ଶାରଜା,୩।୧୦: ଶାରଜା ଷ୍ଟାଡିୟମରେ ରବିବାର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଓ ପଞ୍ଜାବ କିଙ୍ଗ୍ସ ମଧ୍ୟରେ ଖେଳାଯାଇଥିବା ମ୍ୟାଚ୍ରେ ଏକ ଭୁଲ ନିଷ୍ପତ୍ତି କାରଣରୁ ଥାର୍ଡ ଅମ୍ପାୟାରଙ୍କୁ ବିଦା କରିବା ପାଇଁ ଟୁଇଟରରେ ଦାବି ଉଠିଛି। ପଞ୍ଜାବର ସ୍ପିନର ରବି ବିଷ୍ଣୋଇଙ୍କ ଏକ ବଲକୁ ରିଭର୍ସ ସୁଇପ୍ ଲଗାଇବାକୁ ଉଦ୍ୟମ କରିଥିଲେ ଆରସିବିର ଓପନର ଦେବଦତ୍ତ ପାଡିକଲ। ହେଲେ ବଲ ତାଙ୍କ ଗ୍ଲୋଭ୍ସରେ ବାଜିବା ପରେ ଉଇକେଟକିପର ଲୋକେଶ ରାହୁଲ କ୍ୟାଚ୍ ଧରିଥିଲେ। ବୋଲର ବିଷ୍ଣୋଇ ଓ ରାହୁଲ ଆଉଟ୍ ପାଇଁ ଅପିଲ କରିଥିଲେ, ଯାହାକୁ ପ୍ରତ୍ୟାଖ୍ୟାନ କରି ଦେଇଥିଲେ ଫିଲ୍ଡ ଅମ୍ପାୟାର। ଫଳରେ ରାହୁଲ ରିଭ୍ୟୁ ନେଇଥିଲେ। ରିପ୍ଲେରେ ବଲ ପାଡିକଲଙ୍କ ଗ୍ଲୋଭ୍ସ ଅତିକ୍ରମ କଲା ବେଳେ ଏକ ସ୍ପାଇକ୍ ଦେଖାଯାଇଥିଲା। ଏହାସତ୍ତ୍ୱେ ଟିଭି ଅମ୍ପାୟାର କେ ଶ୍ରୀନିବାସନ ବ୍ୟାଟ୍ସମ୍ୟାନଙ୍କୁ କ୍ଲିନଚିଟ୍ ଦେଇଥିଲେ।
ଥାର୍ଡ ଅମ୍ପାୟାରଙ୍କ ଏଭଳି ନିଷ୍ପତ୍ତିକୁ ଗ୍ରହଣ କରିପାରି ନ ଥିଲେ ରାହୁଲ। ସେ ‘ନଟ୍ ଆଉଟ୍’ ନିଷ୍ପତ୍ତି ସମ୍ପର୍କରେ ଫିଲ୍ଡ ଅମ୍ପାୟାର ଅନନ୍ତପଦ୍ମନାଭମଙ୍କ ସହ କଥା ହୋଇଥିଲେ। ରାହୁଲଙ୍କ ଭଳି ଥାର୍ଡ ଅମ୍ପାୟାରଙ୍କ ନିଷ୍ପତ୍ତିକୁ ହଜମ କରିପାରି ନ ଥିଲେ ସୋସିଆଲ ମିଡିଆ ୟୁଜର୍ସ। କିଛି ପ୍ରଶଂସକ ଥାର୍ଡ ଅମ୍ପାୟାରଙ୍କୁ ତୁରନ୍ତ ବିଦା କରିବାକୁ ଦାବି କରିଛନ୍ତି। ଥାର୍ଡ ଅମ୍ପାୟାରଙ୍କ ନିଷ୍ପତ୍ତି ଉପରେ ପ୍ରଶ୍ନ ଉଠାଇଥିବା ୟୁଜର୍ସଙ୍କ ମଧ୍ୟରେ ରହିଛନ୍ତି ପୂର୍ବତନ କ୍ରିକେଟର ତଥା ଭାଷ୍ୟକାର ଆକାଶ ଚୋପ୍ରା, କ୍ରିସ ଶ୍ରୀକାନ୍ଥ ଓ ପଞ୍ଜାବ କିଙ୍ଗ୍ସ ଫ୍ରାଞ୍ଚାଇଜ।
