ନୂଆଦିଲ୍ଲୀ,୪।୩ : ବ୍ୟାଡ୍ମିଣ୍ଟନରେ ଭାରତ ପାଇଁ ପ୍ରଥମ ଅଲିମ୍ପିକ୍ ପଦକ ଆଣିଥିବା ସାଇନା ନେହ୍ବାଲଙ୍କ ଜୀବନ ଉପରେ ଆଧାରିତ ବଲିଉଡ୍ ଫିଲ୍ମ ‘ସାଇନା’ ପୋଷ୍ଟରକୁ ସୋସିଆଲ ମିଡ଼ିଆରେ ପ୍ରବଳ ଟ୍ରୋଲ କରାଯାଉଛି। ଫିଲ୍ମର ଏକ ପୋଷ୍ଟରରେ ମୁଖ୍ୟ ଭୂମିକାରେ ଥିବା ଅଭିନେତ୍ରୀ ପରିଣିତି ଚୋପ୍ରା ବ୍ୟାଡ୍ମିଣ୍ଟନ ଭଳି ନୁହେଁ ଟେନିସ ଭଳି ସର୍ଭ କରିବା ପାଇଁ ଶଟଲକୁ ଉଚ୍ଚକୁ ଫୋପାଡ଼ୁଥିବା ଦେଖିବାକୁ ମିଳିଛି। ଏହା ହିଁ ଟ୍ରୋଲିଂର କାରଣ।
ବ୍ୟାଡ୍ମିଣ୍ଟନରେ ସର୍ଭ କଲାବେଳେ ଶଟଲକୁ ଉପରକୁ ଫୋପାଡ଼ା ଯାଏନାହିଁ। ନିୟମ ଅନୁସାରେ ବ୍ୟାଡ୍ମିଣ୍ଟନରେ ଅଣ୍ଟା ତଳୁ ସର୍ଭ କରାଯାଏ। ପିଲ୍ମ ପୋଷ୍ଟରରେ ଏଭଳି ତ୍ରୁଟିକୁ ଟ୍ରୋଲ କରାଯାଉଛି। ତେବେ ଫିଲ୍ମ ନିର୍ଦ୍ଦେଶକ ଅମୋଲ ଗୁପ୍ତେ ଫେସବୁକ ପ୍ରୋଫାଇଲରେ ଏହାର ଜବାବ ରଖିଛନ୍ତି। ”ପୋଷ୍ଟର ସମ୍ପର୍କରେ ଡିଜିଟାଲ ମିଡିଆରେ ଖୁବ୍ କଳ୍ପନାଜଳ୍ପନା ହେଉଛି। ଟେନିସ ସର୍ଭ ଭଳି ଦେଖାଯାଉଛି। ସାଇନା, ସାନିଆଙ୍କ ଭଳି ଖେଳୁଛନ୍ତି। ଇତ୍ୟାଦି, ଇତ୍ୟାଦି.. ଯଦି ସାଇନା ଉଡୁଥିବା ଶଟଲ ହୁଅନ୍ତି, ତେବେ ଏହା ସ୍ପଷ୍ଟ ଯେ, ଜଣେ ଆଶାୟୀ ସାଇନାଙ୍କ ଉଚ୍ଚତାରେ ପହଞ୍ଚିବାକୁ ଚାହୁଁଛନ୍ତି“ ବୋଲି ପୋଷ୍ଟ କରିଛନ୍ତି ଫିଲ୍ମ ନିର୍ଦ୍ଦେଶକ। ତେବେ ଉକ୍ତ ପୋଷ୍ଟର ଖୁବ୍ ଉଚ୍ଚ ବିଚାର ଧାରାକୁ ଦର୍ଶାଉଛି ବୋଲି ସେ କହିଛନ୍ତି।
