ଲଣ୍ଡନ,୧୪।୮: ଶେଷ ପର୍ଯ୍ୟନ୍ତ କେହି ଆଉଟ୍ କରିପାରିଲେ ନାହିଁ। ଅଧିନାୟକ ଜୋ ରୁଟ୍ ଏକାକୀ ପ୍ରଥମ ଇନିଂସରେ ଇଂଲଣ୍ଡକୁ ଆଣି ଦେଇଛନ୍ତି ୨୪ ରନ୍ର ଅଗ୍ରଣୀ। ରୁଟ୍ଙ୍କ ୧୮୦ ରନ୍ ଅପରାଜିତ ପାଳି ବଳରେ ପ୍ରଥମ ଇନିଂସରେ ଇଂଲଣ୍ଡ ୩୯୧ ରନ୍ କରିବାକୁ ସକ୍ଷମ ହୋଇଛି। ପୂର୍ବରୁ ଭାରତ ତା’ର ପ୍ରଥମ ଇନିଂସରେ ୩୬୪ ରନ୍ କରିଥିଲା।
ପୂର୍ବ ଦିନର ସ୍କୋର (୧୧୯/୩)ରୁ ବ୍ୟାଟିଂ ଆରମ୍ଭ କରିଥିଲା ଇଂଲଣ୍ଡ। ରୁଟ୍ ଓ ଜନ୍ନି ବେଆରଷ୍ଟୋ (୫୭)ଙ୍କ ଯୋଡ଼ି ଭାରତୀୟ ବୋଲରଙ୍କୁ ଖୁବ୍ ହଇରାଣ କରିଥିଲେ। ଦୁହେଁ ୪ର୍ଥ ଉଇକେଟ ପାଇଁ ଯୋଡ଼ି ଥିଲେ ୧୨୧ ରନ୍। ତା’ ପରେ ରୁଟ୍ ଗୋଟିଏ ପକ୍ଷ ସମ୍ଭାଳି ରଖିଥିବା ବେଳେ ଅନ୍ୟ ପଟେ କାହାକୁ ରଖେଇ ଦେଇ ନ ଥିଲେ ଭାରତୀୟ ବୋଲର। ଫଳରେ ଇଂଲଣ୍ଡର ପ୍ରଥମ ଇନିଂସ ୩୯୧ ରନ୍ରେ ଶେଷ ହୋଇଥିଲା। ରୁଟ୍ଙ୍କ ୧୮୦ ରନ୍ର ପାଳିରେ ସାମିଲ ଥିଲା ୧୮ ଚୌକା। ଏହା ତାଙ୍କ ଟେଷ୍ଟ କ୍ୟାରିୟରର ୨୩ତମ ଶତକ। ଟିମ୍ ଇଣ୍ଡିଆ ପାଇଁ ସର୍ବାଧିକ ୪ ଉଇକେଟ ହାତେଇ ଥିଲେ ମହମ୍ମଦ ସିରାଜ। ତାଙ୍କ ଛଡ଼ା ଈଶାନ୍ତ ଶର୍ମା ୩ ଓ ମହମ୍ମଦ ଶାମି ୨ ଲେଖାଏ ଉଇକେଟ ହାସଲ କରିଥିଲେ।
