ପୁଣେ,୧୮।୧୦ : ଜମ୍ମୁ-କଶ୍ମୀରରେ ଆତଙ୍କବାଦକୁ ନେଇ ଶୂନ୍ୟ ସହନଶୀଳତା ନୀତି ଆପଣାଇ ବର୍ତ୍ତମାନର କେନ୍ଦ୍ର ସରକାର ଆତଙ୍କବାଦୀ କାର୍ଯ୍ୟକଳାପକୁ ରୋକିଛନ୍ତି। ୨୦୧୪ ମସିହାରୁ ବର୍ତ୍ତମାନ ପର୍ଯ୍ୟନ୍ତ କେନ୍ଦ୍ର ସରକାର ଆତଙ୍କବାଦ ପ୍ରସଙ୍ଗକୁ ଗମ୍ଭୀରତାର ସହ ନେଇଛନ୍ତି ଏବଂ ସରକାର ଏହା ବିରୋଧରେ କାର୍ଯ୍ୟାନୁଷ୍ଠାନ ନେବାରେ କ୍ରମାଗତ ଆଗୁଆ ରହିଛନ୍ତି। ଆରଟିଆଇ ଅଧୀନରେ ମଙ୍ଗଳବାର ଆତଙ୍କବାଦ ସହ ଜଡିତ ଏକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି।
ପୂର୍ବ କଂଗ୍ରେସ ନେତୃତ୍ୱାଧୀନ ୟୁପିଏ ସରକାର ଏବଂ ବର୍ତ୍ତମାନର ଭାଜପା ନେତୃତ୍ୱାଧୀନ ଏନଡିଏ ସରକାରଙ୍କ ସମୟରେ ଆତଙ୍କବାଦୀଙ୍କୁ ଏନକାଉଣ୍ଟର କରିବାର ପରିସଂଖ୍ୟାନ ସାମ୍ନାକୁ ଆସିଛି। ଯେଉଁଥିରେ ୟୁପିଏ ସରକାରଙ୍କ ସମୟରେ ସର୍ବାଧିକ ଆତଙ୍କବାଦୀ ନିହତ ହୋଇଥିବା ଜଣାପଡ଼ିଛି। ଯଦିଓ ୟୁପିଏ ସରକାରଙ୍କ ସମୟରେ ଆତଙ୍କବାଦୀ ଆକ୍ରମଣ ଅଧିକ ଘଟିଛି।
ପୁଣେର ବ୍ୟବସାୟୀ ପ୍ରଫୁଲ୍ଲ ସାରଦା ୨୦୦୪ ରୁ ୨୦୨୨ ପର୍ଯ୍ୟନ୍ତ ଦେଶରେ ହୋଇଥିବା ଆତଙ୍କବାଦୀ ଘଟଣାର ବିବରଣୀ ପାଇଁ ଆରଟିଆଇ ଦାଖଲ କରିଥିଲେ। ଏହା ପରେ, ଏହି ଆରଟିଆଇର ଉତ୍ତର ଜମ୍ମୁ-କଶ୍ମୀର ଗୃହ ମନ୍ତ୍ରଣାଳୟର ସିପିଆଇଓ କବୀରରାଜ ସାବରଙ୍କ ଦ୍ୱାରା ପ୍ରଦାନ କରାଯାଇଛି। ତଥ୍ୟ ଅନୁଯାୟୀ, ୨୦୦୪ରୁ ୨୦୧୩ ମଧ୍ୟରେ ୟୁପିଏ ଶାସନର ୧୦ ବର୍ଷ ମଧ୍ୟରେ ୯,୩୨୧ ଆତଙ୍କବାଦୀ ଆକ୍ରମଣ ହୋଇଥିଲା । ଯେଉଁଥିରେ ୪,୦୦୫ ଆତଙ୍କବାଦୀ ନିହତ ହୋଇଥିଲେ ଏବଂ ୮୭୮ ଜଣଙ୍କୁ ଗିରଫ କରାଯାଇଥିଲା।
ଯେତେବେଳେ କି ୨୦୧୪ ରୁ ଅଗଷ୍ଟ ୨୦୨୨ ମଧ୍ୟରେ ଏନଡିଏର ଶାସନର ଆଠ ବର୍ଷ ଭିତରେ ୨,୧୩୨ ଆତଙ୍କବାଦୀ ଘଟଣା ଘଟିଥିଲା ଯେଉଁଥିରେ ୧,୫୩୮ ଆତଙ୍କବାଦୀଙ୍କୁ ଏନକାଉଣ୍ଟର କରାଯାଇଥିଲା ଏବଂ ୧,୪୩୨ ଜଣଙ୍କୁ ଗିରଫ କରାଯାଇଥିଲା। ଆରଟିଆଇ ରିପୋର୍ଟରେ ଉଲ୍ଲେଖ କରାଯାଇଛି ଯେ ଗତ ସାଢ଼େ ୧୮ ବର୍ଷ ମଧ୍ୟରେ ୧୧,୪୫୩ ଆତଙ୍କବାଦୀ ଆକ୍ରମଣ ହୋଇଥିଲା। ଭାରତୀୟ ସେନା ଏବଂ ଅନ୍ୟାନ୍ୟ ସୁରକ୍ଷା ବାହିନୀ ୫,୫୪୩ ଆତଙ୍କବାଦୀଙ୍କୁ ଏନକାଉଣ୍ଟର କରିବା ସହିତ ୨,୩୧୦ ଆତଙ୍କବାଦୀଙ୍କୁ ଗିରଫ କରିଥିଲେ। ୟୁପିଏ ସରକାର ସମୟରେ ୨୦୦୪ ମସିହାରେ ୨,୫୬୫ ଆତଙ୍କବାଦୀ ଘଟଣା ଘଟିଥିବାବେଳେ ୯୭୬ ଆତଙ୍କବାଦୀ ନିହତ ହୋଇଥିଲେ। ୨୦୦୫ ମସିହାରେ ୧,୯୯୦ ଆତଙ୍କବାଦୀ ଆକ୍ରମଣ ହୋଇଥିବାବେଳେ ୮୧୭ ଆତଙ୍କବାଦୀ ନିହତ ହୋଇଥିଲେ। ୨୦୦୬ରେ, ୧,୬୬୭ ଆତଙ୍କବାଦୀ ଘଟଣା ଘଟିଥିବାବେଳେ ୫୯୧ ଆତଙ୍କବାଦୀ ନିହତ ହୋଇଥିଲେ।
ଆରଟିଆଇର ରିପୋର୍ଟ ଅନୁଯାୟୀ, ୟୁପିଏ ସରକାରଙ୍କ ଅମଳରେ ସର୍ବାଧିକ ଆତଙ୍କବାଦୀ ଆକ୍ରମଣର ହୋଇଥିବାବେଳେ ଭାରତୀୟ ସେନା ଏବଂ ସୁରକ୍ଷା ବାହିନୀ ଦ୍ୱାରା ସର୍ବାଧିକ ଆତଙ୍କବାଦୀ ନିହତ ହୋଇଥିଲେ। ସର୍ଜିକାଲ ଷ୍ଟ୍ରାଇକ ପରେ ଭାଜପା ଶାସନରେ ଆତଙ୍କବାଦର ମେରୁଦଣ୍ଡ ଭାଙ୍ଗିବାରେ ସଫଳତା ହାସଲ ହୋଇଛି।
