ଟୋକିଓ,୨୮।୭(ଏପି): ଟ୍ରାକ୍ କୋଚ୍ ଆଲବେର୍ଟୋ ସାଲାଜାର ଯୌନ ଓ ଭାବନାତ୍ମକ ଶୋଷଣ ଅଭିଯୋଗରେ ଆଜୀବନ ବାସନ୍ଦ ହୋଇଛନ୍ତି। ୟୁଏସ୍ ସେଣ୍ଟର ଫର୍ ସେଫ୍ସ୍ପୋର୍ଟ ଦ୍ୱାରା ସେ ସ୍ଥାୟୀ ଭାବେ ବାସନ୍ଦ ହୋଇଛନ୍ତି। ଏହି ବାସନ୍ଦାଦେଶ ବିରୋଧରେ ସାଲାଜାର ୧୦ ଦିନ ମଧ୍ୟରେ ଅପିଲ୍ କରିପାରିବେ। ତେବେ ଏ ନେଇ ହୋଇଥିବା ତଦନ୍ତ ସଂକ୍ରାନ୍ତରେ ସେଫ୍ସ୍ପୋର୍ଟ ସେଣ୍ଟର ଅଧିକ କିଛି ସୂଚନା ଦେଇନାହିଁ।
୨୦୧୯ରେ ମେରି କେନ, କାରା ଗୋଚର ଓ ଆମି ୟୋଡର ବେଗ୍ଲି ସାଲାଜାରଙ୍କ ବିପକ୍ଷରେ ଏଭଳି ଅଭିଯୋଗ ଆଣିଥିଲେ। ସେତେବେଳେ ଏହି ରନରମାନେ ନାଇକ ଓରେଗୋନ ପ୍ରୋଜେକ୍ଟ ଟିମ୍ରେ ସାମିଲ ଥିଲେ ଓ ସାଲାଜାରଙ୍କ ସହିତ କାର୍ଯ୍ୟ କରୁଥିଲେ। ପୂର୍ବରୁ ୨୦୨୦ରେ ସାଲାଜାରଙ୍କୁ ଅସ୍ଥାୟୀ ଭାବେ ବାସନ୍ଦ କରାଯାଇଥିଲା। ତେବେ ସୋମବାର ତାଙ୍କୁ ସ୍ଥାୟୀ ଭାବେ ବ୍ୟାନ୍ କରାଯାଇଛି। କ୍ରୀଡ଼ାରେ କୌଣସି ପ୍ରକାର ଶୋଷଣକୁ ବରଦାସ୍ତ କରାଯିବ ନାହିଁ ବୋଲି ଫେଡେରେଶନ ତରଫରୁ ସ୍ପଷ୍ଟ କରାଯାଇଛି। ୮୦ ଦଶକ ଆରମ୍ଭରେ ୬୨ ବର୍ଷୀୟ ସାଲାଜାର ବୋଷ୍ଟନ ଓ ନ୍ୟୁୟର୍କ ମାରାଥନରେ ଚାମ୍ପିୟନ ହୋଇଥିଲେ। ସେ ଅଲିମ୍ପିକ୍ ମେଡାଲିଷ୍ଟ ମୋ ଫରାହା ଓ ଗାଲେନ ରୁପ୍ଙ୍କ ଭଳି ଆଥ୍ଲେଟଙ୍କ କୋଚ ରହିଥିଲେ। ଏହି ବାସନ୍ଦାଦେଶ ନେଇ ସେ କୌଣସି ପ୍ରତିକ୍ରିୟା ପ୍ରକାଶ କରିନାହାନ୍ତି। ୨୦୧୯ରେ ମଧ୍ୟ ସେ ଡୋପିଂ ବ୍ୟାନ୍ର ସମ୍ମୁଖୀନ ହୋଇଥିଲେ।
