ମୁମ୍ବାଇ,୨୨ା୧(ବ୍ଲୁମ୍ବର୍ଗ/ପି.ଟି.): ୨୦୨୫ ଡିସେମ୍ବର ୧୬ରେ ଭାରତୀୟ ମୁଦ୍ରା ୯୧.୧୪ ଟଙ୍କାକୁ ଖସି ସର୍ବକାଳୀନ ନିମ୍ନସ୍ତରକୁ ଛୁଇଁଥିଲା। ସେବେଠୁ ଅଦ୍ୟାବଧି ଟଙ୍କା ୧.୫% ଦୁର୍ବଳ ହୋଇଥିବା ଫରେକ୍ସ ଟ୍ରେଡର୍ସ କହିଛନ୍ତି। ଭୂରାଜନୈତିକ ଅନିଶ୍ଚିତତା ବୃଦ୍ଧି, ଆମେରିକାର ବିସ୍ତାରବାଦୀ ପଦକ୍ଷେପ ପୁଞ୍ଜି ବଜାରକୁ ବିପଜ୍ଜନକ ସ୍ଥିତିକୁ ଠେଲିଦେଇଥିବାରୁ ଭାରତର ଘରୋଇ ବଜାର ଚାପଗ୍ରସ୍ତ ହୋଇଛି। ଏହାର ପ୍ରଭାବରେ ବିଦେଶୀ ସଂସ୍ଥାଗତ ନିବେଶକ (ଏଫ୍ଆଇଆଇ) ଭାରତୀୟ ବଜାରରୁ ମୁହଁ ଫେରାଇନେଉଥିବାରୁ ଟଙ୍କାର ଅବମୂଲ୍ୟାୟନ ଧାରା ଜାରି ରହିଛି। ଗ୍ରୀନ୍ଲାଣ୍ଡ ପ୍ରସଙ୍ଗକୁ ନେଇ ୟୁରୋପରେ ଉତ୍ତେଜନା ବୃଦ୍ଧି ପାଇବାରେ ଲାଗିଥିବାବେଳେ ସମ୍ଭାବ୍ୟ ଉଚ୍ଚ ଟାରିଫ୍ ଏବଂ ଘରୋଇ ବଜାରରେ ନକାରାମତ୍କ ଟ୍ରେଣ୍ଡ୍ ଜାରି ରହିଲେ ନିବେଶକଙ୍କ ସେଣ୍ଟିମେଣ୍ଟ ଅଧିକ ପ୍ରଭାବିତ ହେବା ସହ ଟଙ୍କାର ଦୁର୍ବଳତା ଆହୁରି ବଢ଼ିପାରେ ବୋଲି ଫରେକ୍ସ ଟ୍ରେଡର୍ସ ସତର୍କ କରାଇଛନ୍ତି।
ଇଣ୍ଟରବ୍ୟାଙ୍କ ଫରେନ୍ ଏକ୍ସଚେଞ୍ଜରେ କାରବାର ଆରମ୍ଭ ହେବାବେଳେ ଟଙ୍କାର ମୂଲ୍ୟ ୯୧.୦୫ ରହିଥିବାବେଳେ ପରେ ୯୧.୭୪ ପର୍ଯ୍ୟନ୍ତ ଖସିଥିଲା। କାରବାର ଶେଷରେ ମଙ୍ଗଳବାରର କ୍ଲୋଜିଂ ତୁଳନାରେ ୬୭ ପଇସା ଦୁର୍ବଳ ହୋଇ ୯୧.୬୪ ଟଙ୍କାରେ ସ୍ଥିର ରହିଛି। ଏଚ୍ଡିଏଫ୍ସି ସିକ୍ୟୁରିଟିଜ୍ ରିସର୍ଚ୍ଚ ଆନାଲିଷ୍ଟ ଦିଲୀପ ପରମାର କହିଛନ୍ତି, ୨୦୨୫ ନଭେମ୍ବର ୨୧ ପରଠୁ ଦିନକରେ ଏହା ହେଉଛି ଟଙ୍କାର ସବୁଠୁ ବଡ଼ ହ୍ରାସ। ମଙ୍ଗଳବାର ଟ୍ରେଡିଂ ଆରମ୍ଭରେ ଡଲାର ତୁଳନାରେ ଟଙ୍କା ୯୧.୦୬କୁ ଖସିଥିବାବେଳେ ପରେ ୭ ପଇସାର ଦୁର୍ବଳତା ସହ ୯୦.୯୭ ଟଙ୍କାରେ ସ୍ଥିର ରହିଥିଲା। ଭାରତ ଭଳି ବିକାଶଶୀଳ ଅର୍ଥନୀତିଗୁଡ଼ିକ ବର୍ତ୍ତମାନ ପୁଞ୍ଜି ସ୍ରୋତରେ ଦୁର୍ବଳତାର ଚାପର ସମ୍ମୁଖୀନ ହେଉଛନ୍ତି ବୋଲି କୋଟାକ୍ ମହିନ୍ଦା ଏଏମ୍ସିର ଅଭିଷେକ ବିସେନ୍ ମତ ଦେଇଛନ୍ତି।
ଭୂରାଜନୈତିକ ଉତ୍ତେଜନା ସହ ଗ୍ରୀନ୍ଲାଣ୍ଡ ବିବାଦ ଆମେରିକା-ୟୁରୋପ ସମ୍ପର୍କରେ ଫାଟ ସୃଷ୍ଟି କରିଛି। ଏଥିଯୋଗୁ ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ୍ (ନାଟୋ) ବିଭାଜିତ ହେବା ଆଶଙ୍କା ଉପୁଜିଛି। ସେହିପରି ଭେନେଜୁଏଲାର ତୈଳ ଭଣ୍ଡାର ଉପରେ ଆମେରିକାର ନିୟନ୍ତ୍ରଣ ସାରା ବିଶ୍ୱର ବାଣିଜ୍ୟ ଉପରେ ନକାରାତ୍ମକ ପ୍ରଭାବ ପକାଇଥିବା କୁହାଯାଉଛି। ଆମେରିକା ସହ ଭାରତର ବାଣିଜି୍ୟକ ଚୁକ୍ତି ସମ୍ପନ୍ନ ହୋଇ ନ ପାରିବା ବଜାର ଭାବାବେଗକୁ ଖରାପ କରୁଛି। ଏହି କାରଣରୁ ଏଫ୍ଆଇଆଇ ମଙ୍ଗଳବାର ୨,୯୩୮.୩୩ କୋଟି ଟଙ୍କାର ପୁଞ୍ଜି ପ୍ରତ୍ୟାହାର କରିନେଇଛନ୍ତି। ଏଫ୍ଆଇଆଇ ଗତବର୍ଷ ୧୯ ବିଲିୟନ୍ ଡଲାର ମୂଲ୍ୟର ଷ୍ଟକ୍ସ ବିକ୍ରି କରିଥିବାବେଳେ କେବଳ ଚଳିତ ମାସରେ ସେଲିଂ ପରିମାଣ ୨.୭ ବିଲିୟନ୍ ଡଲାର ରହିଥିବା ସୂଚନା ମିଳିଛି। ଏହି ପୃଷ୍ଠଭୂମିରେ ବୁଧବାର ସେନ୍ସେକ୍ସ ୨୭୦.୮୪ ପଏଣ୍ଟ ଖସି ୮୧,୯୦୯.୬୩ରେ ରହିଛି। ସେହିପରି ନିଫ୍ଟି୫୦ରେ ମଧ୍ୟ ୭୫ ପଏଣ୍ଟ ହ୍ରାସ ଦେଖିବାକୁ ମିଳିଛି। ନିଫ୍ଟି୫୦ ୨୫,୧୫୭.୫୦କୁ ଖସିଯାଇଛି। ଏଭଳି ସ୍ଥିତିରେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ପକ୍ଷରୁ ଟଙ୍କାରେ ସ୍ଥିରତା ଆଣିବା ପାଇଁ ଯେପରି ଉଦ୍ୟମ ହେବା ଆବଶ୍ୟକ, ତାହା ହେଉନାହିଁ ବୋଲି ଶିନ୍ହାନ ବ୍ୟାଙ୍କ ଅଫ୍ ଇଣ୍ଡିଆର ଟ୍ରେଜେରି ହେଡ୍ କୁନାଲ ସୋଧାନି କହିଛନ୍ତି।
Dharitri – The Largest & Most Trusted Odia Daily
