କୋରେଇ,୨୧ା୨(ଡି.ଏନ.ଏ):ଯାଜପୁର ଜିଲା କୋରେଇ ବ୍ଲକ ଅଧୀନ ବିଭିନ୍ନ ଗ୍ରାମ ତଥା ପଞ୍ଚାୟତକୁ ସଂଯୋଗୀକରଣ ନିମନ୍ତେ ସମୁଦାୟ ୧୩ଟି ରାସ୍ତାର ମରାମତି ଓ ପ୍ରଶସ୍ତିକରଣ ଆରମ୍ଭ ହୋଇଛି । ହେଲେ ବିଭାଗୀୟ ଅଧିକାରୀଙ୍କ ଅନୁପସ୍ଥିତରେ କେତେକ କାର୍ଯ୍ୟ ରାତିଅଧିଆ ଚାଲିଥିବା ଦେଖିବାକୁ ମିଳିଛି। ଏଥିରୁ ୧୦ଟି ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା(ପିଏମ୍ଜିଏସ୍ୱାଇ) ହୋଇଥିବାବେଳେ ୩ଟି ମୁଖ୍ୟମନ୍ତ୍ରୀ ଗ୍ରାମ ସଡ଼କ ଯୋଜନା(ଏମ୍ଏମ୍ଏସ୍ୱାଇ) ରହିଛି। ତେବେ ଆସନ୍ତା ନିର୍ବାଚନ ଖର୍ଚ୍ଚ ପାଇଁ କେଉଁ ବିଭାଗରୁ କେତେ ଅର୍ଥ ଆଦାୟ ହୋଇପାରିବ ସେଥିପାଇଁ ତଳିଆ ନେତାଙ୍କଠାରୁ ଆରମ୍ଭ କରି ଉପରିସ୍ଥ ଜନପ୍ରତିନିଧିମାନେ ଲାଗିପଡିଛନ୍ତି। ଏଥିସହିତ ବିଭାଗୀୟ ଅଧିକାରୀମାନେ ପ୍ରଶାସନକୁ ଆଖିଠାର ମାରି ଜନପ୍ରତିନିଧି ମାନଙ୍କୁ ଅର୍ଥ ଆଦାୟ କରି ଦେବାରେ ସହଯୋଗ କରୁଥିବା ଚର୍ଚ୍ଚା ହେଉଛି। ନେତା, ଠିକାଦାର ଓ ଅଧିକାରୀ ମେଣ୍ଟ କରି ଲୁଟୁଥିବାରୁ ରାସ୍ତା କାର୍ଯ୍ୟ ନିମ୍ନମାନର ହେଉଛି, ଯାହାକି ନିର୍ଦ୍ଧାରିତ ସମୟ ସୀମା ପୂର୍ବରୁ ନଷ୍ଟ ହୋଇଯାଉଛି।
କୋରେଇ ବ୍ଲକ ଅନ୍ତର୍ଗତ ତାରାକୋଟଠାରୁ ପୂର୍ବକୋଟ ୬.୪୯୦ କି.ମି. ରାସ୍ତା ନିର୍ମାଣ କାର୍ଯ୍ୟ ପାଇଁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୪.୮ କୋଟି ଟଙ୍କା ବ୍ୟୟବରାଦ କରାଯାଇଛି। ତେବେ ନିର୍ମାଣ କାର୍ଯ୍ୟ ନିମ୍ନମାନର ଚାଲିଥିବା ଗ୍ରାମବାସୀ ଅଭିଯୋଗ କରୁଛନ୍ତି। ଅଭିଯୋଗ ଅନୁଯାୟୀ, ୭୨୭.୪୩ ଘନ ମିଟର ଚିପ୍ସ ବ୍ୟବହାର କରିବାକୁ ଚିଠାରେ ଉଲ୍ଲେଖ ରହିଛି। ହେଲେ ଏହାର ଅଧାଭାଗ ଚିପ୍ସ ମଧ୍ୟ ବ୍ୟବହାର ହେଉନାହିଁ। ୨୦,୪୪୦.୩ ଘନମିଟର ମାଟି କାମରେ ମଧ୍ୟ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ୨,୮୭୮.୭୧ ଘନମିଟର ମେଟାଲ ବ୍ୟବହାର ହେବାକୁ ଚିଠାରେ ଲେଖାଯାଇଛି। କିନ୍ତୁ ଏଥିରେ ମଧ୍ୟ ବଡ଼ଧରଣର ସଲାସୁତୁରା ସହ ମେଟାଲଗୁଡ଼ିକ ନିମ୍ନମାନର ବୋଲି ଅଭିଯୋଗ ହୋଇଛି। ସେହିପରି ଏଷ୍ଟିମେଟ୍ ଅନୁଯାୟୀ ପ୍ରାଇମର ଓ ପିଚୁ ନ ଦେଇ ଏକାଥରେ ରାତିଅଧିଆ ରନ୍ଧାପିଚୁ ଢାଳି କାର୍ଯ୍ୟ କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ରାତିରେ କାମ ହେଉଥିବାରୁ କୌଣସି ବିଭାଗୀୟ ଅଧିକାରୀ ଉପସ୍ଥିତ ରହୁ ନ ଥିବା କୁହାଯାଉଛି।
ସେହିପରି ମୁଖ୍ୟମନ୍ତ୍ରୀ ଗ୍ରାମ ସଡ଼କ ଯୋଜନାରେ ନିର୍ମାଣ ହେଉଥିବା ପାଣିକୋଇଲି ରଗଡ଼ି ପୂର୍ତ୍ତ ବିଭାଗଠାରୁ କେନ୍ଦୁଝର ସୀମା ଭାୟା କଡ଼ମା ରାସ୍ତାରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଛି। ୧୦ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ନିର୍ମାଣ ହେଉଥିବା ଏହି କାମରେ ସାଇଡ୍ ଫିଲିଂ କାର୍ଯ୍ୟ ଚାଲୁରହିଛି। ତେବେ ସାମାନ୍ୟ ବଜୁରୀ ଦେଇ କେବଳ ଡଷ୍ଟ ଦ୍ୱାରା ଫିଲିଂ କରାଯାଉଛି। ରାସ୍ତାକଡ଼ରେ ଥିବା ଚାଷଜମିରୁ ମାଟି ତାଡ଼ି ଦୁଇ ସାଇଡ୍କୁ ପୋତା ଯାଉଛି। ଫଳରେ ଓଭରହେଡ୍ ପାଣିଟାଙ୍କିରୁ ଜଳଯୋଗାଣ ପାଇଁ ରାସ୍ତାକଡ଼ରେ ବିଛାଯାଇଥିବା ପାଇପ୍ଗୁଡ଼ିକ ନଷ୍ଟ ହୋଇଯାଇଛି। ଫଳରେ ୩ ଗ୍ରାମକୁ ଜଳ ଯୋଗାଣ ପ୍ରାୟ ଦେଢ ମାସ ହେବ ସମ୍ପୂର୍ଣ୍ଣ ଭାବେ ବ୍ୟାହତ ଘଟିଛି। ଏନେଇ ଗ୍ରାମବାସୀମାନେ କୋରେଇ ବ୍ଲକ ଉନ୍ନୟନ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କିଛି ସୁଫଳ ମିଳିପାରିନାହିଁ । ଏନେଇ କନିଷ୍ଠ ଯନ୍ତ୍ରୀ ରଞ୍ଜନ କୁମାର ବେହେରାଙ୍କୁ ପଚାରିବାରେ ନିଜେ ଉପସ୍ଥିତ ରହିବା ସହ କାମ ସମ୍ପୂର୍ଣ୍ଣ ଠିକ ଚାଲୁଥିବା ସେ କହିଛନ୍ତି। ତେବେ ଗ୍ରାମବାସୀଙ୍କ ବିରୋଧ ପାଇଁ ଗୋଟିଏ ଦିନ ରାତିରେ କାମ ହୋଇଥିବା ସେ କହିଛନ୍ତି।
