ଧରାକୋଟ,୧୬ା୫(ଡି.ଏନ୍.ଏ.): ଧରାକୋଟ ବ୍ଲକର ଜୀବନରେଖା ଋଷିକୁଲ୍ୟା ସେତୁ ପ୍ରତି ବିପଦ ବଢୁଛି। ଭଞ୍ଜନଗର ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ରହିଛି ଋଷିକୁଲ୍ୟା ସେତୁ। ଜାତୀୟ ରାଜପଥ ୫୯କୁ ମୁକ୍ତେଶ୍ୱର ମନ୍ଦିର ନିକଟରେ ଯୋଡୁଥିବା ଏହି ସେତୁ ପ୍ରାୟ ୧୦ ବର୍ଷ ପୂର୍ବେ ଦଶ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିଲା। ଏହି ସେତୁ ନିର୍ମାଣ ହେବା ଦ୍ବାରା ବ୍ଲକର ଜାହାଡ଼ା, ସିଙ୍ଗିପୁର, ଜଗମୋହନ, ଝରପାରି ଓ ଝାଡ଼ବନ୍ଧ ପଞ୍ଚାୟତ ସହ ବ୍ଲକ ପ୍ରଶାସନର ସ୍ଥାୟୀ ସଂଯୋଗ ସୃଷ୍ଟି ହୋଇପାରିଛି। ଏପରିକି ଭଞ୍ଜନଗର ଉପଖଣ୍ଡ ସହ ଯୋଗାଯୋଗ ସରଳୀକୃତ ହୋଇପାରିଛି । ସ୍ବାସ୍ଥ୍ୟ, ଶିକ୍ଷା, ଗମନାଗମନ, କୃଷି,ଯୋଗାଣ କ୍ଷେତ୍ରରେ ଏହି ପାଞ୍ଚଟି ପଞ୍ଚାୟତବାସୀ ସିଧାସଳଖ ଯୋଡ଼ି ହୋଇଛନ୍ତି । ଉପରୋକ୍ତ ପଞ୍ଚାୟତଗୁଡ଼ିକର ପ୍ରାୟ ୪୦ ହଜାର ଲୋକଙ୍କର ଅର୍ଥନୈତିକ ଅଭିବୃଦ୍ଧିରେ ଏହି ସେତୁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ହେଲେ ନିମ୍ନମାନର ନିର୍ମାଣ କାର୍ଯ୍ୟ ପାଇଁ ଏହି ସେତୁ ପ୍ରତି ଦିନକୁ ଦିନ ବିପଦ ବଢୁଛି। ସେତୁର ଉପରମୁଣ୍ଡର ଢଳେଇର ଆସ୍ତରଣ ଉଠିଯାଇଥିବା ବେଳେ ସ୍ପାନଗୁଡ଼ିକୁ ଯୋଡୁଥିବା ଲୁହା ଉଠିଯାଇ ଗର୍ତ୍ତ ସୃଷ୍ଟି ହେଲାଣି। ଫଳରେ ଏହି ରାସ୍ତା ଦେଇ ପାଣି ଝରୁଛି । ସେତୁ ଉପରେ ଭାରିଯାନ ଚଳାଚଳ ବେଳେ କମ୍ପନ ସୃଷ୍ଟି ହେଉଛି। ଏଣୁ ସେତୁ ପ୍ରତି ଦିନକୁ ଦିନ ବିପଦ ବଢୁଥିବା ଯୋଗୁ ଲୋକେ ଆତଙ୍କିତ ହୋଇପଡ଼ିଛନ୍ତି। ଏ ସମ୍ପର୍କରେ ଆସିକା ଗ୍ରାମ୍ୟ ଉନ୍ନୟନ ବିଭାଗ ସହକାରୀ ଯନ୍ତ୍ରୀଙ୍କ ସହ ଯୋଗାଯୋଗ ବେଳେ ସେତୁକୁ ଅନୁଧ୍ୟାନ ପରେ ଉପଯୁକ୍ତ ନିଷ୍ପତ୍ତି ଗ୍ରହଣ କରାଯିବ ବୋଲି
ପ୍ରକାଶ କରିଛନ୍ତି।
