ମସ୍କୋ/କିଭ୍,୧୦ା୧୧: ଖେରସନ୍ ଅଞ୍ଚଳରେ ୟୁକ୍ରେନୀୟ ସୈନ୍ୟଙ୍କ ଜବାବୀ କାର୍ଯ୍ୟାନୁଷ୍ଠାନ ଭୟରେ ସ୍ଥାନୀୟ ଲୋକଙ୍କୁ ତୁରନ୍ତ ଅନ୍ୟତ୍ର ପଳାୟନ ପାଇଁ ପରାମର୍ଶ ଦେଇଥିଲା ରୁଷିଆ। ଏବେ ଖେରସନ୍ରୁ ମସ୍କୋ ନିଜ ସୈନ୍ୟ ପ୍ରତ୍ୟାହାର କରିଥିବା ରୁଷିଆ ପ୍ରତିରକ୍ଷା ମନ୍ତ୍ରୀ ସର୍ଗେଇ ଶୋହିଗୁ ସୂଚନା ଦେଇଛନ୍ତି। ୟୁକ୍ରେନୀୟ ସେନା ଅଧିକାରୀମାନେ ରୁଷିଆର ସୈନ୍ୟ ପ୍ରତ୍ୟାହାର ସମ୍ପର୍କରେ ଗୁରୁବାର ସ୍ପଷ୍ଟ କରିଛନ୍ତି। ସମ୍ଭାବ୍ୟ ପରାଜୟ ଭୟରେ ରୁଷିଆ ଏପରି ପଦକ୍ଷେପ ନେଇଥିବା କିଭ୍ ପକ୍ଷରୁ କୁହାଯାଇଛି। ତେବେ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ସାମରିକ ବଳ କୌଣସି ମୁହୂର୍ତ୍ତରେ ଫେରି ଦକ୍ଷିଣାଞ୍ଚଳର ଏହି ସହରକୁ ପୁନଃ ଦଖଲ କରିବା ଆଶଙ୍କା ଥିବାରୁ କିଭ୍ ବିଜୟ ଘୋଷଣା କରିନାହିଁ। ଅନ୍ୟପଟେ ଗୁରୁବାର ୟୁକ୍ରେନ୍ ସଶସ୍ତ୍ର ବଳର କମାଣ୍ଡର-ଇନ୍-ଚିଫ୍ ଭଲେରି ଜାଲୁଝନି କହିଛନ୍ତି, କିଭ୍ର ସେନା ଶତ୍ରୁ ପକ୍ଷର ମିଲିଟାରି କମାଣ୍ଡ୍ର ସାମରିକ ପରିବହନ ଓ ଯୋଗାଣ ବ୍ୟବସ୍ଥାକୁ ଧ୍ୱସ୍ତବିଧ୍ୱସ୍ତ କରିଦେଇଥିବାରୁ ସେମାନଙ୍କ ପାଖରେ ପଳାୟନ କରିବା ବ୍ୟତୀତ ଆଉ କିଛି ବିକଳ୍ପ ନ ଥିଲା। ସେହିପରି ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କିଙ୍କ ପରାମର୍ଶଦାତା ମିଖାଲିଓ ପୋଡୋଲ୍ୟାକ୍ କହିଛନ୍ତି, ରୁଷୀୟ ସୈନ୍ୟ ଖେରସନ୍ ସହର ସାରା ଲ୍ୟାଣ୍ଡମାଇନ୍ ବିଛାଇ ଚାଲିଯାଇଛନ୍ତି। ସେମାନଙ୍କ ଉଦ୍ଦେଶ୍ୟ ହେଉଛି ଏହି ପୋର୍ଟ ସିଟିକୁ ‘ମୃତ୍ୟୁର ଉପତ୍ୟକା’ରେ ପରିଣତ କରିବା।
