ମୁମ୍ବାଇ,୧୯।୭(ପି.ଟି.): ପୂର୍ବତନ କ୍ରିକେଟର ସବା କରିମ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କ୍ରିକେଟ ଅପରେଶନ ଜେନେରାଲ ମ୍ୟାନେଜର ପଦରୁ ଇସ୍ତଫା ଦେଇଛନ୍ତି। ତାଙ୍କ ପଦରୁ ଇସ୍ତାଫା ଦେବା ପାଇଁ କୁହାଯାଇଥିଲା। ବୋର୍ଡ ମୁଖ୍ୟ କାର୍ଯ୍ୟନିର୍ବାହୀ ରାହୁଲ ଜୋହରି ଇସ୍ତଫା ଦେବାର ଗୋଟିଏ ସପ୍ତାହ ପରେ କରିମ୍ ପଦ ଛାଡିବାକୁ ନିଷ୍ପତ୍ତି ନେଇଛନ୍ତି। ୨୦୧୭ ଡିସେମ୍ବରରେ କରିମ୍ ଦାୟିତ୍ୱ ଗ୍ରହଣ କରିଥିଲେ। ୫୨ ବର୍ଷୀୟ କରିମ୍ ଦାୟିତ୍ୱ ନେବାରେ ସେତେଟା ସଫଳ ହୋଇପାରି ନ ଥିଲେ ବୋଲି ଆଲୋଚନା ହୋଇଥିଲା। ଫଳରେ ସେ ସମସ୍ତଙ୍କ ନଜରରେ ରହିଥିଲେ। ତେବେ ବୋର୍ଡ ତରଫରୁ ଏ ନେଇ କୌଣସି ଔପଚାରିକ ଘୋଷଣା କରାଯାଇନାହିଁ। ଘରୋଇ କ୍ରିକେଟ ନେଇ ଯୋଜନା ଓ ପରିଚାଳନାରେ କରିମ୍ଙ୍କ କାର୍ଯ୍ୟ ନେଇ ବୋର୍ଡ ସନ୍ତୁଷ୍ଟ ନ ଥିଲା।
କରିମ୍ଙ୍କୁ ପଦରୁ ଇସ୍ତଫା ଦେବାକୁ କୁହାଯାଇଥିଲା ବୋଲି ବିସିସିଆଇ ସୁତ୍ରରୁ ଜଣାଯାଇଛି। କୋଭିଡ୍ -୧୯ ମହାମାରୀକୁ ଦୃଷ୍ଟିରେ ରଖି ଘରୋଇ କ୍ରିକେଟ ପାଇଁ ସେ ଏକ ଗଠନମୂଳକ ଯୋଜନା ପ୍ରସ୍ତୁତ କରିବାରେ ବିଫଳ ହୋଇଥିଲେ ବୋଲି କୁହାଯାଇଛି। ଦେଶରେ ମହାମାରୀର ପ୍ରକୋପ ବୃଦ୍ଧି ପାଉଥିବା ବେଳେ ଡିସେମ୍ବର ପୂର୍ବରୁ ଘରୋଇ କ୍ରିକେଟ ଆରମ୍ଭ ହେବା ଅସମ୍ଭବ ମନେ ହେଉଛି। ଯଦି ଅନୁମାନ ଅନୁସାରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆଗାମୀ ସେପ୍ଟେମ୍ବର- ନଭେମ୍ବରରେ ଆୟୋଜନ ହୁଏ ତେବେ ଏହି ସମୟରେ ଘରୋଇ କ୍ରିକେଟ ଆୟୋଜନ ହୋଇପାରିବ ନାହିଁ। ଏହାପୂର୍ବରୁ ଜୋହରିଙ୍କ ଇସ୍ତଫାକୁ ମଧ୍ୟ ଗ୍ରହଣ କରାଯାଇଛି। ବୋର୍ଡର ମୁଖ୍ୟ ଫାଇନାନ୍ସିଆଲ ଅଫିସର ସନ୍ତୋଷ ରାଙ୍ଗେନେକର ମଧ୍ୟ ଗତବର୍ଷ ଇସ୍ତଫା ଦେଇଥିଲେ। ବୋର୍ଡର ନୂଆ ସଭାପତି ସୌରଭ ଗାଙ୍ଗୁଲି ଦାୟିତ୍ୱ ନେବା ପରେ ନୂଆ ଅଧିକାରୀ ମାନେ ନିଯୁକ୍ତ ପାଇବା ପରେ ସେ ଇସ୍ତଫା ଦେଇଥିଲେ।
ଜଣେ ଉଇକେଟକିପର ବ୍ୟାଟ୍ସମ୍ୟାନ ହିସାବରେ କରିମ୍ ଭାରତ ତରଫରୁ ପ୍ରତିନିଧିତ୍ୱ କରି ଗୋଟିଏ ଟେଷ୍ଟ ଓ ୩୪ଟି ଦିନିକିଆ ମ୍ୟାଚ୍ ଖେଳିଛନ୍ତି। ସେହିପରି ସେ ୧୨୯ଟି ପ୍ରଥମ ଶ୍ରେଣୀ ମ୍ୟାଚ୍ ମଧ୍ୟ ଖେଳିଛନ୍ତି। ପୂର୍ବରୁ କରିମ୍ କର୍ପୋରେଟ୍ ସେକ୍ଟରରେ ମଧ୍ୟ ସଫଳତାର ସହ କାର୍ଯ୍ୟ କରିଛନ୍ତି। ସେ ମଧ୍ୟ ପୂର୍ବାଞ୍ଚଳ ପାଇଁ ଜାତୀୟ ଚୟନକର୍ତ୍ତା ଭାବେ କାର୍ଯ୍ୟ କରିଛନ୍ତି।
