାନ କରାଯାଇଛି ।
ନିର୍ବାଚନ ଆୟୋଗ (ଇସି) ଶିନ୍ଦେ ନେତୃତ୍ୱାଧୀନ ଦଳକୁ ପ୍ରକୃତ ଶିବସେନା ଭାବରେ ସ୍ବୀକୃତି ଦେଇ ଏହାର ଧନୁ ଓ ତୀର ଚିହ୍ନକୁ ପ୍ରଦାନ କରିବା ପରେ ସମତା ପାର୍ଟି ପକ୍ଷରୁ ଏଭଳି କରାଯାଇଛି। ସମତା ପାର୍ଟିର ପ୍ରତିନିଧୀ ଦଳ ଶିନ୍ଦେଙ୍କୁ କହିଛନ୍ତି ଯେ ଦଳ ବିହାରର ଏକ ପୁରୁଣା ରାଜନୈତିକ ପାର୍ଟି। ଏହାର ନିର୍ବାଚନ ଚିହ୍ନ ହେଉଛି ମଶାଲ।
୧୯୯୪ରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏବଂ ସ୍ବର୍ଗତ ନେତା ଜର୍ଜ ଫର୍ଣ୍ଣାଣ୍ଡିସଙ୍କ ଦ୍ୱାରା ଗଠିତ ସମତା ପାର୍ଟି ଗତ ବର୍ଷ ଅକ୍ଟୋବରରେ ଠାକରେଙ୍କ ଦଳକୁ ଚିହ୍ନ ପ୍ରଦାନ ବିରୁଦ୍ଧରେ ନିର୍ବାଚନ ଆୟୋଗରେ ଅଭିଯୋଗ କରିଥିଲା ଏବଂ ଏହା ବିରୋଧରେ ଆବେଦନ ଦିଲ୍ଲୀ ହାଇକୋର୍ଟକୁ ସ୍ଥାନାନ୍ତର କରିଥିଲା। କିନ୍ତୁ ଦଳର ନିର୍ବାଚନ ଚିହ୍ନ ସ୍ଥିର କରିବାର କୌଣସି ଅଧିକାର ନାହିଁ ବୋଲି କହି କୋର୍ଟ ଏହି ମାମଲାକୁ ଖାରଜ କରିଦେଇଥିଲେ। ୨୦୦୪ ମସିହାରେ ନିର୍ବାଚନ ଆୟୋଗଙ୍କ ଦ୍ୱାରା ସମତା ପାର୍ଟିର ମାନ୍ୟତା ରଦ୍ଦ କରାଯାଇଥିଲା।
