ନୂଆଦିଲ୍ଲୀ, ୮।୨:ଭୂକମ୍ପରେ ବ୍ୟାପକ କ୍ଷୟକ୍ଷତି ହୋଇଥିବା ତୁର୍କୀ ଓ ସିରିଆକୁ ଭାରତ ସହଯୋଗ କରିବା ନେଇ ପ୍ରତିଶ୍ରୁତି ଦେଇଛି। ଏ ନେଇ କେନ୍ଦ୍ର ସରକାର ‘ଅପରେଶନ୍ ଦୋସ୍ତ’ ଆରମ୍ଭ କରିଥିବା ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ବୁଧବାର ଟୁଇଟରରେ ଏକ ପୋଷ୍ଟ ଶେୟାର କରି କହିଛନ୍ତି। ଅନେକ ସମୟରେ ବିଶ୍ୱର ଭୂରାଜନୀତିରେ ବହୁ ପରିବର୍ତ୍ତନ ଦେଖିବାକୁ ମିଳୁଛି। କିନ୍ତୁ ଭାରତ ‘ବସୁଧୈବ କୁଟୁମ୍ବକମ୍’ ନୀତି ଆପଣାଇ ସବୁବେଳେ ମାନବ ଜାତିର କଲ୍ୟାଣ ପାଇଁ କାର୍ଯ୍ୟ କରୁଥିବା ସେ ନିଜ ପ୍ରତିକ୍ରିୟାରେ କହିଛନ୍ତି। ବୁଧବାର ଭାରତ ପକ୍ଷରୁ ସି୧୭ ବିମାନ ଜରିଆରେ ଫିଲ୍ଡ ହସ୍ପିଟାଲ ସାମଗ୍ରୀ ସାଙ୍ଗକୁ ଭାରତୀୟ ସେନାର ୫୪ ସଦସ୍ୟ ବିଶିଷ୍ଟ ଟିମ୍ ତୁର୍କୀ ପଠାଯାଇଥିବା ଟୁଇଟର ଯୋଗେ ବହିର୍ବ୍ୟାପାର ମୁଖପାତ୍ର ଅରିନ୍ଦମ ବାଗ୍ଚୀ କହିଛନ୍ତି। ତୁର୍କୀକୁ ରେସ୍କ୍ୟୁ ଅପରେଶନ୍ରେ ସାହାଯ୍ୟ କରିବା ପାଇଁ ଭାରତ ପକ୍ଷରୁ ୫୧ ଏନ୍ଡିଆର୍ଏଫ୍ ଯବାନଙ୍କୁ ତୁର୍କୀ ପଠାଯାଇଛି। ପୂର୍ବରୁ ୨ଟି ଟିମ୍ ଭାରତ ତରଫରୁ ତୁର୍କୀକୁ ପଠାଯାଇଛି। ଅନ୍ୟପକ୍ଷେ ଭାରତ ସିରିଆକୁ ୬ ଟନ୍ ରିଲିଫ୍ ସାମଗ୍ରୀର ସହାୟତା ଯୋଗାଇଛି। ମଙ୍ଗଳବାର ସି-୧୩୦ ଜେ ମିଲିଟାରି ଟ୍ରନ୍ସପୋର୍ଟ ଏୟାରକ୍ରାଫ୍ଟ ଜରିଆରେ ଏହି ରିଲିଫ୍ ସାମଗ୍ରୀ ପଠାଯାଇଛି।
