କଳାକାର ସିଏ ଯେ, ନିର୍ଜୀବ ଭିତରେ ବି ଜୀବନ ଭରିପାରେ। ଅଦରକାରୀ ଜିନିଷକୁ ସୁନ୍ଦର କଳାକୃତିରେ ରୂପାନ୍ତର କରିପାରେ। ଏଭଳି କଳାକାର ଭାରତରେ ବି କିଛି କମ୍ ନାହାନ୍ତି। ନିକଟରେ ମଧ୍ୟପ୍ରଦେଶ, ଭୋପାଳରେ ରହୁଥିବା କେତେଜଣ କାରିଗର ସ୍କ୍ରାପ ବା ଅଦରକାରୀ ସାମଗ୍ରୀରେ ଏଭଳି ଏକ ବୀଣା ତିଆରି କରିଛନ୍ତି, ଯାହା ଏବେ ଚର୍ଚ୍ଚାର ବିଷୟ ପାଲଟିଛି। ଏହି ବୀଣାଟି ଏତେ ବଡ଼ ଯେ, ମଣିଷ ତା’ ଆଗରେ ବହୁତ ଛୋଟ ଦେଖାଯିବ। ଏହାକୁ ତିଆରି କରିଥିବା ଟିମ୍ଙ୍କ କହିବା ଅନୁସାରେ ଏହା ହେଉଛି ସବୁଠାରୁ ବଡ଼ ରୁଦ୍ରବୀଣା; ଯାହାର ଲମ୍ବ ୨୮ ଫୁଟ୍, ଓସାର ୧୦ ଫୁଟ୍, ଉଚ୍ଚତା ୧୨ ଫୁଟ ଏବଂ ଓଜନ ୫ ଟନ୍। ଏହାକୁ ତିଆରି କରିବାପାଇଁ ୬ ମାସ ସମୟ ଲାଗିବା ସହ ୧୦ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ଏହାକୁ ଗାଡ଼ିର ପାର୍ଟସ୍ ଯେମିତି କି ଚେନ୍, କେବୁଲ୍, ଗିୟର୍, ବଲ୍ ବିୟରିଂ ଆଦିକୁ ବ୍ୟବହାର କରି ତିଆରି କରାଯାଇଛି। ୧୫ ଜଣ କଳାକାର ଦୀର୍ଘ ସମୟ ଧରି ଏହି ସବୁ ସାମଗ୍ରୀକୁ ସଂଗ୍ରହ କରି ଏହାକୁ ତିଆରି କରିଛନ୍ତି।
