ପାରଳାଖେମୁଣ୍ଡି,୨୧ା୩(ଡି.ଏନ୍.ଏ.): ଗଜପତି ଜିଲା ସଦର ମହକୁମା ପାରଳାଖେମୁଣ୍ଡି ଠାରେ ରବିବାର ସାଇ ଇଣ୍ଟରନ୍ୟାଶନାଲ ହୋଟେଲ ଉଦ୍ଘାଟିତ ହୋଇଯାଇଛି। ଗଜପତି ଜିଲାପାଳ ଲିଙ୍ଗରାଜ ପଣ୍ଡା ମୁଖ୍ୟଅତିଥି ଭାବେ ଯୋଗ ଦେଇ ଏହାର ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଜିଲା ଆରକ୍ଷୀ ଅଧିକ୍ଷକ ଏସ୍.ସ୍ବାତି କୁମାର ସମେତ ବହୁ ବିଶିଷ୍ଠ ବ୍ୟକ୍ତି ବିଶେଷ ସମ୍ମାନିତ ଅତିଥିଭାବେ ଯୋଗଦେଇଥିଲେ। ବିଶେଷ କରି ଶିଳ୍ପବିହୀନ ଗଜପତି ଜିଲାରେ ପର୍ଯ୍ୟଟନ ଏକମାତ୍ର ଉତ୍ସ ହୋଇଥିବା ବେଳେ ପର୍ଯ୍ୟଟକଙ୍କ ରହିବା ଏବଂ ବୁଲିବାର କୌଣସି ସୁବିଧା ନ ଥିଲା। ହେଲେ ସାଇ ଇଣ୍ଟରନ୍ୟାଶନାଲ ହୋଟେଲ ଉଦ୍ଘାଟନ ହେବାରୁ ବର୍ତ୍ତମାନ ପର୍ଯ୍ୟଟକମାନେ ସମସ୍ତ ସୁବିଧା ପାଇପାରିବେ। ଏଠାରେ ପର୍ଯ୍ୟଟକଙ୍କୁ ଆରାମଦାୟକ ରହିବା, ଖାଇବା, ପିଇବାର ସମସ୍ତ ବ୍ୟବସ୍ଥା ରହିଛି। ଜିଲାରେ ପ୍ରଥମ ଥର ପାଇଁ ତିନିତାରକା ହୋଟେଲ ଖୋଲିଛି। ଜିଲା ପ୍ରଶାସନ ପକ୍ଷରୁ ଉଦ୍ୟୋଗର ବିକାଶ କ୍ଷେତ୍ରରେ ରାଜ୍ୟ ସରକାରଙ୍କ ତରଫରୁ ସମସ୍ତ ସହଯୋଗ ଯୋଗାଇ ଦିଆଯିବ ବୋଲି ଜିଲାପାଳ କହିଛନ୍ତି।
