ଢେଙ୍କାନାଳ ଅଫିସ, ୧୦।୧୦
ଢେଙ୍କାନାଳରେ ଥିବା ଭାରତୀୟ କ୍ରୀଡ଼ା ପ୍ରାଧିକରଣ (ସାଇ) ଛାତ୍ରାବାସ ‘ଖେଲୋ ଇଣ୍ଡିଆ’ ଅଧୀନକୁ ଯିବ। ଏ ନେଇ ପ୍ରକ୍ରିୟା ଆରମ୍ଭ ହୋଇଥିବାବେଳେ ଗୁରୁବାର ରାଜ୍ୟ ସରକାରଙ୍କ କ୍ରୀଡ଼ା ବିଭାଗର ଏକ ପ୍ରତିନିଧି ମଣ୍ଡଳୀ ପରଖିଛନ୍ତି। ସେମାନେ ଭାରତ ସରକାରଙ୍କ ‘ଖେଲୋ ଇଣ୍ଡିଆ’ ବିଭାଗକୁ ରିପୋର୍ଟ ଦେବା ପରେ ଏ ସଂକ୍ରାନ୍ତରେ ବିଧିବଦ୍ଧ ଭାବେ ପଦକ୍ଷେପ ଆରମ୍ଭ ହେବ। ସେହିପରି ଛାତ୍ରାବାସରେ କେବଳ ରେସ୍ଲିଂ ପ୍ରଶିକ୍ଷଣ ଦିଆଯିବା ଲାଗି ‘ଖେଲୋ ଇଣ୍ଡିଆ’ ପକ୍ଷରୁ ନିଷ୍ପତ୍ତି ହୋଇଥିବାବେଳେ ଆବଶ୍ୟକ ଭିତ୍ତିଭୂମି ଥିବାରୁ ଏଥିରେ କବାଡ଼ି ଏବଂ ଭାରୋତ୍ତୋଳନକୁ ଯୋଡ଼ିବାକୁ ଜିଲା କ୍ରୀଡ଼ା ବିଭାଗ ପକ୍ଷରୁ ପ୍ରସ୍ତାବ ଦିଆଯାଇଛି।
୧୯୯୧ରେ ଢେଙ୍କାନାଳରେ ଆରମ୍ଭ ହୋଇଥିଲା ସାଇ କ୍ରୀଡ଼ା ଛାତ୍ରାବାସ। ସେତେବେଳେ ଏହାର ନିଜସ୍ବ ହଷ୍ଟେଲ ଏବଂ କାର୍ଯ୍ୟାଳୟ ନ ଥିଲା। ୧୯୯୮ ଅକ୍ଟୋବର ୬ରେ ତତ୍କାଳୀନ ମୁଖ୍ୟମନ୍ତ୍ରୀଙ୍କ ଦ୍ୱାରା ଛାତ୍ରାବାସର ନିଜସ୍ବ ଗୃହ ଏବଂ କାର୍ଯ୍ୟାଳୟ ଉଦ୍ଘାଟିତ ହୋଇଥିଲା। ପ୍ରାରମ୍ଭରେ କ୍ରୀଡ଼ା ଛାତ୍ରାବାସ ଅଧୀନରେ ଅନ୍ତେବାସୀଙ୍କୁ କେବଳ ଫୁଟବଲ ପ୍ରଶିକ୍ଷଣ ଦିଆଯାଉଥିଲା। ଏଠାରୁ ତାଲିମପ୍ରାପ୍ତ କ୍ରୀଡ଼ାବିତ୍ମାନେ ଜାତୀୟସ୍ତରରେ ପ୍ରଭାବୀ ପ୍ରଦର୍ଶନ କରି ଆସୁଥିଲେ। ଏହାସତ୍ତ୍ୱେ ପରିଚାଳନାଗତ ତ୍ରୁଟି ଯୋଗୁ ପରବର୍ତ୍ତୀ ସମୟରେ ଏଠାରୁ ଫୁଟବଲକୁ ଉଠାଇ ନିଆଗଲା। ସେହିପରି ରବି କୁମାରଙ୍କ ଭଳି ଜାତୀୟସ୍ତରର ଖେଳାଳି ଛାତ୍ରାବାସରୁ ଭାରୋତ୍ତୋଳନ ତାଲିମ ନେଉଥିଲେ। ତେବେ ଚଳିତବର୍ଷ କେବଳ ରେସଲିଂ ପାଇଁ ଖେଳାଳି ଚୟନ କରାଯାଇଛି। କବାଡ଼ି ଏବଂ ଭାରୋତ୍ତୋଳନ ପାଇଁ ଖେଳାଳି ଚୟନ ହୋଇ ନ ଥିବାରୁ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ସୂଚନାଯୋଗ୍ୟ, ଏବେ କ୍ରୀଡ଼ା ଛାତ୍ରାବାସରେ ୫୦ଜଣ ଅନ୍ତେବାସୀ ରହିବା ଭଳି ବ୍ୟବସ୍ଥା ଅଛି। ସେହିପରି କବାଡ଼ି, ଭାରୋତ୍ତୋଳନ ଏବଂ ରେସଲିଂ ପାଇଁ ଆବଶ୍ୟକ ଭିତ୍ତିଭୂମି ରହିଛି। ତେଣୁ ପ୍ରତି ବିଭାଗରୁ ୧୫ ଜଣ ଲେଖାଏ ଚୟନ କରି ପ୍ରଶିକ୍ଷଣ ଦେବାକୁ ପ୍ରସ୍ତାବ ଦିଆଯାଇଛି। ସେହିପରି କ୍ରୀଡ଼ା ଛାତ୍ରାବାସରେ ସ୍ଥାୟୀ ଇନ୍ଚାର୍ଜ ନ ଥିବାରୁ ସମସ୍ୟା ଉପୁଜୁଛି। ଏହାର ସମାଧାନ କରିବାକୁ କ୍ରୀଡ଼ାପ୍ରେମୀମାନେ ଦାବି କରିଛନ୍ତି।
ଏ ସଂକ୍ରାନ୍ତରେ ଜିଲା କ୍ରୀଡ଼ା ଅଧିକାରୀ ପ୍ରଦୀପ କୁମାର ମହାନ୍ତି କୁହନ୍ତି, ଭାରତ ସରକାରଙ୍କ ଦ୍ୱାରା ‘ଖେଲୋ ଇଣ୍ଡିଆ’ ମାଧ୍ୟମରେ ବିଭିନ୍ନ ଖେଳକୁ ପ୍ରୋତ୍ସାହିତ କରାଯାଉଛି। ରେସ୍ଲିଂ ପାଇଁ ଢେଙ୍କାନାଳ ସାଇ କ୍ରୀଡ଼ା ଛାତ୍ରାବାସକୁ ଖେଲୋ ଇଣ୍ଡିଆ ଅଧୀନରେ ଏକ ଜୋନ୍ କରିବାକୁ ପ୍ରସ୍ତାବ ରହିଛି। ସେଥିପାଇଁ ରାଜ୍ୟ କ୍ରୀଡା ବିଭାଗ ଅଧିକାରୀମାନେ ଭିତ୍ତିଭୂମି ଯାଞ୍ଚ କରିଛନ୍ତି। ଆବଶ୍ୟକ ସୁବିଧା ଥିବାରୁ ରେସ୍ଲିଂ, କବାଡ଼ି ଏବଂ ଭାରୋତ୍ତୋଳନରେ ୧୫ ଜଣ ଲେଖାଏ ଖେଳାଳିଙ୍କୁ ପ୍ରଶିକ୍ଷଣରେ ସାମିଲ କରିବାକୁ ପ୍ରସ୍ତାବ ଦିଆଯାଇଥିବା ସେ ସୂଚନା ଦେଇଛନ୍ତି।
