ନୟାଗଡ଼,୩୧।୧୨(ଲୋକନାଥ ମିଶ୍ର)ନୟାଗଡ଼ ଜିଲାପାଳଙ୍କ ସମ୍ମିଳନୀ କକ୍ଷରେ ଶନିବାର ସଡ଼କ ସୁରକ୍ଷା ସପ୍ତାହ ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଜାନୁୟାରୀ ୧ରୁ ୭ ତାରିଖ ପର୍ଯ୍ୟନ୍ତ ହେବାକୁ ଥିବା ସଡ଼କ ସୁରକ୍ଷା ସପ୍ତାହ ଓ ପରବର୍ତ୍ତୀ ସମୟରେ ଦୁର୍ଘଟଣା, ମୃତକ ଓ ଆହତଙ୍କ ସଂଖ୍ୟା ହ୍ରାସ ପାଇଁ ଗୁରୁତ୍ୱ ଦିଆଯାଇଛି । ସଡ଼କ ସୁରକ୍ଷା ସପ୍ତାହକୁ କଡାକଡି ପାଳନ କରାଯାଇ ଧରପଗଡ଼କୁ ତ୍ୱରାନ୍ବିତ କରାଯିବ ବୋଲି କୁହାଯାଇଛି। ଦୁର୍ଘଟଣାକୁ ଏଡାଇବା ପାଇଁ ପୂର୍ତ୍ତ ଓ ଜାତୀୟ ରାଜପଥ ବିଭାଗକୁ ସଡ଼କର ଖାଲଖମା ମରାମତି କରିବାକୁ ନିର୍ଦ୍ଦେଶ ଦିଆଯାଇଛି । ପୁଣି ବିଭିନ୍ନ ସ୍ଥାନରେ ବୁଦୁବୁଦିଆ ଜଙ୍ଗଲ ଓ ଗଛ ଦୁର୍ଘଟଣାର କାରଣ ହେଉଥିବାରୁ ସେଗୁଡିକୁ ମଧ୍ୟ ସଫେଇ କରାଯିବାକୁ ନିଷ୍ପତ୍ତି ହୋଇଛି। ରାସ୍ତାରେ ଥିବା ବେଆଇନ ହମ୍ପ୍ସକୁ ମଧ୍ୟ ଉଚ୍ଛେଦ କରାଯିବ । ୧୨ ହଜାର ଯାନବାହନର ଡ୍ରାଇଭରଙ୍କୁ ମାଗଣା ତାଲିମ ପ୍ରଦାନ କରାଯିବ ।
ଡିସେମ୍ବର, ଜାନୁୟାରୀରେ ବେଶି ଦୁୁର୍ଘଟଣା ହେଉଥିବାରୁ ସଚେତନତାକୁ କଡାକଡି କରାଯାଇଛି । ମଦ୍ୟପାନ କରି ଗାଡ଼ି ଚାଳନା ନ କରିବାକୁ ସଚେତନତା କରାଯାଉଛି । ଏପରି କି ସଡ଼କ ସୁରକ୍ଷା ନିୟମ ମାନନ୍ତୁ ଓ ପରିବାର ସହ ସୁଖଦ ବଣଭୋଜିର ଆନନ୍ଦ ଉଠାନ୍ତୁ ଲେଖାଥିବା ଇଂଲିଶ ଓ ଓଡିଆ ବ୍ୟାନର ପିକନିକ ସ୍ଥଳରେ ଝୁଲିବ । ପୁଣି ସଚେତନତା ପାଇଁ ନୟାଗଡ଼ ବ୍ରଜେନ୍ଦ୍ର ହାଇସ୍କୁଲ ଓ ଦଶପଲ୍ଲା ଥାନା ସମ୍ମୁଖରେ ସଡ଼କ ସୁରକ୍ଷା ଉପରେ ଦୁଇଟି ବଡ ଗେଟ୍ କରାଯାଇ ସଚେନତା କରାଯିବ । ଦ୍ରୁତ ଗତିରେ ଗାଡି ଚାଳନାକୁ ରୋକିବାକୁ ଇଣ୍ଟର ସେପ୍ଟର ଗାଡି ପରିକ୍ରମା କରିବ। ମଦ୍ୟପ ଧରପଗଡ଼ ପାଇଁ ପ୍ରତି ମଙ୍ଗଳବାର ଚେକିଂ ହେଉଛି। ଏହାକୁ ତ୍ୱରାନ୍ବିତ କରାଯିବ । ବ୍ଲାକ୍ ସ୍ପଟ୍ରେ ରମ୍ବଲର୍ସ କରାଯିବ । ସାଇନେଜ ବୋର୍ଡ କିଛି ସ୍ଥାନରେ ରହିଛି । ନୂଆ ସ୍ଥାନରେ ରହିବ ।
ଜିଲାର୧୯୪ ପଞ୍ଚାୟତରେ ସଡ଼କ ସୁରକ୍ଷା ଜୀବନ ରକ୍ଷା ଉପରେ ସଭା କରାଯିବ । ଆଞ୍ଚଳକି ପରିବହନ ଅଫିସ ପକ୍ଷରୁ ନବଘନପୁର, ଲେଙ୍କୁଠିପଡା, ଚମ୍ପତିପୁର, ଲକ୍ଷ୍ମୀପ୍ରସାଦ ୪ ପଞ୍ଚାୟତରେ ଶେଷ ହୋଇଥିବା କୁହାଯାଇଛି । ବାଇକ୍ ଚାଳନା ବେଳେ ହେଲମେଟ ପିନ୍ଧିବାକୁ ପରାମର୍ଶ ଦିଆଯାଇଛି । ପୁଣି ନାବାଳକମାନଙ୍କୁ ଗାଡି ଚାଳନା ନ କରିବାକୁ କୁହାଯାଇଛି । ଗାଡ଼ି ଚାଳନା କଲେ ଜରିମାନା ସହ ଅଭିଭାବକ ଓ ସ୍କୁଲ, କଲେଜ କତ୍ତୃପକ୍ଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ । ପୁଣି ସଡ଼କ ସୁରକ୍ଷାର ବାର୍ତ୍ତା ଏଲଇଡି ଦ୍ୱାରା ସଚେତନତା କରାଯିବ । ଶର୍ଟ ଫିଲମ୍ ସ୍କୁଲ ,କଲେଜ ଓ ବିଭିନ୍ନ ସ୍ଥାନରେ ପ୍ରଦର୍ଶନ କରାଯିବ । ସ୍କୁଲ କଲେଜରେ ସଡ଼କ ସୁରକ୍ଷା ସଚେତନତାର ବାର୍ତ୍ତା ବଣ୍ଟନ ପାଇଁ ପ୍ରତିଯୋଗିତା କରାଯିବ। ବୈଠକରେ ଜିଲାପାଳ ଯୋଗ ଦେବାର ଥିଲା । ତେବେ ଜିଲାପାଳ ଭିଡିଓ କନଫେରେନ୍ସରେ ରହିବାରୁ ଅତିଥିଙ୍କ ସିଟ୍ ଖାଲି ରହିଥିଲା । ଆଞ୍ଚଳିକ ପରିବହନ ଅଧିକାରୀ ପ୍ରଶାନ୍ତ ପରିଡା, ଡିଏସ୍ପି ହେମନ୍ତ ରାଓ, ଏମଭିଆଇ ପଞ୍ଚାନନ ବେହେରା, ଡ୍ରାଇଭର, ବସ୍ ଓ ମାଲିକ ସଂଘ କର୍ମକର୍ତ୍ତା, ଟ୍ରକ ଓ ଅଟୋ ଡ୍ରାଇଭର ସଂଘର କର୍ମକର୍ତ୍ତା, ଜିଲାସ୍ତରୀୟ ଗଣମାଧ୍ୟମର ପ୍ରତିନିଧି ଏହି ପ୍ରସ୍ତୁତି ବୈଠକରେ ଉପସ୍ଥିତ ଥିଲେ।
