ରାଉରକେଲା,୧୪।୧୧(ବିପ୍ଳବ ରଞ୍ଜନ ଦାଶ): ବ୍ରାହ୍ମଣୀ ନଦୀକୁ ପ୍ରଦୂଷଣ ମୁକ୍ତ କରିବା ଉଦ୍ଦେଶ୍ୟରେ ଆରଏମସି ପକ୍ଷରୁ ରାଉରକେଲା ବାଲୁଘାଟରେ ମୂର୍ତ୍ତି ବିସର୍ଜନ ଘାଟ ଇତିମଧ୍ୟରେ ନିର୍ମାଣ କରାଯାଇଛି। ଏଠାରେ ଗତ ଦଶହରା ସମୟରେ ସହରର ବିଭିନ୍ନ ମଣ୍ଡପରେ ପୂଜିତ ମୂର୍ତ୍ତିଗୁଡିକୁ ବିସର୍ଜନ କରାଯାଇଥିଲା। ତେବେ ଉକ୍ତ ଘାଟକୁ ବିଶୋଧନ କରାଯାଇ ନ ଥିବାରୁ ଏବେ କାଳୀଙ୍କ ମୂର୍ତ୍ତି ବିସର୍ଜନ ନେଇ ସମସ୍ୟା ଉପୁଜିଛି।
ସୂଚନା ଅନୁସାରେ, ପ୍ରତିବର୍ଷ ପାର୍ବଣ ସମୟରେ ବ୍ରାହ୍ମଣୀ ନଦୀ ଜଳରେ ମୂର୍ତ୍ତି ବିସର୍ଜନ ଯୋଗୁ ପ୍ରଦୂଷଣ ହେଉଥିଲା। ଏହାର ପ୍ରତିକାର ପାଇଁ ୧କୋଟି ୬୯ଲକ୍ଷ ଟଙ୍କା ବ୍ୟୟରେ ବାଲୁଘାଟରେ ମୂର୍ତ୍ତି ବିସର୍ଜନ ପାଇଁ ବ୍ୟବସ୍ଥା କରାଗଲା। ଗତ ଅଗଷ୍ଟ ମାସରେ ଏହି କାର୍ଯ୍ୟ ଶେଷ ହେବା ପରେ ଗଣେଶ ପୂଜା, ବିଶ୍ୱକର୍ମା ପୂଜା ଏବଂ ଦଶହରା ସମୟରେ ବିସର୍ଜନ ଘାଟରେ ମୂର୍ତ୍ତି ବିସର୍ଜନ କରାଗଲା। ତେବେ ଏଯାଏ ବିସର୍ଜନ ଘାଟକୁ ବିଶୋଧନ କରାଯାଇ ନ ଥିବାରୁ ତାହା ପ୍ରଦୂଷିତ ଓ ଅପରିସ୍କାର ହୋଇପଡିଛି। ଏଥିଯୋଗୁ ପାର୍ଶ୍ୱବର୍ତ୍ତୀ ଅଞ୍ଚଳରେ ଦୁର୍ଗନ୍ଧ ସହ ବ୍ୟାପକ ପ୍ରଦୂଷଣ ମଧ୍ୟ ହେଉଛି। ସେହିପରି ସହରରେ ଚଳିତବର୍ଷ କାଳୀପୂଜା ପରେ ମୂର୍ତ୍ତି ବିସର୍ଜନ କରାଯିବ। ବାଲୁଘାଟ ଜଳ ବିଶୋଧନ ହୋଇ ନ ଥିବାରୁ ସେଠାରେ କିଭଳି ମୂର୍ତ୍ତି ବିସର୍ଜନ କରାଯିବ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାକୁ ବିଭିନ୍ନ ରାଜନୈତିକ ଦଳ ପକ୍ଷରୁ ବିରୋଧ କରାଯାଇଛି। ଏ ନେଇ ପିସିସି ସାଧାରଣ ସମ୍ପାଦକ ବିରେନ ସେନାପତି ନିଜ ପ୍ରତିକ୍ରିୟାରେ କହିଛନ୍ତି, କୋଟି କୋଟି ଟଙ୍କା ବ୍ୟୟରେ ବିସର୍ଜନ ଘାଟ ତିଆରି ହେଲା। ମାତ୍ର ଘାଟରେ ଜଳ ବିଶୋଧନ ହେଉନାହିଁ। ଫଳରେ ସେଠାରେ ପୂତିଗନ୍ଧମୟ ପରିବେଶ ସୃଷ୍ଟି ହୋଇଛି। ତୁରନ୍ତ ବିସର୍ଜନ ଘାଟ ଜଳକୁ ବିଶୋଧନ କରିବାକୁ ସେ ଦାବି କରିଛନ୍ତି। ସେହିପରି ଏ ବିଷୟରେ ଆର୍ଏମ୍ସି ଆୟୁକ୍ତଙ୍କ ଦୃଷ୍ଟି ଆକର୍ଷଣ କରି ତୁରନ୍ତ ବିସର୍ଜନ ଘାଟ ସଫେଇ ପାଇଁ ଦାବି କରାଯିବ। ନଚେତ ଆଗକୁ ଆନ୍ଦୋଳନାତ୍ମକ ପଦକ୍ଷେପ ନିଆଯିବ ବୋଲି ଭାଜପା ମୁଖପାତ୍ର ଧୀରେନ ସେନାପତି କହିଛନ୍ତି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ଚନ୍ଦ୍ରକାନ୍ତ ଧଳଙ୍କୁ ପଚାରିବାରୁ କାଳୀଙ୍କ ମୃଣ୍ମୟ ମୂର୍ତ୍ତି ବିସର୍ଜନ ପରେ ବିସର୍ଜନ ଘାଟ ବିଶୋଧନ କରାଯିବ ବୋଲି ସେ କହିଛନ୍ତି।
