ନୂଆବର୍ଷରେ ତୃତୀୟ ବ୍ୟାଚ ଏସ୍-୪୦୦ କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀ ଭାରତକୁ ହସ୍ତାନ୍ତର କରିବ ରୁଷିଆ…
01 ନୂଆଦିଲ୍ଲୀ/ମସ୍କୋ,୨୪।୧୨ : ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ସତ୍ତ୍ୱେ ରୁଷିଆ ଭାରତକୁ ନୂଆବର୍ଷ ଅର୍ଥାତ୍ ଆସନ୍ତା ୨୦୨୩ ବର୍ଷ ଜାନୁଆରୀ-ଫେବୃଆରୀରୁ ତୃତୀୟ ବ୍ୟାଚ ଏସ୍-୪୦୦ କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀ ହସ୍ତାନ୍ତର କରିବା ଆରମ୍ଭ କରିବ। ପ୍ରତିରକ୍ଷା ମନ୍ତ୍ରଣାଳୟ ସୂତ୍ରରୁ ଏ ବିଷୟରେ ସୂଚନା ମିଳିଛି। ଭାରତୀୟ ଦଳ ସମେତ ବାୟୁସେନା କର୍ମଚାରୀ ବର୍ତ୍ତମାନ ଏହି ଉପକରଣ ପାଇଁ ରୁଷିଆରେ ଅଛନ୍ତି।
ଏଭଳି ପରିସ୍ଥିତିରେ ଧାର୍ଯ୍ୟ ସମୟ ମଧ୍ୟରେ ତୃତୀୟ ବ୍ୟାଚ କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥା ଯୋଗାଇବାର ଯୋଜନା ରହିଛି। ସୂଚନାଯୋଗ୍ୟ ଯେ ଗତ ବର୍ଷ ଡିସେମ୍ବରରେ ସେନା ପଞ୍ଜାବ ସେକ୍ଟରରେ ରୁଷିଆରୁ ମିଳିଥିବା କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀର ପ୍ରଥମ ବ୍ୟାଚ ସାମଗ୍ରୀ ନିୟୋଜିତ କରିଥିଲା। ଭାରତର ଶିବିରରେ ଅନ୍ତର୍ଭୁକ୍ତ ଏହି ରୁଷିଆର ବାୟୁ ପ୍ରତିରକ୍ଷା ପ୍ରଣାଳୀକୁ ବିଶ୍ୱର ସମସ୍ତ ଦେଶ ଭୟ କରୁଛନ୍ତି। ଏହା ଏକ ପ୍ରକାର ବାୟୁ ପ୍ରତିରକ୍ଷା କ୍ଷେପଣାସ୍ତ୍ର ପ୍ରଣାଳୀ, ଯାହା ଆକାଶରେ ଶତ୍ରୁ ବିମାନକୁ ଗୁଳି କରି ଖସାଇବାକୁ ସକ୍ଷମ।
ସୂତ୍ରରୁ ପ୍ରକାଶ ଯେ ଆମେରିକାର କାଟସା ନିୟମକୁ ଏଡାଇବା ପାଇଁ ତୃତୀୟ ବ୍ୟାଚର ଯୋଗାଣ ସମ୍ବନ୍ଧୀୟ ଦେୟ ଏକ ବିଶେଷ ଉପାୟରେ କରିବାକୁ ହେବ। ପ୍ରଥମ ଦୁଇଟି ବ୍ୟାଚର ଯୋଗାଣ ସମୟରେ ଦେୟର ଏହି ଦିଗକୁ ସମାଧାନ କରିବା ପାଇଁ କେଉଁ ଚ୍ୟାନେଲକୁ ବ୍ୟବହାର କରାଯାଇଛି ତାହା ଅଧିକାରୀମାନେ ପ୍ରକାଶ କରି ନାହାଁନ୍ତି।