ହାଟଡିହୀ,୩୦l୯(ଶୁଭକାନ୍ତ ନାୟକ):କେନ୍ଦୁଝର ଜିଲା ହାଟଡିହୀ ସୁନ୍ଦରାପାଳଠାରେ ଥିବା ଆଦର୍ଶ ବିଦ୍ୟାଳୟର ଜଣେ ଅଷ୍ଟମ ଶ୍ରେଣୀ ଛାତ୍ର ମଙ୍ଗଳବାର ପୋଖରୀରେ ଗାଧୋଉଥିବା ବେଳେ ପାଣିରେ ବୁଡି ମୃତ୍ୟୁବରଣ କରିଛନ୍ତି l ସେ ହେଉଛନ୍ତି ବିଷ୍ଣୁପୁର ଗ୍ରାମର ସୁଶାନ୍ତ ଜେନାଙ୍କ ପୁଅ ସାଇ ପ୍ରସାଦ (୧୩ ବର୍ଷ) ଅଟନ୍ତି l ସାଇ ପ୍ରସାଦ ବିଦ୍ୟାଳୟଠାରୁ ପ୍ରାୟ ୧୦ କିମି ଦୂର ଆନନ୍ଦପୁର-ଭଦ୍ରକ ୫୩ନଂ ରାଜ୍ୟ ରାଜପଥର ଜଳକଳଙ୍ଗ ବଜାରରେ ଏକ ଘରୋଇ ଛାତ୍ରବାସରେ ଅନ୍ୟ ଛାତ୍ରମାନଙ୍କ ସହ ମିଶି ରୁହନ୍ତି l ପ୍ରତିଦିନ ଛାତ୍ରବାସରୁ ବିଦ୍ୟାଳୟକୁ ଯିବା ଆସିବା କରନ୍ତି l କିନ୍ତୁ ବର୍ତ୍ତମାନ ଦଶହରା ଉପଲକ୍ଷେ ବିଦ୍ୟାଳୟ ଛୁଟି ଥିବାରୁ ସାଇ ପ୍ରସାଦ ଘରକୁ ପଳାଇ ଆସିଥିଲେ। କିନ୍ତୁ ମଙ୍ଗଳବାର ପରିବାର ଲୋକ ତାଙ୍କୁ ନେଇ ଛାତ୍ରବାସରେ ଛାଡିକି ଆସିଥିଲେ। ମଙ୍ଗଳବାର ଅନ୍ୟ ଦୁଇ ଛାତ୍ରଙ୍କ ସହ ସାଇ ପ୍ରସାଦ ନିକଟସ୍ଥ ଜଳକଳଙ୍ଗ ଗ୍ରାମ ପୋଖରୀକୁ ଗାଧୋଇବାକୁ ଯାଇଥିଲେ l ଗାଧୋଇବା ସମୟରେ ସାଇ ପ୍ରସାଦ ପୋଖରୀ ଭିତରକୁ ଚାଲିଯାଇ ପାଣିରେ ବୁଡି ଯାଇଥିଲେ l ଅନ୍ୟ ଦୁଇ ଛାତ୍ରଙ୍କଠାରୁ ଖବର ପାଇ ସ୍ଥାନୀୟ ଲୋକ ନନ୍ଦିପଦା ପୋଲିସ ଏବଂ ହାଟଡିହୀ ଦମକଳ ବାହିନୀକୁ ସୂଚନା ଦେଇଥିଲେ। ପୋଲିସ ଏବଂ ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ଦୀର୍ଘ ସମୟ ଖୋଜାଖୋଜି ପରେ ଦମକଳ ବାହିନୀ ପାଣି ଭିତରେ ବୁଡିକି ରହିଥିବା ସାଇ ପ୍ରସାଦଙ୍କୁ ଉଦ୍ଧାର କରି ପ୍ରଥମେ ହାଟଡିହୀ ଏବଂ ପରେ ଆନନ୍ଦପୁର ଉପଖଣ୍ଡ ମେଡିକାଲକୁ ନେଇଥିଲେ l ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ l ନନ୍ଦିପଦା ପୋଲିସ ଶବ ଜବତ କରି ବ୍ୟବଚ୍ଛେଦ କରାଇଛି l ଅପମୃତ୍ୟୁ ମାମଲା ନଂ ୧୩/୨୦୨୫ରେ ଏକ ମାମଲା ରୁଜୁ କରାଯାଇ ତଦନ୍ତ ଚାଲିଥିବା ଥାନା ଅଧିକାରୀ ରବିନ୍ଦ୍ର ପାତ୍ର କହିଛନ୍ତି l
