ସମ୍ବଲପୁର,୨୮ା୧୧(ବ୍ୟୁରୋ): ସମ୍ବଲପୁର ଜିଲାର ବିଭିନ୍ନ ସ୍ଥାନରେ ନୂତନ ରାସ୍ତା ନିର୍ମାଣ ସହିତ ପ୍ରଶସ୍ତୀକରଣ କାମ ଚାଲିଛି। ଆବଶ୍ୟକ ଅନୁମତି ନେଇ ଠିକା ସଂସ୍ଥା ଗଛ କାଟିବାର ନିୟମ ରହିଛି। ହେଲେ ଏହି ସୁଯୋଗରେ ବିନା ଅନୁମତିରେ ଗ୍ରାମ୍ୟ ଜଙ୍ଗଲରୁ ଶତାଧିକ ଗଛ କଟାଯିବା ଓ ମାଟି ଖନନ କରାଯାଉଥିବା ଅଭିଯୋଗ ହେଉଛି। ସମ୍ବଲପୁର-ତିଲେଇବଣି ରାସ୍ତା କାମରେ ଏଭଳି ବେଆଇନ କାମ ଚାଲିଛି। ଜିଲା ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିଲେ ମଧ୍ୟ ଠିକାସଂସ୍ଥା ଜରିମାନା ଦେଇ ପୁଣି ବେଆଇନ କାର୍ଯ୍ୟ ଚାଲୁ ରଖିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ଯୁଯୁମୁରା ଓ ଜମନିକରା ତହସିଲ ପକ୍ଷରୁ ବିଭିନ୍ନ ସମୟରେ ଠିକା ସଂସ୍ଥାର ଏପରି ବେଆଇନ ମାଟି ଖନନ ଉପରେ ନଜର ରଖାଯାଇଛି। ଯଦି କୌଣସି ସମୟରେ ଠିକା ସଂସ୍ଥାର ବେଆଇନ କାମ ଧରାପଡୁଛି ଜରିମାନା କରାଯାଉଛି। ହେଲେ ଏହାର କୌଣସି ପ୍ରଭାବ ଠିକା ସଂସ୍ଥା ଉପରେ ପଡୁନାହିଁ। ଏପରି କି ଗ୍ରାମବାସୀ ଓ ବନ ସୁରକ୍ଷା ସମିତି ଏହାକୁ ବିରୋଧ କଲେ କମ୍ପାନୀ କର୍ମଚାରୀମାନେ ଗଣ୍ଡଗୋଳ କରୁଛନ୍ତି ବୋଲି ସ୍ଥାନୀୟ ଲୋକେ କହିଛନ୍ତି। ନିୟମ ଅନୁଯାୟୀ, ମାଟି ଉଠାଇବା ପାଇଁ ସ୍ଥାନୀୟ ତହସିଲରୁ ପ୍ରଥମେ ଅନୁମତି ନେବାକୁ ପଡିବ। ରାଜସ୍ବ ବିଭାଗ ପକ୍ଷରୁ ସର୍ଭେ କରାଯାଇ ସରକାରୀ ଜମିରୁ ମାଟି ଉଠାଇବା ପାଇଁ ଅନୁମତି ମିଳିବ। ଏଥିପାଇଁ ସ୍ଥାନୀୟ ପଞ୍ଚାୟତରୁ ନୋ ଅବ୍ଜେକଶନ ସାଟିର୍ଫିକେଟ ନେବାକୁ ପଡିବ। ଯେତେ ପରିମାଣ ମାଟି ଉଠାଇବା ପାଇଁ ଅନୁମତି ମିଳିବ ସେଥିପାଇଁ ରୟାଲିଟି ପୂର୍ବରୁ ଜମା କରିବାକୁ ପଡିବ। ହେଲେ ଠିକା କମ୍ପାନୀ ଏଭଳି ନ କରି ଗଳାବାଟକୁ ଆପଣାଇଛି। ରୟତି ଜମିରେ ମାଟି ଖନନ କଲେ ଅନୁରୂପ ଭାବେ କଡା ନିୟମ ରହିଛି। ହେଲେ ଅନେକ ସ୍ଥାନରେ ଠିକା ସଂସ୍ଥା କେତେଜଣ ରାଜସ୍ବ କର୍ମଚାରୀଙ୍କୁ ହାତ କରି ନିଜର ଫାଇଦା ଉଠାଉଛନ୍ତି। ବନ ବିଭାଗ ଓ ରାଜସ୍ବ ବିଭାଗର ସମନ୍ବୟ ଅଭାବ ଯୋଗୁ ଠିକାସଂସ୍ଥାଙ୍କ ବେଆଇନ କାର୍ଯ୍ୟକଳାପ ବୃଦ୍ଧି ପାଉଛି ବୋଲି ଅଭିଯୋଗ ହୋଇଛି। ଯୁଯୁମୁରା ତହସିଲ ବାରିବନ୍ଧ ( ନୀଳଡୁଙ୍ଗିରୀ)ରେ ଥିବା ଗ୍ରାମ୍ୟ ଜଙ୍ଗଲରେ ଏଭଳି ମାଟି ଖନନ କରାଯିବା ସହ ଶତାଧିକ ଗଛ କାଟି ଦିଆଯାଇଛି ବୋଲି ସ୍ଥାନୀୟ ଲୋକେ କହିଛନ୍ତି । ଏହି ଗ୍ରାମ୍ୟ ଜଙ୍ଗଲ ସମ୍ବଲପୁର ବନଖଣ୍ଡ ପଡିଆବାହାଲ ରେଞ୍ଜ ଅଧୀନରେ ରହିଛି ।
ଏ ସମ୍ପର୍କରେ ଯୁଯୁମୁରା ତହସିଲଦାର ସୁମନ ମିଞ୍ଜଙ୍କୁ ପଚାରିବାରୁ ଗ୍ରାମ୍ୟ ଜଙ୍ଗଲରେ ମାଟି ଖନନ ହେଉଥିବା ନେଇ ଅଭିଯୋଗ ହୋଇଥିଲା। ଚଢାଉ କରାଯାଇ ଠିକାସଂସ୍ଥାଠାରୁ ୩ ଲକ୍ଷ ୬୦ ହଜାର ଟଙ୍କା ଜରିମାନା ଆଦାୟ କରାଯାଇଛି। ମାଟି ଉଠାଣ ବନ୍ଦ କରାଯାଇଥିଲା। ଏବେ ଯଦି ମାଟି ଉଠାଉଥିବା ଅଭିଯୋଗ ହେଉଛି ପୁଣି ଥରେ ଚଢାଉ କରାଯିବ ବୋଲି ସେ କହିଛନ୍ତି।
