ନୂଆଦିଲ୍ଲୀ,୨୦।୮ : ଅନ୍ତର୍ଜାତୀୟ କ୍ରିକେଟର ଦିନିକିଆ ଓ ଟେଷ୍ଟ ଫର୍ମାଟରେ ସର୍ବାଧିକ ଶତକ ହାସଲ କରିଥିବା ବ୍ୟାଟିଂ କିମ୍ବଦନ୍ତୀ ସଚିନ ତେନ୍ଦୁଲକର ଅଫ୍ ସ୍ପିନ ଖେଳିବାରେ ଟିକେ ଦୁର୍ବଳ ଥିଲେ। ଏଭଳି ମନ୍ତବ୍ୟ ଦେଇଛନ୍ତି ଶ୍ରୀଲଙ୍କାର କିମ୍ବଦନ୍ତୀ ସ୍ପିନର ମୁଥିଆ ମୁରଲିଧରଣ। ଆଇସିସି କ୍ରିକେଟ ହଲ୍ ଅଫ୍ ଫେମର ସଦସ୍ୟ ମୁରଲିଧରଣଙ୍କ ନାମରେ ରହିଛି ସର୍ବାଧିକ ୮୦୦ ଟେଷ୍ଟ ଓ ୫୩୦ ଦିନିକିଆ ଉଇକେଟ।
ଉଲ୍ଲେଖଯୋଗ୍ୟ, ଅନ୍ତର୍ଜାତୀୟ କ୍ରିକେଟରେ ମୁରଲିଧରଣ ୧୩ ଥର ସଚିନଙ୍କୁ ଆଉଟ୍ କରିଥିଲେ। ତେବେ ସଚିନଙ୍କୁ ସର୍ବାଧିକ ୧୪ଥର ଆଉଟ୍ କରିଥିଲେ ଅଷ୍ଟ୍ରେଲିଆର ପୂର୍ବତନ ପେସର ବ୍ରେଟ ଲି।
ସଚିନଙ୍କୁ ବୋଲିଂ କରିବାବେଳେ କିଛି ଭୟ ରହୁ ନ ଥିଲା। କାରଣ ସେ ବୀରେନ୍ଦ୍ର ସେହ୍ବାଗଙ୍କ ଭଳି ଆଟାକିଂ ଖେଳନ୍ତି ନାହିଁ। ସେ ବଲକୁ ଭଲ ସେ ପଢ଼ନ୍ତି ଓ ତା’ ପରେ ଶଟ୍ ଖେଳନ୍ତି। ମୋ ମତରେ ଅଫ୍ ସ୍ପିନକୁ ଖେଳିବାରେ ସଚିନ ଟିକେ ଦୁର୍ବଳ ଥିଲେ। ସେ ଲେଗ୍ ସ୍ପିନ ବିରୋଧରେ ବଡ଼ ଶଟ୍ ଖେଳନ୍ତି। କିନ୍ତୁ ଅଫ୍ ସ୍ପିନରଙ୍କ ସମ୍ମୁଖୀନ ହେବା ତାଙ୍କ ପାଇଁ ଟିକେ କଷ୍ଟକର ଥିଲା। କାରଣ ମୋ ଭଳି ବହୁ ଅଫ୍ ସ୍ପିନର ବହୁବାର ସଚିନଙ୍କୁ ଆଉଟ୍ କରିଛନ୍ତି। ତାଙ୍କ ଦୁର୍ବଳତା ଯୋଗୁ ମୁଁ ଫାଇଦାରେ ରହୁଥିଲି। ମାତ୍ର ସଚିନଙ୍କୁ ଆଉଟ୍ କରିବା ଖୁବ୍ କଷ୍ଟକର ବୋଲି ମୁରଲିଧରଣ କହିଛନ୍ତି।
