ମସ୍କୋ,୩୧।୧୦ : ଖାଦ୍ୟଶସ୍ୟ ଯୋଗାଣ ଚୁକ୍ତିରେ ଅଂଶଗ୍ରହଣକୁ ସ୍ଥଗିତ ରଖିବାକୁ ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ଘୋଷଣା କରିଛି। ଏକ ବିବୃତ୍ତିରେ ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ସେବାଷ୍ଟୋପୋଲ ନିକଟ କୃଷ୍ଣ ସାଗରରେ ଅବସ୍ଥିତ ରୁଷିଆର ନୌବାହିନୀ ଉପରେ ହୋଇଥିବା ଆତଙ୍କବାଦୀ ଆକ୍ରମଣକୁ ବିରୋଧ କରି ରୁଷିଆ ତୁରନ୍ତ ଶସ୍ୟ ଯୋଗାଣ ଚୁକ୍ତିରେ ଅଂଶଗ୍ରହଣ କରିବା ପ୍ରକ୍ରିୟାକୁ ସ୍ଥଗିତ ରଖିଛି। ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ଅଭିଯୋଗ କରିଛି ଯେ ୟୁକ୍ରେନ ରୁଷିଆର ସାମରିକ ଜାହାଜକୁ ନଅ ଡ୍ରୋନ ସହିତ ସେଠାରେ ଥିବା ବହୁ ନାଗରିକ ଡଙ୍ଗାକୁ ଟାର୍ଗେଟ କରିଛି। ଏହି ଆକ୍ରମଣରେ ରୁଷିଆର ଯୁଦ୍ଧ ଜାହାଜ ଖରାପ ହୋଇଯାଇଛି।
ରୁଷିଆର ନିଷ୍ପତ୍ତି ଉପରେ ଆମେରିକା କହିଛି ଯେ ରାଷ୍ଟ୍ରପତି ଭ୍ଲାଡିମିର ପୁଟିନ ଖାଦ୍ୟଶସ୍ୟ ଯୋଗାଣକୁ ଅସ୍ତ୍ର ଭାବରେ ବ୍ୟବହାର କରୁଛନ୍ତି। ପୁଟିନଙ୍କ ଏହି ନିଷ୍ପତ୍ତି ଅତ୍ୟନ୍ତ ବେପରୁଆ ଏବଂ ସମଗ୍ର ବିଶ୍ୱରେ ଚାଲିଥିବା ଖାଦ୍ୟ ସଙ୍କଟକୁ ଅଧିକ ଗୁରୁତର କରିବ। ଆମେରିକାର ରାଷ୍ଟ୍ରପତି ଜୋ ବାଇଡେନ କହିଛନ୍ତି ଯେ ରୁଷିଆ ଏହି ଚୁକ୍ତିରୁ ଦୂରେଇ ଯିବାର କୌଣସି କାରଣ ନାହିଁ। ଆମେରିକାର ଅଭିଯୋଗର ଜବାବରେ ରୁଷିଆର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ପାଶ୍ଚାତ୍ୟ ସହାୟତାରେ ୟୁକ୍ରେନ ଏହି ଚୁକ୍ତିନାମା ଅନୁଯାୟୀ ରୁଷିଆ ଉପରେ ଆତଙ୍କବାଦୀ ଆକ୍ରମଣ ଯୋଜନା କରୁଛି। ଏହାକୁ ସହ୍ୟ କରାଯିବ ନାହିଁ। ଚୁକ୍ତିନାମାକୁ ଢାଲ କରି ଦୁଇଥର ପ୍ରତାରଣା କରାଯାଇଛି।