ନୂଆଦିଲ୍ଲୀ/ମସ୍କୋ,୩।୨: ଆମେରିକା ଓ ଭାରତ ମଧ୍ୟରେ ହୋଇଥିବା ନୂତନ ବାଣିଜ୍ୟ ଚୁକ୍ତିନାମା ପରେ ରୁଷିଆ ପକ୍ଷରୁ ଆଧିକାରୀକ ପ୍ରତିକ୍ରିୟା ସାମ୍ନାକୁ ଆସିଛି। ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସେହି ଦାବିକୁ ରୁଷିଆ ଅସ୍ବୀକାର କରିଛନ୍ତି।
କ୍ରେମଲିନ ତଥା ରୁଷିଆ ରାଷ୍ଟ୍ରପତି ପୁଟିନଙ୍କ ମୁଖପାତ୍ର ଦିମିତ୍ରି ପେସ୍କୋଭ ଖବରଦାତାମାନଙ୍କୁ କହିଛନ୍ତି, ଏ ବିଷୟରେ ନୂଆଦିଲ୍ଲୀଠାରୁ ଆମ୍ଭମାନଙ୍କ ପାଖକୁ ଏପର୍ଯ୍ୟନ୍ତ କୌଣସି ବିବୃତ୍ତି କିମ୍ବା ସୂଚନା ଆସିନାହିଁ। ଭାରତ ତରଫରୁ ଏପର୍ଯ୍ୟନ୍ତ କୌଣସି ପ୍ରକାରର ବିଧିବଦ୍ଧ ଘୋଷଣା ହୋଇନାହିଁ। ରଶିଆ ଭାରତ ସହିତ ତାହାର ରଣନୈତିକ ସମ୍ପର୍କକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବର୍ଣ୍ଣନା କରିଛି ଏବଂ ଏହାକୁ ଆହୁରି ମଜବୁତ କରିବାକୁ ଚାହୁଁଛି।
ତେବେ ଟ୍ରମ୍ପ ସୋମବାର ସୋସିଆଲ ମିଡିଆରେ ପୋଷ୍ଟ କରି କହିଥିଲେ ଯେ, ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଫୋନରେ କଥାବାର୍ତ୍ତା କରିଛନ୍ତି। ମୋଦି ତାଙ୍କୁ ଆଶ୍ୱାସନା ଦେଇଛନ୍ତି ଯେ ଭାରତ ରୁଷିଆରୁ ତେଲ କିଣା ବନ୍ଦ କରିଦେବ। ଏହା ପରେ ଆମେରିକା ଭାରତୀୟ ଉତ୍ପାଦ ଉପରେ ଲାଗିଥିବା ଶୁଳ୍କକୁ ୫୦%ରୁ କମ୍ କରି ୧୮% କରିଛି।
ଏହାଛଡ଼ା ଟ୍ରମ୍ପ ଦାବି କରିଛନ୍ତି ଯେ ଭାରତ ଏବେ ଆମେରିକା ଏବଂ ସମ୍ଭାବ୍ୟତଃ ଭେନେଜୁଏଲାରୁ ଅଧିକ ତେଲ ଖରିଦ କରିବ। ହେଲେ ପ୍ରଧାନମନ୍ତ୍ରୀ ମୋଦି ଏହି ଫୋନ କଲ ଓ ଟ୍ୟାରିଫ ହ୍ରାସକୁ ସ୍ବାଗତ କରିଥିଲେ ମଧ୍ୟ ରୁଷିଆରୁ ତେଲ କିଣା ବନ୍ଦ କରିବା ବିଷୟରେ କୌଣସି ଉଲ୍ଲେଖ କରି ନ ଥିଲେ। ଭାରତ ବିଦେଶ ମନ୍ତ୍ରଣାଳୟ ମଧ୍ୟ ଏ ଦାବି ଉପରେ କୌଣସି ପ୍ରତିକ୍ରିୟା ଦେଇନାହିଁ।
