ଛତ୍ରପୁର,୧୬।୫(ଡି.ଏନ.ଏ.): ମୋଟର ଯାନ ଆଇନ ଉଲ୍ଲଂଘନ ନେଇ ଗୋପାଳପୁର ପୋର୍ଟ ଲିମିଟେଡ୍କୁ ନୋଟିସ ଜାରି ହୋଇଛି। ଗଞ୍ଜାମ ଆର୍ଟିଓ ମାନସ ରଞ୍ଜନ ସାହୁ ମୋଟର ଯାନ ଆକ୍ଟ -୧୯୮୮ର ସେକ୍ସନ ୨୧୩(୫) ଆଧାରରେ ଏହି ନୋଟିସ ଜାରି କରିଛନ୍ତି। ନୋଟିସ ବଳରେ ଆରଟିଓଙ୍କ ପକ୍ଷରୁ ପୋର୍ଟକୁ କେତେକ ତଥ୍ୟ ମଗାଯାଇଛି। ତଥ୍ୟ ଦେବାରେ ବିଳମ୍ବ କଲେ ଆଇପିସିର ସେକ୍ସନ ୧୮୮ ଆଧାରରେ ଆଇନଗତ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ଆର୍ଟିଓ ଉକ୍ତ ନୋଟିସରେ ସତର୍କ କରାଇ ଦେଇଛନ୍ତି। ଚଳିତବର୍ଷ ଜାନୁୟାରୀ ପହିଲାରୁ ଏପ୍ରିଲ ୩୦ତାରିଖ ପର୍ଯ୍ୟନ୍ତ ପୋର୍ଟକୁ କେତେ ଟ୍ରକ ଆସିଥିଲା, ସେଗୁଡିକର ପଞ୍ଜୀକୃତ ନମ୍ବର, ଟ୍ରକ୍ରେ କେଉଁ ପ୍ରକାର ଓ କେତେ ମେଟ୍ରକ୍ ଟନ୍ ମାଲ ଆସିଥିଲା, ପରିବହନକାରୀ ସଂସ୍ଥାର ନାମ ଏବଂ ତାରିଖ ସହ ଇନଭଏସ ଓ ଚାଲାଣ ନମ୍ବର ସମ୍ପର୍କରେ ସମ୍ପୂର୍ଣ୍ଣ ତଥ୍ୟ ପ୍ରଦାନ କରିବାକୁ ଆର୍ଟିଓଙ୍କ ପକ୍ଷରୁ ନୋଟିସ ଜାରି ହୋଇଛି।
ମୋଟର ଯାନ ଆଇନ ଉଲ୍ଲଂଘନ ସହ ଓଭରଲୋଡିଂ ମାଲ ପରିବହନ କରି ଗୋପାଳପୁର ପୋର୍ଟରୁ ଆସୁଥିବା କେତୋଟି ଗାଡିର ଚାଲାନ କଟାଯାଇଥିବାରୁ ଆରଟିଓଙ୍କ ପକ୍ଷରୁ ଏହାର ତଦନ୍ତ ଆରମ୍ଭ ହୋଇଛି। ଓଭରଲୋଡିଂ ମାଲ ପରିବହନ କରୁଥିବା ଟ୍ରକ ଯୋଗୁ ରାସ୍ତା ଖରାପ ହେଉଥିବା ବେଳେ ଦୁର୍ଘଟଣା ମଧ୍ୟ ଘଟୁଛି। ଏଥିଯୋଗୁ ଟ୍ରକ ଚାଳକ ଓ ଜନସାଧାରଣଙ୍କ ପ୍ରତି ବିପଦ ରହୁଛି ବୋଲ ପୂର୍ବରୁ ଆରଟିଓଙ୍କ ପକ୍ଷରୁ ପୋର୍ଟ କର୍ତ୍ତୃପକ୍ଷଙ୍କୁ ଏକ ଚିଠି ଲେଖାଯାଇଥିଲା। ପୋର୍ଟ କର୍ତ୍ତୃପକ୍ଷ ଓଭରଲୋଡ଼ିଂ ମାଲ ବୋଝେଇ ଗାଡିକୁ ଗେଟପାସ୍ ଓ ରାସ୍ତାରେ ଯିବାକୁ ଅନୁମତି ଦେଇଥିଲେ ବୋଲି ଆର୍ଟିଓ ଉକ୍ତ ଚିଠିରେ ଦର୍ଶାଇଥିଲେ। ଆଗକୁ ଓଭରଲୋଡ଼ିଂ ଗାଡିକୁ ଆଉ ପୋର୍ଟ ପରିସରରୁ ବାହାରକୁ ନ ଛାଡିବାକୁ କୁହାଯାଇଥିଲା। ଏଥିରେ ଖିଲାପ କଲେ ମୋଟର ଯାନ ଆକ୍ଟ ଅନୁସାରେ ମାମଲା ଦାଏର କରାଯିବ ବୋଲି ସତର୍କ କରାଯାଇଥିଲା।
