ନୂଆଦିଲ୍ଲୀ: ଦେଶ ମଧ୍ୟରେ ସମସ୍ତଙ୍କୁ କରୋନା ଟିକା ଯୋଗାଇଦେବା ଲାଗି ଆଗାମୀ ଗୋଟିଏ ବର୍ଷ ମଧ୍ୟରେ ସରକାରଙ୍କୁ ୮୦ ହଜାର କୋଟି ଟଙ୍କା ଲୋଡ଼ା ପଡିବ। ପୁଣେ ସ୍ଥିତ ସେରମ୍ ଇନ୍ଷ୍ଟିଚ୍ୟୁଟର ଅଧ୍ୟକ୍ଷ ଆଦର ପୁନାଓ୍ବାଲା ଏଭଳି ଆକଳନ କରିଛନ୍ତି। ଏହା ଏକ ବଡ଼ ଚ୍ୟାଲେଞ୍ଜ ହୋଇଥିବା ବେଳେ ସ୍ଥିତିକୁ ସମ୍ଭାଳିବା କଷ୍ଟକର ବୋଲି ସେ ଏକ ଟୁଇଟରେ ଏହା କହିଛନ୍ତି। କରୋନା ସଂକ୍ରମଣ ବର୍ତ୍ତମାନ ସାରା ଦେଶରେ ତୀବ୍ରତର ହୋଇଛି। ଏଭଳି ସ୍ଥିତିରେ ସମସ୍ତଙ୍କୁ ଟିକା ଯୋଗାଇଦେବାର ଆବଶ୍ୟକତା ରହିଛି। ସରକାର ଏଥିଲାଗି ପ୍ରସ୍ତୁତ ଅଛନ୍ତି କି ନାହିଁ ସେ ପ୍ରଶ୍ନ ଉଠାଇଛନ୍ତି। କାରଣ ଏଥିଲାଗି ଏକ ସ୍ବତନ୍ତ୍ର ଯୋଜନା ହାତକୁ ନେବାକୁ ପଡିବ। ଘରୋଇ ବଜାର ଏବଂ ବିଦେଶୀ କମ୍ପାନୀଗୁଡିକଠାରୁ ଟିକା ସଂଗ୍ରହ କରିବା ଏବଂ ବଣ୍ଟନ କରିବାରେ ବିଭିନ୍ନ ସମସ୍ୟା ଉପୁଜିବ। ଏହି ସମସ୍ୟାକୁ କିଭଳି ସମାଧାନ କରାଯିବ ଓ ଅର୍ଥ କେଉଁଠାରୁ ଆସିବ ସେ ନେଇ ସରକାରଙ୍କ ସହ ବିଶେଷଜ୍ଞମାନେ ଆଲୋଚନା କରୁଛନ୍ତି।
