ବମ୍ବେ: ବଲିଉଡ୍ର ମିଷ୍ଟର ପର୍ଫେକ୍ସନିଷ୍ଟ ଆମିର ଖାଁ ନିର୍ଦ୍ଦେଶକ ଭାବେ ‘ତାରେ ଜମିନ୍ ପର୍’ ଫିଲ୍ମରୁ ଡେବ୍ୟୁ କରିଥିଲେ। ୨୦୦୭ରେ ରିଲିଜ ହୋଇଥିବା ଏହି ଫିଲ୍ମ ଓସ୍କାର ଯାଇଥିବା ପ୍ରଥମ ଅଫିସିଆଲ୍ ଚଳଚ୍ଚିତ୍ର ପାଲଟିଥିଲା। ଏଥିରେ ଫିଲ୍ମନିର୍ମାତା ଅମୋଲ ଗୁପ୍ତେଙ୍କ କାମକୁ ବେଶ ପସନ୍ଦ କରାଯାଇଥିଲା। ଏହାଛଡ଼ା ଅଭିନେତା ଭାବେ ଆମିର ମଧ୍ୟ ପ୍ରଶଂସିତ ହୋଇଥିଲେ। ମାତ୍ର କ’ଣ ଆପଣ ଜାଣନ୍ତି, ଚଳଚ୍ଚିତ୍ର ଲାଗି ଅମୋଲଙ୍କ ପସନ୍ଦ ଆମିର ନୁହଁନ୍ତି ବରଂ ଅଭିନେତା ଅକ୍ଷୟ ଖାନ୍ନା ଥିଲେ। ଅକ୍ଷୟ ଆର୍ଟ ଶିକ୍ଷକ ରାମ ଶଙ୍କର ନିକୁମ୍ଭଙ୍କ ଭୂମିକା ତୁଲାନ୍ତୁ ବୋଲି ଅମୋଲ ଚାହୁଁଥିଲେ। ହେଲେ ଅକ୍ଷୟଙ୍କ ହାତରୁ ସୁଯୋଗ ଛଡ଼ାଇ ନେଇଥିଲେ ଆମିର।
ନିକଟରେ ଅକ୍ଷୟ ଏକ ସାକ୍ଷାତକାରରେ ଆମିର କିଭଳି ତାଙ୍କ ହାତରୁ ଫିଲ୍ମ ନେଇଯାଇଥିଲେ ତାହା କହିଛନ୍ତି। ଅମୋଲ ଅକ୍ଷୟଙ୍କୁ ଜାଣି ନ ଥିଲେ। ଏଣୁ ନିର୍ଦ୍ଦେଶକ ଭାବେ ଆମିର ଅକ୍ଷୟଙ୍କୁ ଭେଟି ତାଙ୍କୁ ଫିଲ୍ମ ବିଷୟରେ ବୁଝାନ୍ତୁ ବୋଲି କହିଥିଲେ। ଆମିର କିନ୍ତୁ ପ୍ରଥମେ ନିଜେ କାହାଣୀ ଶୁଣିବାକୁ ଇଚ୍ଛା ପ୍ରକାଶ କରିଥିଲେ। ସ୍କ୍ରିପ୍ଟ ଶୁଣିବା ପରେ ତାଙ୍କୁ ଚରିତ୍ର ପସନ୍ଦ ଆସିଥିଲା। ସେ ନିଜେ ଏହାକୁ କରିବାକୁ ଚାହୁଁଥିବା ଅମୋଲଙ୍କୁ କହିଥିଲେ। ଏଭଳି ଭାବେ ଶେଷରେ ସେ ହିଁ ପମୁଖ ଚରିତ୍ର ପାଲଟିଥିଲେ।
ଏବେ ଯେବେ ବି ଉଭୟ ଦେଖାହୁଅନ୍ତି ସେତେବେଳେ ଏ ବିଷୟରେ ଚର୍ଚ୍ଚା ହୋଇଥାଏ। ଅକ୍ଷୟ ‘ଠିକ୍ ଅଛି’ ବୋଲି ଜବାବ ଦେଇଥାନ୍ତି। ତେବେ ଆମର ଯେଉଁଭଳି ଫିଲ୍ମରେ ଅଭିନୟ କରିଛନ୍ତି ତାକୁ ବହୁତ ପସନ୍ଦ କରୁଥିବା ଅକ୍ଷୟ କହିଛନ୍ତି। ସେ ସେଭଳି ଅଭିନୟ କରିପାରିଥାନ୍ତେ କି ନା ଜାଣି ନ ଥିବା ମଧ୍ୟ କହିଛନ୍ତି।
