ସାକ୍ଷୀଗୋପାଳ,୨୯।୮(କିଶୋର ମହାପାତ୍ର/ ପ୍ରଶାନ୍ତ ବାରିକ): ପୁରୀ ଜିଲା ସାକ୍ଷୀଗୋପାଳ ଅଞ୍ଚଳରେ ବିଭିନ୍ନ ଉନ୍ନୟନ ପ୍ରକଳ୍ପ ରୁପରେଖ ନେଇ ସତ୍ୟବାଦୀ ବିଧାୟକ ଓମ୍ ପ୍ରକାଶ ମିଶ୍ର ଏବଂ ପୁରୀ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ଅନ୍ୟ ବିଭାଗୀୟ ଅଧିକାରୀ, ଯନ୍ତ୍ରୀ ଏବଂ ସ୍ଥାନୀୟ ଲୋକ ପ୍ରତିନିଧିମାନଙ୍କ ସହ ଶୁକ୍ରବାର ସାକ୍ଷୀଗୋପାଳ ଗସ୍ତ କରିଥିଲେ ।
ସାକ୍ଷୀଗୋପାଳ ମନ୍ଦିର ମୁଖ୍ୟ ରାସ୍ତାରେ ରେଳ ଓଭରବ୍ରିଜ ନିର୍ମାଣରେ କ୍ଷତିଗ୍ରସ୍ତ ବ୍ୟବସାୟୀଙ୍କୁ ଆର୍ଏମ୍ସି ମଧ୍ୟରେ ମାର୍କେଟ କମ୍ପ୍ଲେକ୍ସ କରି ଥଇଥାନ କରିବା ପାଇଁ ଭିତିଭୂମି ଅନୁଧ୍ୟାନ କରିଥିଲେ। ରେଳ ଓଭରବ୍ରିଜ ନିର୍ମାଣ ସ୍ଥଳ ପରିଦର୍ଶନ କରିବା ପରେ ସାକ୍ଷୀଗୋପାଳ ଠାକୁରଙ୍କ ଚନ୍ଦନ ପୋଖରୀର ଦୁରାବସ୍ଥା ସୁଧାର ଆଣିବା ସହ ପୁରାତନ ଧର୍ମଶାଳାର ପୁନରୁଦ୍ଧାର ଏବଂ ସଂଲଗ୍ନ ମାର୍କେଟ କମ୍ପ୍ଲେକ୍ସ ନେଇ ବିଧାୟକ ଓ ଜିଲାପାଳ ଅଧିକାରୀଙ୍କୁ ଖସଡ଼ା ପ୍ରସ୍ତୁତ ପାଇଁ ନିର୍ଦ୍ଦେଶ ଦେଇଥିଲେ।
ମନ୍ଦିର ପାରିପାଶର୍ବିକ ଉନ୍ନୟନ ପ୍ରକଳ୍ପ ଡିଜାଇନ ଦେଖିବା ପରେ ଏହାର ପରିବର୍ତ୍ତନ ସହିତ ସ୍ବଳ୍ପ ରକ୍ଷଣାବେକ୍ଷଣ ଦିଗପ୍ରତି ଦୃଷ୍ଟି ଦେବାକୁ ନିର୍ଦ୍ଦେଶ ଦେଇଥିଲେ। ପରେ ସତ୍ୟବାଦୀର ଦୁଇଟି ପୁରାତନ ବିଦ୍ୟାଳୟ ସତ୍ୟବାଦୀ ଉଚ୍ଚ ବିଦ୍ୟାଳୟ ଓ ସରକାରୀ ବାଳିକା ଉଚ୍ଚ ବିଦ୍ୟାଳୟର ଆବଶ୍ୟକ ବିକାଶ ପାଇଁ ଯନ୍ତ୍ରୀମାନଙ୍କୁ ପରାମର୍ଶ ଦେଇଥିଲେ।
ଓଡ଼ିଆ ବିଶ୍ୱବିଦ୍ୟାଳୟ ପରିଦର୍ଶନ କରି ବିଧାୟକ ମିଶ୍ର ଏହାର କଳେବର ବୃଦ୍ଧି ଓ ଗୁଣାତ୍ମକ ଶିକ୍ଷା ପ୍ରତି ରାଜ୍ୟ ସରକାର ୫୦ କୋଟି ବ୍ୟୟ ବରାଦ କରିଥିବା ଅବଗତ କରାଇଥିଲେ। ଏପରି କି ଏହାକୁ କେନ୍ଦ୍ର ବିଶ୍ବବିଦ୍ୟାଳୟ ଭାବେ ଗଢିତୋଳିବା ପାଇଁ କେନ୍ଦ୍ର ଶିକ୍ଷା ମନ୍ତ୍ରୀ ପ୍ରସ୍ତାବ ରଖିଥିବା କହିଥିଲେ।
ଐତିହାସିକ ବକୁଳନର ଜରାଜୀର୍ଣ୍ଣ ଅସ୍ଥା ଦେଖି ବିଧାୟକ ବିରକ୍ତି ପ୍ରକାଶ କରିବା ସହ ଏଥିପାଇଁ ପ୍ରସ୍ତୁତ ଡିଜାଇନର ବ୍ୟାପକ ପରିବର୍ତ୍ତନ କରିବା ପାଇଁ କହିଥିଲେ। ଏହାକୁ ପାଞ୍ଚ ଭାଗରେ ବିଭକ୍ତ କରାଯାଇ, ସ୍ଥାନୀୟ ଲୋକଙ୍କ ମତାମତକୁ ପ୍ରାଧାନ୍ୟ ଦେଇ ଡିଜାଇନ ପ୍ରସ୍ତୁତ କରିବାକୁ କହିବା ସହିତ ପରିଚାଳନା ନିମନ୍ତେ ଆୟଭିତିକ ପ୍ରକଳ୍ପରେ ପରିଣତ କରିବାକୁ ଜିଲାପାଳ କହିଥିଲେ। ପରେ ଅଧିକାରୀମାନଙ୍କ ସହ ଜିଲାପାଳ ଓ ବିଧାୟକ ମେଗା ପାନୀୟ ଜଳ ପ୍ରକଳ୍ପ ଅଗ୍ରଗତି ଓ ଐତିହ୍ୟ ଗ୍ରାମ ସୁଆଣ୍ଡୋ ଗସ୍ତ କରିଥିଲେ।
ସତ୍ୟବାଦୀ ତହସିଲଦାର ଆଲୋକ ଦେହୁରୀ, ବିଡ଼ିଓ ଲିପ୍ସା ରାୟ, ଥାନା ଆଇଆଇସି ଉମେଶ କୁମାର ସାହୁ, ନିର୍ବାହୀ ଯନ୍ତ୍ରୀ ସୁନ୍ଦର ମାଧବ ପାଢ଼ୀ, ସେବାୟତ ସଂଘ କର୍ମକର୍ତ୍ତା, ଜଳସେଚନ, ରାସ୍ତା ଓ ଗୃହନିର୍ମାଣ ବିଭାଗର ଯନ୍ତ୍ରୀଙ୍କ ସହିତ ଲୋକପ୍ରତିନିଧି ଉପସ୍ଥିତ ରହିଥିଲେ।
