ଢେଙ୍କାନାଳ ଅଫିସ, ୩।୩ – ଜୈବ ବିବିଧତା ଏବଂ ବନ୍ୟପ୍ରାଣୀ ସମ୍ଭାରରେ ଭରପୂର କପିଳାସ ଅଭୟାରଣ୍ୟରେ ଖୁବ୍ଶୀଘ୍ର ସଫାରିର ମଜା ନେବେ ପର୍ଯ୍ୟଟକ। ଏଥିଲାଗି ବନ ବିଭାଗ ପକ୍ଷରୁ ଆରମ୍ଭ ହୋଇଛି ପ୍ରସ୍ତୁତି। ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ପ୍ରସିଦ୍ଧ ଶୈବପୀଠ କପିଳାସକୁ ଆସୁଥିବା ପର୍ଯ୍ୟଟକମାନେ ଅଭୟାରଣ୍ୟ ଭିତରେ ଗାଡ଼ିରେ ବୁଲି ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିବା ସହିତ ଖୁବ୍ ନିକଟରୁ ବନ୍ୟପ୍ରାଣୀଙ୍କୁ ଦେଖିପାରିବେ। ଯାତ୍ରୀଙ୍କ ନିକଟରୁ ଆଦାୟ ଶୁଳ୍କ ସ୍ଥାନୀୟ ଅଞ୍ଚଳ ବିକାଶରେ ଲାଗିବ। ଏହାଦ୍ୱାରା ଢେଙ୍କାନାଳ ଜିଲାର ପର୍ଯ୍ୟଟନକୁ ନୂଆ ଦିଗ ମିଳିବ ବୋଲି ଆଶା ସଞ୍ଚାର ହୋଇଛି।
୧୨୫୫୯.୫୯ ହେକ୍ଟର ପରିମିତ ଅଞ୍ଚଳରେ ପରିବ୍ୟାପ୍ତ କପିଳାସର ବିସ୍ତୃତ ଘଞ୍ଚ ଜଙ୍ଗଲକୁ ୨ ଏପ୍ରିଲ ୨୦୧୧ରେ ମିଳିଥିଲା ଅଭୟାରଣ୍ୟ ମାନ୍ୟତା। ଏହି ସଂରକ୍ଷିତ ଜଙ୍ଗଲରେ ପର୍ଯ୍ୟଟନର ଅପାର ସମ୍ଭାବନା ରହିଛି। ଶିମିଳିପାଳ, ସାତକୋଶିଆ ଭଳି କପିଳାସ ଅଭୟାରଣ୍ୟରେ ପର୍ଯ୍ୟଟକ ଅନୁକୂଳ ବାତାବରଣ ସୃଷ୍ଟି କରାଗଲେ ପର୍ଯ୍ୟାପ୍ତ ପୁଞ୍ଜି ପ୍ରବାହ ହେବ। ଏଥିରୁ ଜିଲା ପର୍ଯ୍ୟଟନକୁ ଆର୍ଥିକ ବଳ ମିଳିବ। ତେଣୁ ଅଭୟାରଣ୍ୟରେ ସଫାରି ସୁବିଧା କରିବାକୁ ଯୋଜନା କରୁଛି ବନ ବିଭାଗ। ଅଭୟାରଣ୍ୟ ଭିତରେ ୱାଚଟାୱାର ମଧ୍ୟ ନିର୍ମାଣ କରାଯିବ। ଏହା ଉପରୁ ପର୍ଯ୍ୟଟକମାନେ ପ୍ରକୃତିର ଅପରୂପ ସୌନ୍ଦର୍ଯ୍ୟକୁ ଭଲଭାବେ ଉପଭୋଗ କରିପାରିବେ। ସେହିପରି ବିଶ୍ରାମସ୍ଥଳ, ସ୍ନାକ୍ସ ବ୍ୟବସ୍ଥା, ପାନୀୟଜଳ ସୁବିଧା ରହିବ। ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ପ୍ରବେଶ ପଥରେ ସୁନ୍ଦର ଫାଟକ ନିର୍ମାଣ ହେବ। ଏହାର ନିକଟରେ ସଫାରି ପାଇଁ ଟିକେଟ କାଉଣ୍ଟର ରହିବ। ଏଥିରୁ ଉପାର୍ଜିତ ଅର୍ଥକୁ ଅଭୟାରଣ୍ୟ ପାର୍ଶ୍ୱବର୍ତ୍ତୀ ଗ୍ରାମର ବିକାଶରେ ଖର୍ଚ୍ଚ କରାଯିବ। ଏହାଦ୍ୱାରା ସ୍ଥାନୀୟ ବାସିନ୍ଦାଙ୍କ ଅଭୟାରଣ୍ୟର ସୁରକ୍ଷା ପ୍ରତି ଦାୟିତ୍ୱବୋଧ ବଢ଼ିବ। ଶିକାର ଏବଂ ଚୋରା କାଠ ବ୍ୟବସାୟକୁ ରୋକାଯାଇପାରିବ।
ହାତୀ, ହରିଣ, ଭାଲୁ, ଶମ୍ବର, କୁଟୁରା, ବାର୍ହା, ପାହାଡ଼ି ମୂଷା, ଝିଙ୍କ, ବିଭିନ୍ନ ପ୍ରଜାତିର ପକ୍ଷୀ, ସରୀସୃପଙ୍କ ପ୍ରାକୃତିକ ଆବାସସ୍ଥଳୀ ହେଉଛି କପିଳାସ ଅଭୟାରଣ୍ୟ। ସେହିପରି ଶାଳ, ଶାଗୁଆନ, କୁରୁମ, ଧଉରା, ଫାସି ପ୍ରଜାତିର ଅନେକ ଗଛ ରହିଛି। ଏଠାରେ ଥିବା ଔଷଧୀୟ ଉଦ୍ୟାନ ପର୍ଯ୍ୟଟକଙ୍କୁ ଆକର୍ଷିତ କରିଥାଏ। ସେହିପରି ବନ ବିଭାଗ ଉଦ୍ୟମରେ ଟ୍ରେକିଂ ପାଇଁ ୫ କିଲୋମିଟର ଦୀର୍ଘ ପ୍ରାକୃତିକ ଚଲାପଥର ବିକାଶ କରାଯାଇଛି। ଏହି ରାସ୍ତା ସିଧାସଳଖ କପିଳାସ ଶୈବପୀଠକୁ ଯୋଡୁଛି। ତେବେ କିଛିବର୍ଷ ହେଲା ଅଭୟାରଣ୍ୟରେ ଶିକାରୀ ଏବଂ କାଠଚୋରଙ୍କ ପ୍ରାଦୁର୍ଭାବ ବଢ଼ିଛି। ଗତ ୪ମାସରେ ୫୦ରୁ ଊର୍ଦ୍ଧ୍ୱ ଶିକାରୀ ଧରାପଡ଼ିଥିବାବେଳେ ସେମାନଙ୍କ ନିକଟରୁ ୨୦ ବନ୍ଧୁକ ଜବତ ହୋଇଛି। ପର୍ଯ୍ୟଟନରେ ସ୍ଥାନୀୟ ଲୋକଙ୍କୁ ଯୋଡ଼ିଲେ ଶିକାରୀ ଏବଂ କାଠମାଫିଆଙ୍କ କବଳରୁ ଅଭୟାରଣ୍ୟକୁ ସୁରକ୍ଷିତ ରଖାଯାଇପାରିବ। ତେଣୁ ସଫାରି ଲାଗି ବନ ବିଭାଗ ଯୋଜନା ପ୍ରସ୍ତୁତ କରୁଥିବା ଜଣାପଡ଼ିଛି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି କୁହନ୍ତି, କପିଳାସ ଅଭୟାରଣ୍ୟରେ ସଫାରି ପାଇଁ ପ୍ରସ୍ତୁତି ଆରମ୍ଭ ହୋଇଛି। ଏଥିପାଇଁ ଅଞ୍ଚଳବାସୀଙ୍କୁ ନେଇ ବୈଠକ କରାଯିବ। ଆଦାୟ ଅର୍ଥ ଅଞ୍ଚଳର ବିକାଶରେ ଲାଗିବ। ଫଳରେ ଅଭୟାରଣ୍ୟର ସୁରକ୍ଷା ପାଇଁ ସେମାନଙ୍କ ଦାୟିତ୍ୱବୋଧ ଓ ଆତ୍ମୀୟତା ବଢ଼ିବା। ତା’ ସାଙ୍ଗକୁ ଶିକାରୀ, କାଠମାଫିଆଙ୍କ କବଳରୁ ଜଙ୍ଗଲକୁ ସୁରକ୍ଷିତ ରଖାଯାଇପାରିବ।
